Kapteel khua-a thupiang hangin tutmun lunggeel

Kapteel khua-a thupiang hangin tutmun lunggeel

Nung diakin Kapteel khua-ah thusuak ngah ten LST phum uh hi cih a kua peuhin social media tuamtuam pan leh thu leng kiza kim tek ding hi. Khuathak khua-ah ZBCM in LST bu 12 phum a, Khuapi ah AG pawlpi mi panin bu nih kiphum a, thusuak ngah ten sep ding om lai-a bu 70 kiphum ding hi ci-in CITUI VONTAWITE group ah kisuak sak hi. Thusuak nei pen AG pawlpi mite khat hi, Thusuak nei ten “Ko LST a phum hi kei ung, a tuh hi ung… Thupha, itna, gah hoih hong po khia ding hi” ci-in CITUI VONTAWITE group ah kisuak hi. Hih vai Section zum-ah ko uh a, hih nawn kei un ci-in lai kipaisak hi ci-in kigen beh hi. Pawl khatin bu 17 kiphum khin zo hi a ci zong om hi.

LST pen Pasian thu hing leh Pasian’ Kha-in a hu tawh a mop thu hi ci-in thu-um kici khempeuh in kisang kim tek hi. Johan 1:1-3 ah “A kipat cil in, Thu na om a, Tua Thu Pasian tawh na om khawm a, tua Thu, Pasian ahi hi. Tua hi a, a kipat cil-a kipanin Thu leh Pasian na om khawm hi. Pasian in Thu tawh na khempeuh piangsak a, a kipangsak na khempeuh, Thu tawh loin a kipiangsak khat beek om lo hi,” na ci ahih manin i thu-upzia pen Pasian leh Pasian’ Thu tawh om khawm nawn lo hi cih tel takin hong kilang a, Thu leh Pasian tawh kigam la in, kimelma khin zo hi hang cih kitel mahmah hi. LST pen Pasian thu hing leh siangtho ahih manin i sim ding leh i nutakpih ding hi a, i phum ding hilo hi.

LST phumna panin thupha, itna, gah hoih hong gah lo ding a, i simna panin thupha, gah hoih leh itna kingah thei ding hi zaw hi. Haici leh misi lo buang ei Zomi ten kiphum ngei nai ta dih lo ahih manin thu lamdangpi khat ahi hi. Leitung kipat cil a kipanin LST kihal hi cih khawng kizaza ngei a, ahih hangin LST bu kiphum hi cih i zak cilna hong hi a, i Zogam teekteek ah hong piang mawk pen dahhuai in, maizumhuai lua mahmah hi. Jesu in “ Kidawm un la, mite’ khemsain ta kei un. Bang hang hiam cih leh keimah a kineih mi tampi hong pai ding a, ‘Keimah in Khrih ka hi hi’ ci-in mi tampi tak um khial sak ding uh hi (Matt. 24:4-5), “Kamsang kineih khem mi tampi hong piang ding a, mi tampi tak um khial sak ding uh hi,” (Matt. 24:11) ci-in hong gen khol khin zo hi.

Johan Masa 4:1 ah “Ka lawm itte aw, mi khempeuh’ thugen um kei un la, tua thute Pasiang kian pan mah ahi hiam, ci-in kantel un. Bang hang hiam cih leh leitungah kamsang a kineih tampi hong om khin ta hi,” ci-in hong hilh khin zo hi. Hih bangin thu lamdang tuamtuam hong piang lai ding a, leitung mun dang khat peuhah a piang nop leh a piang zongin phamawh lo hi. LST’ genna a tangtun’na ding hi a, hong piang kei leh LST pen a man lo hi ding hi. Ahih hangin i Zogam ah hih bang thu lamdang hong piang ding deih huai nawn lo hi.

