Ling-uih teh le Zawngtah gah tungpan thalakna

Ling-uih teh le Zawngtah gah tungpan thalakna

Zomite sungah liing-uih le zawngtah cih a theilo omlo dingin lamen hang…Hihte pen meh theih hi-a, lim kisa mahmah hi. Lim a salo zong bel om kha inteh…

Ling-uih pianzia

Lung-uih kungpen ling tawh kidim hi-a, luipang kensia guamsia kawmah po nuam phadeuh hi. Ama tungpan mihingte in meh i ngah theihpen a teh ahihkeh a ziik ahi hi. Khamtung lamah tuuk guahtui luan madeuhin gam kihal nuam mahmah a, tua hun sungin ling-uih kungte zong kang gawp kha thei hi.

Ahi zongin tua gamkatna hanga a kang ling-uih kung panin a teh thak, a dawn thak hong suangin hong nosuah mahmah a, limci mahmah ahih manin kilo in meh in kizang hi.

Khamtung gam ahilo mun tuamtuamte ah bel teh thak, dawn thak hong suangin mehtheih hong hong hih theih nadingin a dawn kisiktan, a zik kikuaitan hi. Tua akikuaitan mun panin dawn hong suangkik in tehthak hong selkhia a tuapen meh dingin kilo in, ging dapdap liangin a tui kihawp in, a ha kine lala liang hi.

Zawngtah pianzia

Zangtah pianzia pen a kung ngawt mahmah ahih manin kitan baih hi. Tua ahih manin huih tawm nung leh zong ahiangte kitanziau thei hi. Ama kung pen mam zelzal in sang mahmah thei a, a gah ahihleh a dawn penpen ah gah hi. A dawn a gahpen kilo in zasa meh, malta meh in kibawl in naptui luang liangin kine hi. Mehpi in zong kibawl in lim kisa mahmah hi. A tamzaw in huan ah kicing hi.
​
Amau tegel pianzia

Mehlim khat ahih zenzen uh hangin namsia mahmah se uh hi. Tam nek leng bang i zuun nangawn namsia thei hi. Meh a nei-in a ne khin kam limtak a khuahlote bang hong pau leh namsia zo liang hi. Ahi zongin mehlim khat in kingaihsun hi. A ne theilo zong hel om kha inteh..

A bangbang ahi zongin meh teh meh gah zuakna sai/bazaar ah kizuakin sum ngahna in zong a nei mi omin, meh limpen in a zang zong om hi.

I gennop bulpi ahih leh

• Amaute dinmun enleng, duh huai masa loin, namsia uh hi.
• Ling-uihpen a kung ling tawh kidim a, zawngtah ahih leh sang mahmah citciat se hi.
• Huihpi, guahpi, ni sa, kha sa tampi a thuak khit uh ciangin hong sel, hong gah pante ahi uh hi.

Thalakna

I nuntak kalsuanna ah ling-uih kung bangin haksatna le buaina lingte in ei hong tuamcip in, nisa, guahzu, huihpi tampi i tuak thei hi. Ahi zongin tua lingte kawmkal panin hong khangkhia, haksatna tampi thuakna panin hong dawnkhia, hong selkhia ling-uih teh, dawn, ziikte pen mihingte adingin mehlim pen hong suak hi.

Tua ahih manin i tuah, i thuak, i phut, i lawn haksatna le buaina, gualleh maizumna le vai tuamtuamte tungtawnin i nuntakna sungah mite ading thaza tampi piangkhia thei pan hi.

More: Zatui sutna phim ~ Dong Mung

Zawntah bangin i nuntakna ah khatvei lungkia in, i kitan baih kha hiam? Mite’n hong telsiam zolo in hong zahko kha hiam? Lungkia kei ni…Mihing ihih manin thanem hun, lungkiat hun om thei lua hi. I siamloh, i kicinloh manin mite telsiamlohna zong i ngah thei hi. Thanem kei ni…Zawngtah zong a dawn, kuama batlohna pan gahin, mihingte ading mehlim pen suak lel hi.

Tua ahih manin thanem loin, gah limci gahin i muibut semsem nadingin mainawt teitei in. Lungdam, Dong Mung