Yangon Region sungah nikhatsung in mei 7 veitak kang

Yangon Region sungah nikhatsung in mei 7 veitak kang

Nungkal Friday (Feb 23) ni in Yangon Region sung muntuamtuam ah meikang omkawikawi in, nikhatsung bekbekin meikang akigawm in 7 vei om cih Myanmar Fire Services Department te’n genkhia uhhi.

Tua meikatna te hangin mipite omna inn leh innsung vanzat Property tampi mei kangtumgawp hi. Asi kuamah kizalo a, ahi zongin mikhatliam kici hi.

Tua meikatna tepen North Dagon Township, Twantay Township, Mingaladon Township, Mayangon Township, Thingangyun Township, Sanchaung Township, Shwepyithar Township cihbang Township tuamtuam ah meikang aomkawikawi ahihi.

North Dagon ah meikangpen zingsanglam 6am hunpawl in akang kici hi. Fire Services Department te’n meiphelhding in meiphelh mawtaw Fire Engines 31 delhsakpah uh a, tawmveisung in meikuang phelhsiangzo uhhi.

Ahi zongin North Dagon meikatna hangin singinn akigawm in 35 meikanggawp a, mi 155 bang innneilo “Homeless” dinmun tungziau uhhi.

Video: Dagon Myothit sungah mei akat laitak

Hih North Dagon meikat akipatna innpen kitheikhia a, innteekpa pen polhtehna, gitnat lohna hang ahih manin, matthuak pahhi.

Twantay Township meikatna pen datsi, zinan kepna “Petroleum Storage Facility” panin meikuang akipan ci a, meikatna hangin asia tammahmah kici hi. Mikhatzong liam a, mawtaw zong tampi meikang cihi.

Adang Township tuamtuam ah meikatna tepen huaisia luapi hisamlo a, ahi zongin pawlkhat mei akatkhit ciangin ki phelhsiang theipan hi.

More: Yangon, Thingangyun aom puanbawlna setzung khat meikang, Kyat Thein 7000 kangtum

Tukum January khakhatsung bekbek inzong Yangon Region sungah meikatna 28 veibang omkhin hi ci’n Fire Services Department te’n genkhia uhhi. Tualakah ahuaisiapen ahihleh Hlaingthaya Township sungah meikatna pen huaisia phadiak hi. Tua meikatna hangin pasal khatin sihlawh a, numei 2 in liamlawh hi. Inn bekbek akigawm in 80 tak meikangtum in, mi 350 bangin innneilo “Homeless” dinmun tunlawhziau uhhi. Sawltak #zomidaily