Kalaymyo Dahna-le-Nopna pawlkhat (May 26, 2015 Update)

Kalaymyo Dahna-le-Nopna pawlkhat (May 26, 2015 Update)

Dear All,
Kalaymyo khuasung Dahna-le-Nopna i phawk pak teng a kihawmsawn i hi ding hi.

DAHPIHNA:-

1. May 20, 2015 nitaklamin Gamlai Tuiphum Biakinn lam nasem ahi, Tg.Noel Mang Khup (kum 20), (Revd Khaat Khaw Gin) tupa, Pa Kham Za Pau’ tapa neu zaw in biakinn tungkhum, pi 18 na pan kiasuakin hong nusia hi. A kiat tungin sipah lo-in khuaphawk nawn lo hi. A bil, a kam leh a zun ah si paipai a, Tedim zato a puak, zato kong a tun lian ciangin a laitat lian se ci uh hi. Lamkal pan a motor uh kisia sawnsawn a, nitak lam, a zanzanin Gamlai ah puak uh a, a thai teh, May 22, 2015 ni-in sihvuina nei uh cih thu kiza hi. Khasiat huai mahmah ee. Ama pian kum 20 nih cin ni lian mah a hong nusia ci uh hi. A damlaite’ ading thungetna tawh phawk pih ciat hi.

2. Pi Ning Ngaih Ciin (kum 85) Anlang khuasuak, Kalaymyo, SDA Conference pawlpi a om i pi in May 23, 2015 Pm.3:00 hunin hong nusia a, 25 ni-in dai tang sak uh hi.

3. Pa Neng Khen Khup (kum 51) khualui Haupi, omna, Seihkantha veeng, Pinlong BC in May 24, 2015 ni-in sung lam damlohna tawh hong nusia a, 25 ni-in dai kitangsak hi.

4. Pa Vum Khaw Thang (kum 79) khualui Tonzang, omna Tatoo thida veeng, Leipi BC, Video zaih & Editing a sem, Tg.Muan Sang pa in May 25, 2015 Pm.11 hunin hong nusia hi. Amah tuni 27 Pm.2:00 hunin sihvui hunbawlna nei uh hi.

5. Pa Dal Za Suan (kum 64) khualui Haupi, omna Tuitum veeng, Leipi BC in May 25, 2015 ni-in hong nusia a, tuni Pm.4:00 ah sihvui hunbawlna nei ding uh hi.

6. Pa Lian Khan Kap (kum 62) khualui Luangel, omna Tahan Mizo veeng, Fuller Mission Center pawlpi in May 26, 2015 Pm.3:00 hunin hong nusia a, zing teh May 28, 2015 (Thursday) Am.12:00 hunin sihvui hunbawlna kinei ding hi.

NB: (Hih a tunga misi teng pen nana gil a nei ngei uh ahih manin tulaitak nisa khualum thuaklah lua phadiak te hi uh a, tua hangin zong manlang uh hi leh kilawm hi. Dah-le-kapte’ a ding thungetna tawh phawkpih ciat ni).

MOPAWI LUNGDAMPIHNA:-

1. Tg.Pau Suan Zam (Zampu) M.Div. APTS, Baguio City, Philippines, Revd Tuan Suan Dal leh Nu Niang Khaw Ciin, AMC, Kalaymyo te’ tapa leh Lia Ning Hau Niang (Niangnu) B.Sc. Pa Nang Za Tuang leh Nu Mangte’ tanu upen (khualui Gamlai) te in May 22, 2015 Am.8:00 hunin AMC biakinn, Kalaymyo ah Revd Go Za Nang’ tungtawnin pumkhatsuahna nei uh hi. (A Photo te pawlkhat zong kong khak hi).

2. Pa Tuan Thangte (Gamlai, AMC, Kalay)te’ tapa, Tg. Cinpi Chicago, USA leh Lia Muan Cing, Pa khupsan (Gamlai, AMC, kalay) te tanute in May 19, 2015 (tuesday) ni-in AMC biakinn ah Revd Daniel Khen’ tungtawnin pumkhat suahna nei uh hi.

Hih a tunga Mopawi kop nih te geel leh Gamlai biakinn lamna pan hong nusia pen Gamlai khua mite vive hi uh a, tukal pen gamlai week twah kibang ci-in lasa siam Lia Zambawi in Mopawi la a sak maleep in gen hi.

Thudang te hong gelh man nawn keng, damin ci ni. Lai sim mimal tungah lungdam.

Peter Khampu
CMedia, Kalay