Kalaymyo thuthang pawlkhat

Kalaymyo thuthang pawlkhat

Dear All,
Kum Thak Cibai, ci-in akuama peuh hong hopih masa ing. Internet zat
loh kha nih val tangial hong sawt teh kicim mansim. Ka handset ah
phone lo buang kingah nawn lo ahih manin Nov.kha bul lam a kipan
internet en nawn lo ka hih manin tuasung a thupiang leh kuppih ding
kilawm a om leh kitheisiam ni. Zanin khuasung sai khat ah tu-in kong
khak sawm leh man pawlkhat ngah zo lo ka hih manin tuni’n hong sin kik
hi ing.

Dec.2014 kha lang pawl pan tuni dong Kalaymyo thuthang pawlkhat a
kihawmsawn nuam i hi hi. Na hunngah dan un lungduaitakin nong na
simsak ciat ta un, cih zong hong thum hi ing. Theiphak bat pak teng
hih a nuai a bang ahi hi.

1. AMC (Agape A.G)Kalaymyo pawlpite’ vaihawmna tawh Tapidaw Thu-um
mi khempeuh in Thungetna a zatkhip theih ding huanpi khat konghonna
pawi pen Dec.1st,week sungin thupitakin bawl uh a, Australia pan a
hong pai Pastor nupa khat in honna neihsak hi. Hih thungetna huan mun
pen Tai 9 BOC innnung teng hi a, tu-in buuk sawm val bang zo khin uh
a, thunget a pai om zelzel ta hi. A tawm pen buuk neuneu 20 leh mipi
kikhop hunbawl theih naidng hall pi khat lam sawm uh ahi hi.

2. Dec.14, 2014 (sunday) nitak, 10:00 PM hun pawlin a tuampian mahmah
a kigen thu khat ahi, “Sezau” Aksi tai sawm val vei om mawk ahih manin
a mukha sunsunte in lamdang kisa mahmah hi. Zanvak sanlaitak hi a, a
mu kawmkawm om hi. Kei zong innnung ah ka pailaktka hi a, a tungin
khatvei nih vei ciang a tai thei ngei zel mah ahih manin ci-in ka sim
kei a, hong kizop zop teh ka sim leh 11 vei ka sim thei hi. Ka tanu
carol singing pai leh a lawmte in zong guk vei bang ka mu man uh ci
ahih manin thu tuamsim in kigen hi.

3. 15/12/2014 nitakin Tg.Pum Cin Khai* (a) Zekhe (kum 32) Falcon
Band, Zomi sung, Kawlpi sak siahah Bass Guitar siam a minthang, a
diakdiakin Stage tung leh pawi lianpite ah ama guitar bass tum in mipi
lawpsuah mahmah leh la khui zong honpi khat ah a tum khin, i sanggampa
in hong nusia cih mi tampi in za zo dingin ki ummawh hi ing. Carol
singging pai a man khit uh ciangin inn ah ciah ding tung lo a, Tahan
A.G biakinn gei ah a dek a liam sa-in kimu a, zato a puak sawm uh leh
tua pan hong nusia cih kiza a, itpih dahpihna thu i pulak nuam hi.
Cycle taih hi’n teh cih kiza a, a telcian om lo dan hih tuak hi. A
khualui Limkhai, tulaitak omna Tahan & pawlpi Tahan A.G ahi hi.

MOPAWI LUNGDAMPIHNA:

4. Kalaymyo a teeng, Phunom khuami, (Pastor Suang Za Dal) Sia SuaDal
+ Nu Thang Nemte tapa, Tg.Ngin Khan Kim leh Pa Ngo Khan Dal + Nu Thang
Nem, Thangnuai te tanu, Lia Ciang Hau Nuam te in Ebenezer A.G, Hakha
khuapi ah, 20/12/2014 ni-in pumkhat suahna hun nei uh hi.

