Kaal Thum Sung U.S.A. ah ~ Pu Zokhai

Kaal Thum Sung U.S.A. ah ~ Pu Zokhai

Ka’ pianna Zuapa’ minsel Tg. Vungh Zaleen Maang leh Lia Kim Hau Cing te’ thusiamna-tawh 2015 August 03 ni-in Melbourne Vaanleengtual-ah hongkha Pa Pau Kaang, Pa Mungpi leh Tg. Sian te-tawh khut kivaan-in security checkpoint ka-kaantan suk-a, gualgen vaangthang America zuatding lawpliing litlit kawm-in ka-tuan nading Boeing 767 vaanleeng tung-ah ka-luut suak-hi. Vaanleeng akia amang a-om zeuhzeuh-tawh ngaihsut hongtam sim veve-a, tua-in Pasian-tawh hong kinaai sak ahihman-in thupha khat hongsuak-hi.

Vaanlaai-ah nai 16 sung ka-leen khit-uh ciang-in Los Angeles (LA) Gamcinnamzil Vaanleengtual (International Airport) tung-in, United Airlines Terminal ka-kanleh ka’ pusuakna pan-a agamla penpen Terminal 7 nahi ahihman-in khe-tawh paiphei kheukheu-in kiimlehpaam silhoihte video ka-la pheiphei-hi. Terminal 7, Gate 75-ah luut-in Boeing 777-tawh Newark NY Vaanleengtual ciangdong nai 5.20 sung ka-leeng leuleu-hi. Tualaai pan-in mi 40 khawngbek apua vaanleeng aneu lingleng khat-tawh Buffalo NY nai 1 vaaldeuh ka-leengphei leuleu-hi.

Buffalo Khuapi-ah:

Buffalo vaanleengtual-ah Buffalo Zomi Innkuan makaai upateng, Zomi Christian Church upapite leh Leenpi te nupa leh Pi Ciang te nuta teng-in mawtaw nihtak-tawh hongmuak uh-a, gim leh tawlteng hong dawnsiang uhhi. Khuahun lum mahmah-a, Melbourne-a phalbi vuuksan-tawh kilehbulh ahihman-in vanzaáng mahmah-hi. Hihzah ciang nangawn-tawh U.S. pai-taak veh-e, ci-in ka-angtang mahmah-hi.

Ka’ zintun nading Siamah Luun ci uh-a, ka’ kancian ciang-in tuma kum 25 kiimpawl-a Laaitui-ah Cidamna lamsang siampi hongseem Siamah Zaam Za Dim’ tanu hi-in, neulawm thamlo ka’ panote innkuan-tawh thalloh-a akimante nana-hi sawnsawn-a, inntung mahbang-in khamuang tak-in ka-tualbial thei-hi. Ka’ zinpite nupa Luun leh Pa Khup-in inn alei-thak hi-a, kha-khat ciang-in 400 vaaldeuhbek pia-cih ka-theih ciang-in inn-lah hoih, huanglah zai; lamdang kasa mahmah-a, ka-angtanpih mahmah-hi.

Tungtuúng mah-in vaaidang akihawm ma-in Tg. Thang Kaap Tuang (ka-thongkiatpih tangvaal)-tawh bawhlung kava kimawl uh-a, Karen te-tawh kahih man-uh’n kei mi-thak giltui kiukeu ci-uh hiding hiven, hongpia nuamlo uhhi, ahizong-in aleengkhial pang-in khua-ul suak veve hehehehee. Tg. Kap Tuang-pen Khalkha lamte-in zotsiam-uh ahihman leh Zomi khangno club bawlkhop nading mi akicinloh ziak-in Chin United Soccer Club aphut leh a-Coach aseem hi-a, akhangno mahmah-tawh kituak-in alungduai leh avaaihawmsiam mahmah khat nana-hi se-hi. Kei’ hawhding ziak-in vacation (leave) ana la-khol hi-a, hong giakpih den-hi. Ka’ nih-un iphone khattuak-tawh ihmutma 8 pool kimawl kawm-in, “Semanyih Camp-a I-lupkhop laai-in iphone khattuak-tawh akimawl khawmding mang-inzong kiman ngeikei ve-aw maw,..” ci-in ka-nuui luahluah uhhi.

Buffalo-ah Zomi tam lualo himahleh kei’ ading-in kicing mahmah uh-a, ka’ zinpi nangawn-ah tualbial manlo liang-in ankuang uumpih kithatheek/matlehzet-in kizomto-hi. ZCC Makaaipa Sia Pau te innkuan, upapipa Pa Pau te innkuan, Zomi Innkuan Buffalo (ZIB) Makaaipipa Pu SB Mung, Thuzeekpipa Pa Sawm Tun, ZIC Upapipa Pa Mang te innkuan, ZIB Thuzeek-huh or Lai-atpi Nu Luun (Sia Kaam Mung’ tanu: neulaai-a unau bang-a kithuahpih), lasasiam-a CD-zong abawlkhia Tg. SL. Mang te-in ankuang hong uumpih baan-ah Siamah Cing (Ngai Zen Cing: bawhlung siam mahmah Pa Cii-Mang’ unu)-a kipan unau holim-a hong holimpih kitawlnga lo-in mipi hong suaksak uh-a, nuam kasa mahmah-hi. Tua thamlo-in sanggamnu Dr. Maan Hau Cing zong-tawh lamet hetlohpi holim-in ciamnuui khawm-thei kahih man-in tuiphih pai kisa-in hampha ka-kisa mahmah-hi. Tua baan-ah Dr. Suanpi (Cope Suan Pau) zong-tawh kituak kha-in holim hunsawt ka-neihloh hang-uh’n kimuak kiho man veve-in tuahpha ka-kisa mahmah-hi.

