USA gam, Oklahoma State, Tulsa khuapi a teng Pa Thang Lam Cin @ Cinpu, Kum 28 (Hatlang beh) in abeisa May 19, 2016 ni nitaklam nai 5:00pm hunin Gilsunglam damlohnatawh mual ong liamsanta cihthu izakmanin Zomi Innkuan USA kipawlna in nakpitakin kidahpih hi.
Pa Thang Lam Cin pen Zogam, Tedim uksung, Heilei khua ateng Pa Lian Za Kap leh Nu Dim Man Niang ten tapasal 6 leh tanumei 4 aneihna sungpanin a nautumpenzom hi-in nuntakkhuasakna anuamzawding lunggulhna tawh abeisa 2008 kum in USA gam ongtung ahihi. 2013 kumin a itmahmah azi Nu Cing Deih Dim tawh pumkhatsuakin PasianthuphaTanumei 2 ongnei uhhi.
Pa Thang Lam Cin te innkuanpen Tulsakhuapi bulphuh Zomite kipawlkhopna Zomi Innkuan Oklahoma ah pawlmi kiciankhat leh USA gambup Zomite sihnavaiah luangkiphamnadinga kiphuankhia ZIUSA Genvai kipawlnaah Florida Zomi Innkuan(USA) kipawlna tungtawnin October 2015 akipan Active member khat ongsuahna uhtawh kizui-in ZIUSA Genvai thukhun ombangin Pa Thang Lam Cin pen Zomi Innkuan USA kipawlna in USD 10,000.00 (Tulsawm) luangphamnadingin kipiakhiadinga Paakkual khattawhzong Mangphakhakna kinei dinghi. Hih akipiakkhiat luangphamna sumtepen USA gamsung muntuamtuampana ZIUSA Genvai thukhunpom pawlmi 7,000 valtekiangpana ongkhakkhop uh sumte ahihmanin Vaphual lungtang neia ZIUSA Genvai ah ma ongpangkhawm Zomipih khempeuhtungah idahna ilunglenna kawmkalpanin lungdamna lianpi iko hi.
I sanggampa Cinpu tawh a nunungpen hunzatkhopding pen ongtungding May 23, 2016 (Monday) ni sunnung 12:00pm hunin Tonu Maria Siangtho Lungtang Biakinn, 1541 E Newton Pl, Tulsa OK 74106 ah Rev. Fr. Robert Kimpu in Catholic pawlpi ngeinazui-in vaikhempeuh ong makaihdinga tuakhitciangin Calvary Cemetery, 9101 S. Harvard Ave, Tulsa, OK 74137 ah daitansakna/Vuina kineidinghi. Isanggampa Cinpu ongnusiatna hanga adah akap, alunglengkhuangai pianna nulehpa sanggamteng leh khuapihtuipih tanaumeltheih akuamapeuh adiakin a nusiat a itmahmah azi Nu Cing Deih Dim @ Dimlek leh a tanotegel tungah ibiak Vanglian Pasianin ong hehnepsaktek henla lungnoptawldamna ongguatsak kimciat tahen cihthu kongngetpih uhhi. Dahmahmah, lunglengmahmah hang ei.
Genbehna : Sihvuima hunsungteng nitaksimin anuai a Address ah hehnep hunbawlna kineidinghi.
Pa Singtawng te inn : 3112 E 79st St, Tulsa OK 74136
Dahpihna lianpitawh
Executive Committee
Zomi Innkuan USA, Inc.
May 20, 2016
Comment piaknop aomleh...