5. Pa Lang Sian Kam + Nu Dim Sian Man (Heilei, Kalaymyo) TEC
Boarding Home neite’ tapa nihna, Tg.Dr.Ngo Zam Thang (a) Thangtawng (2
yrs, MB,BS) Mandalay leh Pa Thang Khan Sing + Nu Niang Khaw Ciin
(Vangteh, Mandalay) te’ tanu, Lia Dr Zen Khan Dim (Dimlek) te in,
Jan,8, 2015 ni-in Emmanuel BC, Kalaymyo ah Revd Hau Go Kham tungtawnin
pumkhatsuahna nei uh hi. Mote geel siavuan ding hi a, moliahpa Dr.Mung
zong MB,BS zokhin sa khat ahih manin etlawm leh angtanhuai mahmah hi.

6. (Tua lo Lia Nutoih, Sim Suangzang, Zomi lasa siam, Yangon a
kibusa in zong Kalaymyo pan kumbei madiakin pasal nei ta cih thu kiza
hi. Gampua a om tangval pawlkhat in nungaklai na sak vua leh awng nawn
lo cih ding ahi hi. lungdampih hang).

LAMPI SIALNA TUAMTUAM PAWLKHAT:

7. Pa Do Cin Thang (Thangno) Zampi-Kalaymyo in Bulldozar JCB khat
hong nei thak a, Haiciim lampan Zampi lam teng lampi lim sial mahmah
cih kiza a, i khantohna khat ahi hi. Tuamah bangin H.Vum Nang in zong
tungsiah pan a ngahna dandanin limtak in tawlnga man lo liangin lampi
sial na ah mapang hi.

8. Kalaymyo khuasung lampi bawl pen tuknuai sung a khawl uh kumbeima
khuahun nop deuh a kipan kipan kik a, tulaitak Mulai khuasung ah lampi
nih feet 1500 pawl tuak a bawlsan laitak uh hi a, tua man leh Tat Oo
Thida 2, Leipi veeng (komau veeng) ah hong zom ding uh ahih manin
kilawm khol mahmah hi.

DAHPIHNA PAWLKHAT ABAN:

9. Nunga Lungdambawl kuantengin piteek puteek leh natna gil nei
pawlkhat in mual hong liamsan uhi. A masa in Pa Am Khan Thang (kum 78)
Pastor Ngaih Lun (Emm.BC) pianna pa in hong nuasia a, tua zom ah Revd
Zam Khan Khum, Youth Pastor, Phualpi A.G & Pa Nangno (Thazin hausa) te
pa, Pa Sawl Dah Cin (a) Senta (Kum 76) in hong nusia leuleu hi. Tua
zom ah lungdambawl tawh kituak in Nu Vung (a minpi theivat lo) Kum 65,
Sitni Lian Za Kam’ i zi in hong nuasia leuleu a, tuhun sung mahin Revd
Pum Za Kap (Galilee A.G) pianna nu, Pi Cing (kum 79) pawl in hong
nusia leuleu hi. Amun dang ah zong om thei maitak.

Tu kum thaksung ah Pa Dam Cin Thang R.C (kum 75) Tungzang-Kalaymyo in
Paangpi veeng, Lamzikpi tungah a inn uh pan hong nusia a, tua hunsung
mahin Tg.Go Lian Lal* (Kum 32) Sunghoih-Kalaymyo, Phualpi A.G in puk
vatin hong nusia ziau hi. Zanhal ni-in Pa Thang Khen (Kum 55)
Seitual-Kalaymyo, Myothit BC in sumlam damlohna tawh hong nusia leuleu
a, tuni-in kivui hi. (Veeng dangdangte kitheihpih kim lo hi).

GAMDAG PAN HONG CIAH ZOMI PAWLKHATTE’ HUNNEIHZIA:

10. Pa Khup Sian Lian (a) Sian Lian (Revd Mang Cin Thang, Kalaymyo)
leh Nu Cing Khan Mang te’ tapate innkuan (FL, USA) panin Kawlpi a Nu’
kiang November khabei lamin hong hawh uh a, Biakinn pawlkhat ah Pasian
thugenna hun manpha tak nei thei kawikawi hi. A lamdang khat ah a nu
cina, lamet bei in zato ah thu a ngetsak laitak in, “Topa, hih ka Nu”
ci a a lawh laitak in KST in hopih vat a, ka Nu ci kei in, Ka Tanu ci
in, ci-in hopihna ngah a, tua kammal a zat khit a thunget sung mahin a
Nu Zeisu in a tonpihna pai nusia kik a, tuni tan a nu hong damna pen
tetti pang kawikawi a, Pasian’ nasepna lamdangpi khat mukha hi.
Pasian’ nasem khat zahin Pasian in hong zatsak a suak hi.