Mopipa Lenpi, Tg. Kaap Tuang leh Pa Pau (ZCC Upapipa) te pata-tawh gualgen vaangthang Niagara Tuizeeupi-zong kava en thei-a, “Pasian’ silbawl lamdang taktak mah-ei maw,” ci-in Pasian’ khutma ka-phat thei-hi. Tuizeeupi-pen Canada-tawh gamgi hi-a, America leh Canada amau’ lamkaai ciat pan-in munhoih bawl-a kumpi sumluutna naakpi/zungpi khat-a aneihtuak-uh ahihi. America lam-a tuileeng atuangte-in vaanmeel tuipuan ka-silh uh-a, Canada lamkaai-a tuileeng atuangte-in tuipuan sandaang silh zihziah uhhi.

Tuizeeupi nuai ciangdong tuileeng paito-a, hongloklua leh tuikhu sahlua ahihman-in video-zong hoihtak kila theilo-hi. Tuizeeupi-pen Meitei Guunpi-a tuiluang’ zah 20 bang phading-a, tuazah tui lianpi zeeu khat-ah atuaksuk zuaizuai ahihi. Phalbi hunsung tua tuituak-pen khalsuk biubeu-in kaaisuk hiahua ci uh-a, muhnop-huai mahmah kaanlaai-hi. Niagara Tuizeeupi America lam adeek-a Paak-huan sung-ah daatmei bawlkhia masapa’ siikngo milimpi kikoih-a, tua-tawh maan ka-kila thei-hi.

Koteng-mah vok ava-khaamkhol ding-in ka-pai uh-a, vok khawina phual-a aneipa puteek khiimkhiam hi-in Tg. Kaap Tuang te-tawh nana-kimeeltheih mahmahlua ahihman-in a-uut-uut-in hopih uh-a, tua puteekpa bang-in “fak yu” ci-in nuui thiimthiam lelmawk-hi. Vokneipa dik peuhmah ahihman-in huansung losung paina mawtaw neu aneih-pen ka-uut bang-uh’n ka-hawl ziahziah uhhi. Vok-pen AUS-ah 400 kiim-tawh akilei tepawl 200 kiim-in kilei-a, vok laakna phual-zong khuasung-mah hi-in, minute 25 khawngbek kipai-in vaaisiang peuhmah-hi.

Mopawi: 8 Aug 2015 ni-in ZCC Makaaipipa’ hungeelna-tawh mopawi nuamtak-in kabawl thei uh-a, nupa-kaal kilem nading, kip nading leh thupha ngah nading hun tomno zangh-in “Pu” hihna-tawh nupate thupha piakna ka-nei thei-hi. Mopawi etlawm ding-in ka’ zinpinu leh Nu Cing (Pa Maang’ zii) te nutateng mah mapang-in mopawi bawlna nopci mahmah-a, hong uap-zong tam mahmah-hi. Chicago pan-in Tg. Michael Tuang, Pa Tung Thang leh Pa Tuah Mang te ahizong-in, Oklahoma man-in Tg. Tual Khup leh Nu Luunseek ahizong-in, Massachusetts pan-in Pa Tup Tung te innkuan, Pa Thang Pau’ tapa leh Pa Khup (Dimpi) te innkuan ahizong-in hong uap ciat uh-a, Mopipa leh Monu thamlo kei mahmah-zong mipi tangtuam kisa-in ka-angtang mahmah-hi.

Nipini ziingsang ciang-in Sia Pau (ZCC Makaaipipa) leh upate’ thusiamna mah-tawh biakpiakna hunpi ka-zangh thei-a, “Pasian’ thu leh Ngeina, Zongeina” tungtaang tomno suutna ka-nei thei-hi. Hun hongpia-bek hilo-in citpiak hongpia khiankhian laailaai uh-a, pastor-bang ka-kisa liang-hi. Nitaak ciang-in gualgen vaangthang khatmah ahi Gaalpi laai-a Gaalkaap Tuileeng a-omlaai etding ka-kikum uh-a, “luutman khangcing khat $10 hi-in, nai 6pm-a kongpi kikhaak,..” cihthu akician ahihi. “Paisuk pongpong ni-in, apua lampan video la lelni” ci-in ka-paisuk uhleh Pasian’ nasepna lamdang kiaukiau mahmah-a, kongpi kihong laai thamlo-in an akhawnkhong-in kivaak zawlaai., lasasiam Tg. SL. Mang gilkial simsim-in nana-ne ziahziah, hehehehee.

Kum 100 vaal ahaam khinsa English te’ khutma mawkbel tuni ciangdong-mah akip akho giipgiap laai ahihlam mitmuh himai! Tua hun-a azat-uh machine-gun leh Navy meetpite kava zawt hialhial thei-a, gaal thahna cihsaam hang-in atuate’ ziak mah-a tuni tanpha leitung-ah power lianpen aneihna-uh ci-in phawkna lianpi-tawh ka-baan et-hi.