Bang hanga hih bang thu lamdang hong piang a, koi pan hong kipan hiam? cih kigen ngeingai hi. Hihpa/hihte pawl pan hong kipan hi ci-in kimawhsak pah ding zong hi peuhmah lo hi. Hih bangin thu lamdang hong bangci piang theih mawk a, hih bangin a piang nawn lohna dingin bangci bangin tha la ding, hanciam ding, dal ding? cih pen a thupi pen hi zaw ta hi. Hih bangin thu hong piang theih mawk pen bang hang hi ding hiam? cih lim takin i ngaihsut ngeungau ding kisam hi. Pawlpi sia ten a tuute lam pialpih kha pak uh hiam?

Lusuksan kha pak uh hiam? Lam man lo lak man nawn lo uh hiam? cih zong a lungngaih mahmah huai thu khat ahi hi. Ei Zomite pen i zawn’ leh i ngau manin lai lam pilna kikin bawl zo nai lo a, tua bang mahin i Pawlpi sia neihte a tamzawte pen pilna sangpipi sin zo loin, nei zo lo uh a, LST degree hoih nono leh sangpipi a ngah zong kitam nai lo mah hi. LST thu leh LST degree hoih sia i neih loh manun LST amau deih bangin kai kha uh hiam cih zong ngaihsut huai a, LST pen bank account leh ATM card bangin a zang kitam lua lai hiam cih zong ngaisut huai lai hi.

LST thu lim takin a sin leh a tel sinsen ten LST bu hal hi, phum hi cih kiza ngei nai lo sam hi. Tua banah kha mangthang pen mat ding kisam mah a, minam tuamtuamte kiangah missionary tampi mah kisawl khia zo ta ahih manin a lungdamhuai thu khat hi. Ahih hangin ei Zomite lakah kha mangthang mat ding tam lua lai hi kha ding hi cih zong ngaihsut huai hi. LST degree sang nei zo zaw diak ten gam tuamtuam bek-ah hong pai khiatsan manin hih bang thu hong piang kha hi ding hiam cih zong ngaihsut tham cing veve hi. Kha mangthang mat ding i Zogam ah tam mahmah lai ahih manin “Inn gua hah lo gam gua hah” i suak khak ding zong a lungngaih huai hun hi ta hi.

Tua banah bang hanga thusuak ngah ten LST bu phum theihna ding zahin mite thuzawh zo mawk uh hiam cih zong ngaihsut huaipi khat ahi hi. Jesu mahmah in, “Kha khempeuh na um kei un,” ci-in hong hilhkhol khin zo hi. Tua bang ahih kei leh pawlpi mi ten LST sim ngei lo lua mahmah in phum dingin hoihsa zaw ta ihi hiam? Ahih kei leh LST i sim ngei loh luat manin LST pen phum ding/hal ding peuh sa kha ihi ta hiam? cih zong ngaihsut huaipi khat ahi hi. Thu-um kici buangin khan nin/dik lo leh dik, a man leh a man lo khen thei nai lo i hih leh i thu-upna zong ei pawlpi mi ten i kingaihsut phat kik ding hong kisam ding hi.

Kha pen a man leh a man lo taang lai pek panin na om khin ahih manin thu-um ten i khentel theih ding pen i Khristian upna man leh man lo hong kize-etna zong hi kha ding a, tuu kineih a ngai tuu vun silhte pen tuu hilo hi cih lim takin i et phat sing kisam hi. Thusuak ngah pen omom lel ding a, thusuak bek i ki-uksak masa sak ding hilo-in LST leh Kha Siangtho pen i ki-uksak masak a, i kimakaihsak ding hi a, i puk hun ciangin i tha lakna ding leh i thangahna dingin i zat ding pen Khristiante ngeina hi zaw hi. John 15:7 ah “Kei tawh na kizop uh a, note sungah ka thu a om nak na deih khempeuh uh hong ngen le uhcin ka Pa’ minthan’na a kilangsak na hi ding hi,” na ci ahih manin LST/thu pen phum ding hilo hi cih kitel a, Jesu tawh kizom in eite sunga Thu a om ciangin i deih khempeuh ngen leng kingah ding hi kamciamna hong kipia khin zo ahih manin LST phum ding cih thusuak pen kha dik lo cih lim tamin kitel a, hong taang pempam hi.