11. Tg.Billy Zam Heh Pau (a) Sia Billy Pauno (Saipimual-England,
U.K) November kha bullamin Kawlgam hong ciah a, meltheih tanau kiang
kawm a hih hangin a hun ngah simin pawlpi tuamtuam in samin hunzatna
leh tetti pannate nei kawikawi in Pasian in a munmun ah hong zatsak
cih kik za hi. ZBC, Tahan Pawlpi, Agape Zomi BC, Bethsaida A.G, Cikha
Tuiphuam pawlpi leh Bethel ZBC pawlpi leh a dang pawlkhat te ah nipi
ni zingsang hun zang kawikawi hi. Sia Pauno pen tagah dinmun pan
khangkhia khat hi a, Pasian thupisak ngiat in, tua pan khua-le-tui leh
minam a vei ngiat khat ahi hi. ZCD leh ZYA zum ah hawh ding zong a gen
thapai a pai man nai lo bek hih tuak hi. A sangkah lai, laipil sim
pawlkht hi a, Tan 10 zawh teh ZTC Falam ah, tua pan MIT Yangon ah
M.Div zawh khit teh gamdang ah nasep kawmin Pasian’ nasep maban a zom
khat ahi hi. Amah tangval lai a, koppih ding Pasian’ kiang ah a nget
san laitak ahi hi. Pasian’ thupha motor thak khat tawh zong hong ciah
a, amah pen U.K lam zuan kik ding ahih manin thungetna ah phawkpih
ciat dih ni ei.

12. Revd Pau Khan Khai (Sia Pau Khai) zong a Pawlpite vaan ding,
Zosiam maban zom ding leh vai 2/3 thuah din kum bei lamin Kawlgam hong
ciah a, Kum Thak pen Bethel ZBC, a pawlpi ah Bawngtalpi khat tawh
la-in mipi vaak hi. Tua panin tunipi sung Jan.13-15, 2015 sungteng
ZOSIAM Gopel Trip pen Heilei leh Suangzang bulphuh in a group teng
tawh paito uh a, lawhcing mahmah uh cih kiza hi. Khuakim-khuapam panin
cina mi tampitak pai a, nitaksim Pasian’ thu tangkona nei den uh ahi
hi. Nasem manphatak ahih manin manbante thungetna tawh phawkpih ciat
ni. Tuni mahmah in zong ZYA kum 10 cin pawi ah Hanthotna hun thupitak
hong zang a, thupi kisa tekin tha kingah mahmah ciat hi. Thai teh ding
kik-in mai nipikuan ah USA lam zuan kik ding geelna nei hi.

13. Zomi sungah Laphuak leh lasa siam i neih honkhatte’ sungah khat
ahi, VCMang zong USA Zomite’ omna pawlkhat ah hun hong neih kawikawi
khit ciangin kum bei ma-in Kalaymyo hong tung kik ta hi. Tuamah bangin
Australia ah khatvei a paicilna ahi, Revd Tuan Suan Thang (a) Thangno
(Agape Lasa masa pawl) Phualpi A.G, Kalaymyo ah Seinior Pastor zong a
Visa ngah bang lian mahin inn lam hong zuan kik ahih manin thupi kasa
hi. Hih a tunga siate geel bang mah in gamdang pai lai dingte in zong
kumpi tung leh Embassy tungah nong thuman tek ding uh thupi ding ahi
hi. Tua hi lo-in omsuak keei mawk le uh teh pen gamdang hong pailai
dingte’ a dingin hamsatna tampi om ding hi, cih i kihanthawn kawm nuam
hi.