Hihbangteng-tawh kaal-khat hongcing to-a, tua sung-in Pa Dal Khan Tuang (Dal Tuang: Columbia), Tg. Lian Khua Za Tuang (Michael Tuang: Chicago) leh Tg. Gin Tup Lian (Tup Lian: Chicago) te’ vaaihawm siamna-tawh khual zinkual ka-kipan thei-hi.

Phoenix: Arizona State

11/08/2015 ni-in Buffalo NY pan-in Philadelphia-ah leengphei, nai 1 sung tawlngak khitteh Phoenix zuan-a leeng leuleu, Sehneel Pingpei om photphot ahihman-in Tucson Vaanleengtual-ah nai 2 sungkhawng khawl: Tucson Vaanleengtual-pen Gaalkaap Vaanleengtual ahitam ci-ing, gaal vaanleeng F-16 leh Bom khiatna vaanleeng vive dimto zihziah-a, tuateng bekbek nangawn kimuan-thamcing himawk ci-in nasia kasa mahmah-hi. Hihteng ka-muh nading-a Pasian-in hong geelsak ci-in ka-lungdam zawsop-hi. Nai 2 khit ciang Phoenix zuan-in ka-leengphei leuleu-hi. Vaanleengtual-ah ka’ U Khual (Pa En Khan Khual) te innkuan-in hongdawn uhhi. Arizona State-pen sehneel gamkeu hinapi-in Phoenix Khuapi bangpen liat cihtakmah-in lian-a, zai cihtakmah-in zai-hi.

Phoenix ka’ tunni nitaak-in Zomi Innkuan makaai upate’ vaaihawm siamna-tawh Nu Don te’ inn-ah muakna holimna hong neihpih uh-a, innteeknu Nu Don-in neekding anlim nono hongluui-hi. Zomi Innkuan makaaipi Pa Hau Mung-in hunzeek-in, Pa Tuang Mung-tawh hong kikop uh-a, “…… khansau tahen,” ci-in thupha hongpia uhhi. Nu Don-pen kei’n ka-tel nawnloh hang-in Malaysia-ah ka-huh ngei khat ci-in mipi’ maai-ah lungdam hongko giap nupi piicing khat ahihi. Nu Don-in khitui luangliang-in lungdam hongkoh ciang-in ka’ gei-ah Sia Pau (Pu Nok Suan Lian’ tapa: Lamka ka-om laai-a Zomi Council President aseem)’ kiang-ah, “… adang kua-te koi-ah om uhhiam? Acihbang phawkliang hang-e,” ci-in ka-nuui uhhi.

Pa Hau Mung-in kei’ ading sumdon hongphuang-a, ka’ maai sa lela-in kaki-zawt phuanphuan-hi. Tualaai-ah lamet hetloh Aizawl, Mizoram ka-om laai-a ka’ lawmhoih khat ahi David (Do Pheeng)-zong nana om-a, Kawlpi saangkahpih Pa Thangpu-zong nana om-hi. Paitaak sa-in, ka-angtang mahmah-hi. Ziingciang Grand Canyon etding hong zol-uh himahleh ka’ U Khual te innkuan-tawh hunnuam zatkhoploh kum 18 bang hita ahihman-in uutpipi-in ka-nolh-hi.

Aziingciang U Khual te innkuan-tawh hunnuam zatding ka-geel himahleh ka’ thawhma-in Pa Hau Mung hong tungkhin ahihman-in amah leh Pa Tuang Mung-tawh Gualnam Mike-tawh suunthapaai holim-in, nitaak anding Pa Hau Mung-in tuipi sameh leh Pa Tuang Mung-in KFC lomtang khat: hihteng ne ngeingai-in ka’ hun-uh hongbei-hi. Lawmte-zong phone ginnawh pianpian-in zaan 12 hongkhen ciang-in innlam vazuan uh-a, hun ka-hawmthawh mahmah uhhi. Ahizong-in visa-pen zaankim 12 ciangbek ngah tek-uh ahihman-in ka-kikhen uhhi.

Portland: Oregon State

13/08/2015 ziingsang ciang-in Malaysia-ah ka’ nau (Pa Suum: Pian Suum)-tawh naseem-khawm Pa Pau leh ka’ U Khual te innkuan-in vaanleengtual hongkha leuleu uhhi. Vaanleeng direct omlo-in San Francisco Vaanleengtual-ah vaanleeng ka-laihhi. Tuapan-in Portland vaanleengtual vatung-in, ZAM panmun lianpi aleen khinsa Pu Kaap Lian leh Tg. Muang-in hongna muak uhhi. Tg. Muang-pen khangno mahmah mikmek-a, Subaru athak liklek khat-tawh hong leenpih zauzau-in, khatveivei ki-iip tentan zeel-in hong eksaih sak mahmah-hi.

Pu King Mang te’ inn ka-delh uh-a, amau nana omlo-in anineute’ inn-ah ka-pai uhhi. Tua laai-ah Pi Niangbawi-tawh holim-in, zaan khatbek taamding thu kagenteh tom salua ahihman-in hong ciamnuih-phin gawp-a, ka-angtang mahmah-hi. Pi Niangbawi-pen alungsim ciim sitset-a, “Zokhai, zaan khatbek taam-a nongpai mahmah hong mudah-ing, heu hiah, na’ zii nana puak-ou,” ci-in Japan pan-a citpiak angah dialneu hoih liklek khat hongpia-hi. Ta bang-a hongbawlsiam nu khat neilaai kahihlam kiphawk-in ka-angtang mahmah-hi.

