Kalaymyo zanvak thupha puak hopsawnna

Kalaymyo zanvak thupha puak hopsawnna (December 23, 2017)

(1) Tu kha bul a kipan a pawlpawlin Zanvak/Lungdamna thupuak (Carol singing) kinei ciat aa, a nunung pen te tunitak ciang dong kinei hi.

(2) Pawlpi a tamzawte in zanvak a neih bangun Khamtung lam leh zanggam pawlkhatte-ah sun thuphapuakna-in a zang zong hon khat ki om hi.

(3) ‘Pawlpi kimkhatte in lathak zang uh aa, kimkhatte in lalui hi ta leh lasak nuam te pawl zang uhin nopci mahmah hi.

(4) A tamzaw khangno leh naupang lam teng vak uh aa, pawlkhatte Sia leh Upa te’n zong zui ngiat uh hi.

(5) Thunget kikhel zel a om bangin mi khat in thunget a buplak zong om hi. Ki deidanna om lo cih dan lahna zong hi’n teh ci ing. (Gim bel gim kha thei ve uh).

(6) Tukum thuthak khat ah, Munlai Venpui Tuiphum, sanggam Falamte in zanvakna ah innteekte’ tung pan sum piasak lo aa, Pawlpi min tawh thupha puak/ Thupha hawmkhiatna-in kizang zaw hi, cih thu hoih kiza hi. Satpia namtui tang khat tek bek ahizongin kipia aa, innteekte’tung pan bangmah kisang lo hi, cih ettehhuai thuthak khat kiza hi.

(7) Agape A.G Pawlpite in zing ciangin silh-le-teen piakkhiat zawh bangbang biakinn ah kipuakin, kikhai ding aa, a nei zo lo diak teng in a deih dandan vua lak theh dingin kigeel hi, cih thu hoih kiza hi. Hih pen a beisa ah zong a zat ngei thu uh hih tuak aa, thupi kisa mahmah hi.

(8) Kum simin Thongkiate anvakna leh nekkhawm piakna hun aa a nei, thupha bawl zong pawlpi khenkhat om zel aa, thupi kisa mahmah hi.

(9) Hih hun pen biakna dangte in hong en thu uh leh hong hazaat phial thu hi aa,, ih hamphatna lianpi leh Pasian’ min tawh thu-um lo mite’ tungah na hoih sep khiat theihna hunlem khat i ngahna zong ahi hi, cih thu ih kiphawksak nuam hi.

(10) Lungdambawl leh Kum Thak nek-le-dawn tawh a la ding zong a munmun ah om ahih manin lungdam leh angtanpih mahmah hi hang. Vekpi hunnuam maw,

(Kihawm sawn ciat dih ni ei, no zong)

Happy Christmas & Happy New Year to you all!

Posted by; Peter Khampu.
C.Media, Kalaymyo