14. Pa Hang Khan Lian (Singapore) a innteek mahmah khin zong Kawlgam
hong ciah ah tu-in Tedim ah om a, khuanu-khuapate khalum tuam mahmah
uh, cih thu kiza hi. Amah pen hong ciah sawt kik khin zo ta hih tuak.

KALAYMYO (NO.3) SHS – GOLDEN JUBILEE KIBAWL DING:

15. No.3 SHS Kalay (St.Mary) sangpite in (Kum 50) cinna, Golden
Jubilee Pawipi nasatakin bawl sawm uh hi. Zanitak panin lasakna leh
hun tuamtuam kipan uh a, zing ciang Jan. 18, 2015 ni-in Jubilee
service bawlna hun thupitakin neih sawm uh a, sang zumpi lam leh ulian
lampanin mi lianpipi zong sam uh cih kiza hi. Hih sangah sangkah a
tamzaw thamthamte pen eimi vive mah hi denden uh ahih manin eima sang
zong kici thei ding ahi hi. Hih sangah sang board makaipite lakah U
Pum Za Kam (Laitui-Kalaymyo) zong kihel a, deihsakna nei-in sang
khantohna tampi kimu khia thei ahi hi.

ZYA (KUM 10) CINNA, TIN JUBILEE KIBAWL:

16. ZYA, Kalay kiphuh zawh kum 10 cina pen tuni ahi hi. ZYA Kalay
innteeksepna tawh ZYA omna khua tuamtuam pan makaipite samin mipite
tawh Bethel ZBC, Kalaymyo ah tu ni, 17/01/2015 (1:30-5:00 PM) sung hun
nuamtakin kizang thei hi. Makaipidiak teng in thugenna leh report
piakna tuamtuam hong nei a, Revd Pau Khan Khai (a) Sia Pau Khai in
hanthotna hun thupitak hong zang a, thupi thei mahmah leh thangahhuai
thei mahmah kisa ciat hi. Hun man ciangin innteek pawlpi, Bethel ZBC
te in mipi vaakna ding a a na gawh uh, bawngsa hunseu kine a, innlam
kizuan ciat hi. (hih tawh kisai ZYA lam pan report kician hong pia
nuam kha ngel ding uh lamen ka hih manin hiteng i kizasak ding a, a
thu dangdangte a siitsak i hi hi).

17. ZCLS, E.C Meeting zong ka internet hoih loh manin hong zasak thei
nai keng in a tom takin a kihawmsawn pak hi ni.

Nov.18-19, 2014 ni-in a (53) veina ZCLS E.C meeting pen ZCLS, Museum
innpi sungah thupitakin kinei thei hi. ZCLS tawh kizom kipawlna
tuamtuam leh local pawlpite panin tangpi sehtan pia-in meeting kipai
hi. Annekna leh giahna pen Galilee A.G biakinn kizang hi.

Tua hunsung a kikupte’ sungah maikum 2015 ciangin Lamka lam a om,
Lailam kipawlnate tawh Zolai Seminar kiciantak Kawlgam ah neih ding
cih thu lehZCLS min twah Khuado pawi limtak a bawl ding cihte a kipan
thu manpha dangdang pawlkhat om lai, kidam zaksak to zel ding hi hang.

A lungdamhuai khat ah ZCLS Website zong Malaysia a om Sia Khaipi (SDA)
in hong bawlsak khin a, lungdamna lianpi om hi, cih i kizasak nuam hi.
A minte leh gen dinga kilawm pawlkhat kong dam zaksak lai ding uh hi.

CHRISTMAS & NEW YEAR BAWLDAN PAWLKHAT (Kalaymyo):-

19. Kalaymyo ah Lungdambawl zanvak zong kizom zel a, sunvak tawh a
thuah zong om ahi hi. Zomite omna pawlpi khempeuh phial in ahih leh
lungdambawl api ni 25 ni bek mah kizang a sanggam Mizo lakah pawlpi
tampite in Christmas ni 2 om, Dec.24-25 zang uh a, Kum Thak na ngawn
ni 2 a zang om ahi hi. Zeisu suahna limla bawngbuk te bawlin,
pulpitte leh biakinn kimte limtakin zeem uh a, a veeng sung lamgolpite
tungah Zeisu suah Lungdamna thu tangkona laipite, lampi tung kantanin
suang uh a, mipi lungsim latuam mahmah ahi hi.