Tualaai pan-in ZAM Palaai luui-mah Pu Khai Pian te’ inn-ah anne phei-in, azii atate-zong mitdimtak ka-mu thei-hi. Ankuang uumkhopna ka-man phet uhleh ZAM President luui-mah Sia Paupi nasep hongciah-tawh kituak-in, Sia Paupi, Pu Kaap Lian, Tg. Muang leh Khai Pian’ naupa-tawh koteng khuanawl Tuizeeu saangpi kava-en leuleu uhhi. Agam-uh Arizona-tawh kilehbulh mahmah-a, niim diildial-in singkungte paankaai zihziah liang-hi. Lampai kawmkawm-in kaholim uh-a, Sia Paupi-in, “Keizong ngamat lohding khat mankha-a court ana-tung hiveng-aw,” ci-in cih nading thei tuanlo kahih man-uh’n ka-ciamnuuihbawl mai uhhi.

Ngasa-pen athukhun theihcian loh-a bet lohding hihtuak-hi. Zeeupi-pen saan cihtak-in saang-a Teeutevuum nuai-a Teeute tanphialbang pha dinghi. Zeeupi pan-in mualdawn kahto leuleu-in gamhoihna leh munhoihte kava gaal-et uhhi. Khuasung zuatkiik ciang-in Pu Zogam Maang (Paa-Pau: ZAM President luui-mah) kava buluh uh-a, amah-zong hong kithawi pah-in nungzek-a athak liklek 50K khawng-tawh alei Toyota mawtaw gol veva-tawh Pu King Maang te’ inn ka-zuankhawm uhhi.

Pu King Maang te’ inn-ah amau innkuan, Pu Nang Lian Thang, Pu Kaap Lian, Sia Paupi, Pu Khai Pian, Pu Zogam Maang, Tg. Zen Lian cihteng holim-in ka-zaanhak uhhi. Ziing vaaikuanding vive ahihman-in innteekte alum ding-in ka-hahsawl-a, valum saam-in, ko leeglateng zaankhuavaak-in ka-honuam uhhi. Ziing nai 5 pawl-in innteeknu hongtho-a, khomun leh aktui hong kansak-in Zogam-a nupi kician mahmahte’ gim hongnam viauviau-hi. Pu Zogam Maang-in, “Pu King Maang-in nuamsa tak-a au-au asak ngamna-pen mit-tawh mu lian hang-ei” ci-in innteeknu ka-pahtawi uhhi.

Nai 5.30am-in ka-kisil-a, tua khitteh vaanleengtual-lam zuan-in Tg. Zen Lian-in mawtaw honghawl tautau leuleu-hi. Lawmte adiak-in Sia Paupi bangpen zaantaak-inzong anne manlo, kisil manlo, tuziing-zong kisil manlo, ihmu lo-a, denteh nasep akuan suakding ahihi. Pu Kaap Lian-zong ka’ tunphet-a kipan tuziing ciangdong minute khat-zong pelhlo-in, hong kithuahpih tosuak-hi. Pu Khai Pian-zong akuan suakding-mah hi-a, tuapipi-mah ka’ hun-uh hawmthawh mahmah-in, kikhenglah liang-in ka-honuam mahmah uhhi.

Chicago: Illinois State

14/08/2015 ni-in Portland pan-in gualgen vaangthang Chicago zuan-in ka-leeng leuleu-a, direct omlo-in Philadelphia-mah ka-tawn kiik-hi. Chicago vaanleengtual-ah ka’ tute vive Tg. Tup Lian leh Pa Langh Khai te innkuan-in hongmuak uh-a, Tg. Tup Lian-in vaaidawnding adang khat neilaai ahihman-in Pa Langh Khai te innkuan-tawh ka-kithuah uhhi. Vaanleengtual parking-ah a mawtaw koihna aciaptehdaan lemtaklo ahihman-in dawltung dawlnuai thumvei khawng hong kilehpihpih-a, exercise ka-ngah bilbel-hi, hehehehe. Mawtaw mu-in ka’ tuanphei-uh ciang-in Pa Langh Khai-in ngaaklah simsim hiding hiven, ka’ maai uh-a mawtaw’ taw-tawh kineh kuutkuut lua-mahmah zeel-a, ka-ki-iip tautau zeel-hi. “Ngaaklah pian hitehmaw, hehehe” kacih ciang-in hong damhawl zawdeuh-a, ki-iip hong kihal zawdeuh-hi.

