Karen State, Zwekabin mualdawn pan gamdangmi khat tuaksuk in si

Karen State, Zwekabin mualdawn pan gamdangmi khat tuaksuk in si

Kawlgam Karen State sung aom mualsang minthangkhat ahi Zwekabin mualdawn panin gamdangmi khat tuaksuk in si cih nungsungteng Social Media tungah hongthang mahmah hi. Tua atuaksuk pen French Tourist khat hi a, amawktuah hilo a, amahleh amah aki sihbawlnuam “Suicide” hi kici hi.

Tua France gammipa minpen Yannick Normandin kici a, akumpen 37 ahihi. Htone Aing Police Station panin thunei te genna ah hihpa pen Yangon panin hongzinkhia hi a, Kyaikto ahawhkhit ciangin Friday nitak 7pm hunpawl in Zwekabin mual hongtung hi. Mount Zwekabin adawn ah kahto in adawnsangpen atun ciangin kal 3 paiphei in lengkhia cimawk hi.

Aluanghawm zong anuai koilaitu cih kithei paklo in, kizong kawikawi hi. Saturday niciangin aluang kimupan a, singkung Pi 170 (52 Meter) asangdawn khatah na awk hi. Alu akhut akhe akawng cihte kilawigawp cihi.

Hpa-an Fire Department panin Firemen pawlkhatin khaukhung uh a, tuatawh singdawn panin kendangah aluang hamsapi takin lakhia uhhi. Tuakhit ciangin Hpa-an Hospital kipuak a, Hpa-an Social Welfare Department te’n akisam bangin hihvai tawh kisai panpih uhhi.

Hih misipa luangtung panin ID Card, sum leh innkuan te hopihtheih nading Contact Information kimukhia hi.

Saturday nimah in Yangon aom French Embassy ah asipa ii alawmnu Girlfriend in alawmpa mangcip ci’n na zasak, Report nabawl hi. Alawmpa tawh ki thuzakna kitatcip ci’n genkhia hi. Alawmpa pen ama theihlohkal in naki sihbawlkhin tamawk hi.

Aluanghawm ngahtheih nadingin French Embassy in phalna anget laitak uh hi a, ahi zongin Karen State, Htone Aing Police Station ah avai siangnailo cihi.

“Mount Zwekabin” kici mualdawnsang velval pen Karen State sungah gamdang mite amit ala mahmah “Premier Tourist Attraction” khat hongsuakta hi. Gamdangmi Foreign Visitors te bekthamlo, Kawlgamsung paninzong khualzinmi tammahmahta cih kiza hi. ZD Sawltak #zomidaily