Nek-le-taak (Sa-luang) tawh Pawi a la theihkhak teng:-

(1) Pa Lian Ngaih Kap (a) Pa Kap, Zomi electronics saipa + Nu Hau
Ngaih Huai (Galilee A.G) te innkuan in Bawng nih leh vok khat tawh GAG
ah Lungdambawi pawi la uh hi.

(2) Pa Zam Khan Siing (US) pan hong ciahte in Emmanuel BC pawlpi ah
Bawng nih leh vok nih tawh Lungdambawl pawi la uh hi.

(3) Pa Khan Za Dal te innkuan in Belthel ZBC ah Lungdambawl la uh hi.

(4) Pa Hau Za Paute innkuan in Phualpi A.G ah Lungdambawl la uh hi.

(5) Tahan ZBC ah zong a upa pa uh, Pa Shalom Khaite innkuan in vok
tal golpi khat tawh Lungdambawl pawi la uh hi.

(6) Myothit Tuiphum pawlpi ah Pa Dong San te innkuan in vok golpi
tawh Lungdambawl pai la uh hi.

(7) Munlai AG pawlpi ah Pa Dal Do Lian te innkuan in Lungdambawl la uh hi.

(8) Fuller Mission Center (Fulller AG) pawlpi ah a pawlpi mi uh ahi,
Pazan sia, Kawlte innkuan khat in Ks.12 lakh zang in mipi vaak zihziah
hi. Hihte innkuan in kum tamsim kizawpin lakhin zo uh a, Kawlte Pasian
a it ngial te ettehhuai cih thu i mu hi.

Tua lo mimal leh innkuan in a bup in a lak zawh loh uh hangin a lang
bang a sik, cih a mun mun ah om a, tua lote Pawlpi min tawh kibawl ahi
hi.

Agape AG te in a Unit zui-in a veengveeng ah bawl uh a, a kumkumin a
la ding kiseh zel uh, kipia khia zel uh ahi hi. Unit H veeng, Leipi
veengte pen Sia Pau Go Mung (Tamu ah District sazian sit makai) te
innkuan in vok khat tawh hong la uh a, nuam kisa khop mahmah lel hi. A
tuampian diakna khat ah, hih Unit H te in Lungdambawl ni sunin Motor 3
tawh pawlpi mite omkhawlna mun 9 ah motor thum dimin vak kawikawi in
lungdamna thupuana khat nei uh a, soklek bawm golpipi hawmkhiat na nei
zel uh a, nasep hoih khat in ki mu a, maikum lam ah a zat sawm om tuak
ta hi.

KUM THAK dawndan tawh kisai in ahih leh bel pawlpi a tamzawte in nekna
-dawnna tawh kitam bawl khol lo zaw a, limtak a a hahbawl zo pawl zong
bel om zel i hih manin lungdamhuai kasa hi. Phawkpak teng ah Galilee
A.G pawlpi ah Pa Kham Lian Khai (Myodawvuan) te innkuan in bawng talpi
nih tawh kumthak dawn nan piakhia uh hi. Tahan ZBC pawlpi ah Pa Neng
Khan Pau te innkuan in vok khat tawh Kum thak pawlpi mite vaak uh hi.
Bethel ZBC pawlpi ah den a i gen lepvat ahi, Sia Pau Khai te innkuan
in bawng khat tawh la uh hi. Myathit BC leh a dang pawlpi pawlkhat ah
zong a la om tuak, cih ciang a gen thei hi phot ni.

NB: Photo tawmlai zong hong khak ing.Khialhna a om leh ngaihdam aw le.
Sai ten khak nuam ta uh, check kik man nawn keng ei. Laisim teng
tungah lungdam.

Deihsakna tawh,

Peter Khampu