Chicago-ah ka’ tupa Pa Na-Khup te’ kiang ka’ zinpi ding-in kiseh-a, kavan koih-in naute teng-tawh bawhlung ka-kimawl leuleu uhhi. Tg. Michael Tuang’ patkhiat North Cup leh Chin Cup kimawlna tukaalsung hi-a, kei’ hawhding ziak-in maaikaal sawn-ah aki-khiinto ahihi. Buffalo-a Karen te’ lak-ah kimawl-tawh hongki lehbulh-in, naute-in hong it-uh ahihman-in bawhlung hongpia zeel uh-a, goal khat khum-in break kang zolo-in kungpangpa’ tung-ah ka’ boksuk deda-hi. Langlam kungpangpa-pen Matu lamte hi-in Kawlpau-tawh, “Ameetla hilo kai-maw” ci-a ka-ciamnuihleh hong kisuanglua ahihman-in ka-kilehsuan kiik-a, “Ciamnuihna hi-ei, lawm” ci-in akhut kaleen-hi. Kimawl khitteh Pa Tung Thang te innkuan-in asaap ahilo alei-uh inn-ah nitaak ankuang ka-uum ngeingai uh-a, ciamnuih leh holim-tawh ka’ hun-uh ka-nopzat mahmah uhhi. Laaitui vontawi atampenna khua nana hi-a, khuapihteng-tawh omkhopna-in tangvaalno laai-a gualnopna hong ngahkiik sak-in hong nosuah sak-hi. Zaan thapaai phialmah naute teng-tawh ciamnuui-in ihmut hunzong kingah khollo-hi.

15/08/2015 ziingsang ciang-in Chicago Zomi Innkuan makaaipipa leh Zomi Christian upapipa ahi ka’ Zawlpa Pu Thomas Thang Than Tuang-in nungzek-a ana-lei huang lianpi-tawh inn hoihmahmah-ah ziing niangtui leh ii-kya-kwey kamlimtak-in ka-zangh uh-a, hehpih phatna leh inn thupha piakna-tawh pastor nasep seem-in ziingsang hunnuam ka-zangh uhhi. Tua-ni nitaak Zomi ahithei teng-tawh holim khop nading vaai-tawh Pu Thomas manlahlua ahihman-in ka-kikhen uhhi. Tangzaang atamzaw sago-in manlah uh-a, khangno atamzaw-pen music vante-tawh Stage bawl-in manlah ziahziah uhhi. Suunlam ciang-in holimna phual “Gaalkaap Luuite’ Phualpi”-ah anbuuk lam-ah anhuante ciak ziahziah uh-a, hall lam-ah music siampiteng manlah ziahziah uh-in, khutsiam khenkhat-in Laigelh Puankhaipi gelh-in manlah uhhi. Tua Puankhaipi tung-ah: “PU ZOKHAI LE CHICAGO ZOMI TE THU LE LA TAWH HOLIMNA” kici-a, hausa khualzin muak-in hong muak-uh ahihman-in hong lawpsak mahmah-hi.

Pu Thomas-in voktal lianpi khat atuam vilvel-in hong gawh-a, “Zawlsa” ding-in aphei tumbul or aphei meibaang hongpia-hi. Zongeina-ah ka-theihzawh Zawlsa alianpen ahihi. Tua baan-ah, Chicago Laaitui Innkuan-in vok lianpi khat honggawh-a, gawmkhawm-in Holimna hunpi-ah hong kihelthei Zomi khempeuh anvaakna kinei-hi. Zomi ahiheiteng hong kihel uh-a, Pu Thomas-in, “Cialpi leh kikhopna akibawl khempeuh lak-ah pawisiim tampen-hi” hongci-in ka-angtang mahmah uhhi. Cialpi ahihkeileh Holimna-pen nitaak nai 5 hun-in nopcitak-in ka-kipan thei uh-a, nai 9-in hunpi man-in, nai 10 pawl-ah vaaiteng kizosiang-hi.

Holimna hun-ah, ka’ hawmkhiat “Zomi Zogam” album pan-a amasapen “Zomi Zogam” la kihong-in mipi kiding zihziah-hi. Ladawng aman ciang-in tusuk kiik-in hunte kizomto pah-hi. Khangno lasiamte-in ka’ late hongsa uh-a, hun tomno sungbek asin-uh hinapi-in hong nopci-sak mahmah uhhi. Music tumsiam Tg. Kip Thang (Bass guitarist) bangpen world-class player khat hi-a, asin zomzom-laai Taangpaal khat hi-in nasia mahmah-hi. Lead guitarist-zong khuapi dang pan-a hong-uap ngiat ding-a Tg. Go Mung (Dumdee) te-in ana zot-uh hi-in, nasia-thei mahmah uhhi. Late akisak khit ciang-in Pu Thomas-in kei mimal pulaakna nengcik hongnei-a, tua zom-ah thugenna hunnuam hongpia uhhi. Ka’ hun-uh hongtoi simsim ahihman-in gending-a kaseh “Family Stability: Women’s Rights – Freedom & Responsibility” thu-pen ka nusia phot-a, Zomi leh minam, biakna bulphuh-in nengcik ka-vawh pak-hi. Hunman ciang-in ankuang ki-uumkhawm zihziah-a, kum tampi kimuhlohpih meeltheih tuamtuamte-tawh dinsa-in honuam-in si leh hing kimu bang-in an nangawn ne manlo phial-in nuam kasa uhhi.