Thusuak ngahte pen pawlpi mi ten i maisak a, siate leh makai ten deih takin a taihilh (rebuke) a, lam man a hilh/lak dinguh kisam lai ding hi. Thusuak man lo ngahte pen a hun lai-in i dal kei natna kilawhsawn (gangrene) bangin hong kizeelsuak pah ding hi. LST i sim nuam kei leh zong i phum liang sangin kem zaw in, i kep nuam kei leh zong a nei zo lote pia zaw mai ni.

Hih thupiang tawh kisai-in pawlpi leh min loin kuamah i kimawhsak ding leh kimawhsakna ding i kizon hun ding zong hi peuhmah lo hi. I gamtatna ciat i ki-et phat kul ta a, tuucingte leh tuute zong i mawhna kikim khin hi cih i phawk ding kisam hi. I pawlpi makaite leh thusuak ngahte mawhsak in pawlpi sung panin hawlkhia leng pawlpi thak khat hong kibeh ding hi cih kimu khol thei hi. (Tua bang ngaihsutna nei uh ahih phial leh zong dal ding hi lai hi). I tawm tawh teh in kipawlna leh pawlpi pen tam khin lua zo hi. Sia Do Khup in a la phuahna ah, “Kipawlna a tam luat zel leh maw sam gibing khenna ai ve…… Singlamteh tuibang i gawm na’ng hi Ciimnuai a piang Zo vontawite…” a cih ngaungau pen ngaihsut tham cing mahmah hi.

Kipawlna dang khat hong kibehlap ding dalna leh Singlamteh i ettehna ding leh Singlamteh ah i kipumkhat theihna dingin thusuak mute leh a kigolh siate pen i maisak ding hong kisam ding hi. A lam khialte lampi man hilh ding, thungetna tawh pattah ding pen thu-um kici khempeuhte tavuan ciat hi a, i siate bek tavuan hilo hi. Tua bangin a lam khialte lam man hilh in, thungetna tawh pangin LST mah bulphuh leng pawl kikhenkhenna om nawn lo ding a, LST mah sim tangtang zo leng LST phum, LST hal, tuk kawm a sisan naisan luang lianga kipei valval, guak tang-a laam, um leh beel, singkuang, bizu, TV leh blanket (zanpuan) sung khawng peuhah, “Dawi om hi, dawi lut hi.. hal kul ding kisam hi, na maineu tawh biakna na piak kul hi,” ci-a thusuak ngah cihte ki-om nawn lo ding a, Singlamteh ah tuibang kigawm leng pawl kikhenkhennate i Zogam ah hong bei ding a, khanglui ngeinate zui-in Pasian’ thupiakna palsat zawsop cihte hong bei ding a, thusuak bekbek ngah ding thupisakna hong bei-in vantung gam tunna ding ticket (Jesu) ngahna ding kithupi naihsut zaw ta ding hi. Jesu pen leenggui taktak hi a, Amah tawh kizom lote kisat khia in mei sungah kikhul ding hi cih i tel kim tek ding hi.

U Khuppu (Kyawkhine) in “Theology pa lo Theory bek tawh kal i suan sawm leh i lungmial ding a,tua mah bangin Theory pa loin Practical bek tawh kal i suan leh mikhua mu lote tawh i kilamdanna om lo kha ding hi. Tua ahih manin khimbang a zing hih leitung ah mi ten hong khem zawh loh nadingin MEIVAK i kisam hi,” a cih zong a ngaihsut tham ahi hi .

Gen khialh tampi tawh hunsak hi. Topa’ hong sinsak thugnetna (Lord’s Prayer) sunga “Ko tunga hong mawhte ka maisak bangun, Kote mawhna zong hong maisak ta in,” a ci kha khempeuh in gen khialh, gen valte hehpihna tawh hong maisak ta un. 😀

A hoih ding i deih luat man hi zaw hi. Khialhna lianpi tawh, Nong maisak manun lungdam hi.

“A PUK MITE I PHOT ZAWH KEI LEH ZONG A DING MITE A SAWNPAITE HIH SAWM KEI BEEK NI” Thang Khan Lian