Aziingsang ciang-in khuapih naute teng-tawh hunnuam zatding khensat-in biakinn nangawn ka-pelh uh-a, nitaaklam ciang-in maaikaal-ah akimawlding Zotuileen leh Zovontawi bawhlung ka-kimawl uh-a, Zotuileen pan-in puan malsim 27-tawh ka-kimawlhi. Zotuileen pan-in Tg. Langh Tung-pen siam valval lo-hi kacihleh hongkhum thapaai-in Hat-Trick hongngah giap-hi. Goal kaamnei kici miau-a, kenbel “siam zekmah keilehang kimawkkhup saamlo hive-aw” kaci-hi. Minute 30/30 kimawl khit ciang-in Zovontawi makaaite leh Zotuileen makaaite’ lunggulhna-tawh tualpi mah-ah khangnote haanthotna tomno dinsa-in ka-nei thei-a, amaute’ ading thungetna zong-tawh thuahpah-in nuam ka-kisa mahmah uhhi. Tua hun aman khitciang-in Laaitui Vontawite papi leh tangvaal kimawlna ka-nei leuleu uh-a, bawhlung siam mahmah Pa Niang Khup’ hongpiak siamna ziak-in keibang-in goal khat ka-pia giap-hi. Naute-in hongdawm-uh ahihman-in asiam mahmahbang ka-kisa khaphial-hi. Banglo kaal-in hun-in hongkheng zatzat-hi. (* Tumah-a thuzaakna-ah, Zotuileen: Laaitui Vontawi te-in Chin State tualsuak Team 6 sungpan-in Khatna nana-ngah uhhi).

Tualpi pan-in ciah-in holim kawmkawm-tawh kisil-zong kisil naailo-in Pu Pil Mung te innkuan honghawh uh-a, Zotuileen uniform silh letlat kawm mah-in nuamtak holim kawmkawm-in Pu Pil Mung-tawh ankuang ka-uumkhawm uhhi. Pu Pil Mung-pen Zomi khangthakte’ etteh taakcing khat ahihi. Apa – Pu Gin En Cin-pen minam lai lamsang anaak-vei mahmah khat hi-a, lai gelhgelh-in tua laite computer sung-ah guanloh-in akihawm thei hilo-hi. Tua apa’ lunggulhna-pen Pu Pil Mung-in tawsawn leh panpih siam-a, “sum ngah nading hikei” ci hetlo-in apa’ lungdeihte computer sung-ah thunsak-in apa’ ading ahun manphate apia ciatciat tapa muanhuai khat ahihi. Zolai-tawh laibu bawl limlimpen kimeet hetlo-in azian ngahding lamet atawm mahmah hi-a, tua-thu telcian mahmah kawm-in apa’ lungdeih ahuhden mipha khat ahihi. Anneek dawhkaan tung-ah thucin thutang suut-in hun hawmthawh pipi mah-in zaankim ciang-in hong ciahsan uhhi. Tua ciang-in khuapih naute teng-tawh huntuam khat ka-kipan leuleu uh-a, taikhua hong vaal leuleu-hi.

St Louis: Missouri State

Zinkual nading honggeel sakden Pa Dal Tuang te innkuan-tawh ziingsang tuung-in St Louis zuan-in ka-taai valval uh-a, lamdung-ah vaaimiim muhtawp dong-in kiciing dimdem-in singkung lopa hing dimdem-hi. Lampi kipuah laaitak ahihman-in mawtaw 70m/h mun-ah damtak-in kipai liitliit-in hun hong guuksak peuhmah-hi. Sawtgawp saamlo, St Louis Khuapi ka-tung uh-a, Tungzaang Khuami Pa Siing leh Nu Maannu (Laaitui) te-in vok honggawh leuleu-uh ahihman-in tua laai-ah zaankhat kagiak uhhi. Pa Siing leh Nu Maan-pen St Louis khua-ah atualtang masapen hi uhhi. Nu Maan’ puno: Melbourne-a Sia Thawnpi’ nau Sia Thang-zong biakna-lam conference kah laaitak-tawh kituakkha-in ka-angtang mahmah-hi. Nitaak anneek lap-in Calumbia-a ka’ neuzawlpa Pa Maang (Pau Thawn Maang) leh Pa Dal Tuang hongpai uh-a, thucin thutang suut khawm-in, zaankim ciang-in Pa Pau Kaam te’ inn-ah kagiak uhhi.

Ziingsang ciang-in Pa Pau Kaam te innkuan, Pa Dal Tuang, ka’ zawlpa Pa Maang leh Nu Maannu-tawh St Louis Icon lianpi khat ahi Gateway Arch kava en uh-a, adawntuai-ah ka-kahto uhhi. Atawlet vang neulua ahihman-in background hoih-tawh maan kila thei taktak lo-in tua laaipan-in St Louis Khuapi hoihnateng video kala-hi. Apua pan-a et banglo-in saang veelvaal-a, anuai-a mite akpi ciacia-in kimu ciaiciai-hi. St Louis Khuapi-pen Mississippi Guunpi gei-a akisaat khua hi-a, tua guunpi tawn-in tuilam kizopna-zong anaak-hoih mahmah mun khat ahihi. Gaalkaap tuileengte-in lampi-in nei-a, ngaman tuileengte-inzong phualpi-in nei-hi. Ngabet licence neite’nzong a-uut bang-uh’n ngabeng zeel uh-a, nopci mahmah-hi. Khuapi kaveel khit-uh ciang-in Pa Pau Kaam te innkuan-in Buffe-ah hong tutpih uh-a, tuipi sameh nam tuamtuam kazial khit-uh ciang-in khawlkhawm nuamlaai pipi mah-in Columbia zuan-in ka-taaito vaalvaal leuleu uhhi.

Columbia: Missouri State

Suun nikaai lam-ah Columbia tungto-in, ka’ neulawm ka’ zawlpa Pa Maang te’ inn-ah nitaak hunnuam ka-zangh uhhi. Tua laai-ah ka’ zawlpa-in “sagawh dingzong ahun lemlo zawsop ahihteh sagawh’ taáng” ci-in citpiak lompi khat hongguan-hi. Tua laai-ah ka’ zawlpa’ tate leh Pa Neng Dal’ tate teng-in saailung kaap kimawlna nana kimawl uh-a, seenlaai ni-nuamte hong phawksak ahihman-in video kala samsam-hi. Zawlpa’ inn-ah amau innkuan leh khuapih sanggamteng: Pa Langh Tuang, Pa Neng Dal te innkuan leh Pa Dal Tuang te innkuan-tawh nitaak ankuang uumkhawm-in hunnuam tomno khat zangh-in hunman ciang-in Pa Neng Dal te’ inn-ah hun tomno, tua khitteh Pa Dal Tuang te’ inn-ah ciahto-in ka’ zawlpa inzong azii ata’ anglum nusia liang-in kei’ kiang-ah hong giak-hi. Hun-in hongkheng zatzat-in khua hongvaak ziau-a, ziingtung mah-in Columbia vaanleengtual-ah ka’ zawlpa leh Pa Dal Tuang-tawh kapai uhhi.

Nashville: Tennessee State

Columbia vaanleengtual pan-in vaanleeng neu linglengte-tawh leengsuk valval leuleu-in Chicago vaanlengtual-ah nai langsung ka-tawlngak khit ciang-in Nashville Khuapi kazuan suk-hi. Vaanleengtual-ah Zogam Piang (Thomas Piang), Sia Tuanpu (Alh Khan Tuan) leh Thawn Tuang (Zomi Angvaan), Tg. Nang Suum leh ka’ zinpite: Nu Awi Luun te innkuan teng-in hongna muak uh-a, Tg. Nang Suum-pen mawtaw dang khat-in amawtaw ataw napsak ciitciat ahihman-in vaanleengtual-ah kimu theilo-in inn pan-in kaki ciamnuih uhhi. Tua laai-ah ZCD Secretary No. 2 – Pu Zaam Mung honghawh thei bilbel-a, thucin thutang suut-in nuam ka-kisa mahmah uhhi.

Amah-pen mi nunneem hiit-hiat khat nana hi-a, nunneem lualiang-in ommawhlo ahihman-in asi-khang simsim-in ciamnuih cihtak-in kimawlding ka-kunhi. Ahizong-in hunlehmual lemloh ziak-in ka-kimawl khawm mankei uhhi. Lawmteng-tawh holim pak-in ziingvaai dingteng kikup khitteh lamet lohpi-in Kawlpi saangkah laai-a inndei khat-ah ka-giakpih Pu Tual Khan Suan (Suanpi) om-cih Zogam Piang-in honggen ciang-in kaho sak-hi. Pu Suanpi-in nitaak ankuang uumkhawm ding-in hongkhaam pah-a, ama’ leisa inn-ah Zogam Piang-in hong paipih-in, tua pan-in Thai Ansai khat-ah Thai an kazial leuleu uhhi. Lawm Suanpi-in Political Science-tawh Bachelor ana-ngah baan-ah zii meelhoih mahmah leh tapa it-huai mahmah nana nei-a, ciamnuih cihtak-in kaki ciamnuih gawpgawp uhhi. Zaansawt leuleu ahihman-in ka’ zinpi-ah ciah-in Tg. Nang Suum-in hong giakpih-hi.

Ziingsang ciang-in Malaysia nautual kaih laai-a Sunway Hausapa Pa Kaai Pau te’ inn-ah ziing niangtui kava-ne leuleu-hi. Lawmpa-pen Laaituite’ sang-a ciamnuih akhahzaw khat hi-in hongnuui sak niloh-hi. Tua pan-in Pa Thawn Tuang (Zomi Angvaan) te’ inn-ah Nashville Zomi upateng-tawh holimna nei-in, hunman ciang-in innteekte’ itna ankuang ka-uumkha leuleu uhhi. Ankuang uumkhopna aman ciang-in lungdeih khaubang suutding zatam laai-ah Bowling Green pan-a hongmuak-a hongpai Pu Thang Khawm Pau Zomi hongtung ahihman-in vaai khat kuanding ka-kisa leuleu uhhi.

Bowling Green: Kentucky State

Pu Thang Khawm Pau Zomi-tawh Tennessee State nusia-in ama’ mawtaw lian heuhau, a-number plate-ah “ZOMI 4” akigelh veelvaal-tawh ka-taaiphei leuleu uhhi. Lampi-ah, “Puan hongtaih hamtang ning” ci-in Shopping Centre khat-ah hong luutpih-a, gualgen vaangthang Tommy Hilfiger puantungsilh 129 man khat hong leisak-hi. Tua pan-in Bowling Green Khuapi lam zuan-in kapai uh-a, neulawm Pa Go Mung (Pa Siam) te’ inn ka-siik masa uhhi. Tua laai pan-in khuapihte omna innsaupi-ah pai-in naute teng-tawh khut kilet khit ciang-in Pu Thang Khawm Pau Zomi’ inn-ah kapai uhhi. Mawtaw number plate kagenleh, “Hiah-zong register kabawl ngiat” ci-in Zomi Dialpei akisuang dal khat leh “1ZOMI” akici dal-khat honglak thuah-a, video record kabawl saisai-hi. Tua pan-in Tg. Zogam Mungno’ inn-ah ka-pai uh-a, Zogam Mungno-in keel honggawh ahihman-in keel sameh ka-vaat leuleu uhhi. Tua laai-ah Pa Go Mung te innkuan-zong hongleeng uh-a, zaansawt honuam-in taikhua vaalding honghi leuleu ahihman-in Nashville vaanleengtual zuatding honghi ta-hi.

Tua ciang-in, Pu Thang Khawm Pau Zomi, Tg. Zogam Mungno leh Suanghoih pan-a sanggampa khat-tawh ka-kithawi leuleu uh-a, Pu Thang Khawm Pau Zomi’ inn-ah kavan kalaak uhleh azii leh ata aneuzaw te nih-in lim kilaak khopding nana-ngaak teutau mawk-uh ahihman-in ka’ lungsim hong sukha mahmah-a, ahithei bang-in lim ka-kila uhhi. Lawmpa aciak giapgiap mahbang-in azii-inzong atawsawn mahmah, minam vaai-ah akithutuak mahmah ahihlam-zong ka-phawkthak mahmah-hi. Tua laai pan-in ka-dingkhia uh-a, zaan naseem Cinpu Zomi-in “hongbaang un” hongci ahihman-in baangphei pah-in, khut kileen-in lim kilaak khitteh tomkaal honuam pak-in Nashville vaanleengtual ka-zuan uhhi. Lampi tawntung-ah honuam-in hunbei lamzong kiphawk khalo-in vaanleengtual kitung vat-hi. Hong-it hong-ngai teng mah-tawh kithuah-pen nuam kisa-in huntom kisa mahmah-a, ahizong-in ahun-in hongkhen tozeel-hi.

Akron: Ohio State

Nashville pan-in Charlotte vaanleengtual leengphei-in, tualaai-ah nai khat tawlngak zawhteh Ohio State – Akron Khuapi-ah ka-leengphei-hi. Tualaai-ah, Zogam fund kitatsat laaitak ahihman-in WZC Pu Zokhup’ kiang-ah taxi saap-in ka-pai phei-hi. Kote-nih bekmah holim-in nuam ka-kisa mahmahlel uh-a, gilkial pianta ahihman-in Italian Restaurant khat-ah khe-tawh pai-phei lengleng-in ankuang ka-uumkhawm uhhi. Restaurant thupipi khawng-ah ka-nih tuak-uh’n tu ngeilo kahihna-uh hong kilangh simtham mawk-hi. An hongpai masate ka-neek uhleh anpi hongpai ciang-in gil nana-vah simpian ta-a, anpi alang khawngbek ka-nezo uhhi. Bang hongphawk sak-hiam cihleh minam avei taktak-a mapangte-in hotel lianpipi, restaurant lianpipi, nightclub, disco, … cihte nana ki-theikha khollo ci-in ka-angtang khiinkhian lel-hi.

Ankuang uum khit ciang-in WZC Headqaurters ciahphei-in thucin thutang ka-suutkhawm uhhi. Pu Zokhup-pen pasal lungtang phalo khat hileh tucip-in khakuun-a omding khat ahihi. Amah-pen sungnuailam cancer nana-vei ciitciat-a, Chemotherapy khatvei-bang ana bawlkhin ahihi. Pasal lungtangpha ahihman-in tuabangte-in dual saklo-hi. Leitung-a revolution leh political movement paizia taangthu hualpi lamsang Zomi buppi sung-ah “theipen” ding-in kamu-hi. Taangthute nimit kiciantak leh makaaite amin-apuam ateltheih sinsen mi amahbek omhi. Sawtpi hongdam nading leh minam khanlawhna masuan hong thahaat nading mipi’ tung-ah kinga-hi.

Vaaihun hongtung leuleu-a, Pu Zokhup-in taxi-tawh vaanleengtual manawhding lem sa-thei mahmahlo ahihman-in alawmpa (tua khua-ah amau te-nihbek Zomi om) hopih-in, lawmpa-zong mawtaw-tawh hongtaai vingveng-a, ka-thum uh’n vaanleengtual ka-zuan uhhi. Holim leh hun aam lualiang kahih man-uh’n amau’ ciahkhiat khitteh vaanleeng gate kapai sukleh minute 9 bekbek ka-ziakaai hinapi hong luutsak nuam nawnlo-in nai 5.55PM vaanleeng apelhkha kisuak pah-hi. Vaanleengtanu khat-in tua-ni schedule hong etsak samsam-a, “ni 3 khitteh om panding” hongci ngiau-hi. Keizong, “na’ manager aki hopih thei dinghiam?” kaci hiat-hiat-a, “hithei” ci-in vasam-hi.

Tua kaal-in Pu Zokhup ka-hopih pah-a, “alem ding-in lampi geel ni-ei,” hongcih kawm-in amau-zong hong kilehpah vingveng uhhi. Manager pasal hongpai-in a computer meekmeek-a, “tu nitaak nai 7.55” hongci ziau-hi. (* Theihding hipah-hi: Vaanleengtanu/tapa khempeuh-in amau’ zia atelcian kim hilo-in a-manager zawdeuhte-mah haksatna a-omleh kut hamtangding kisamhi). Tua ciang-in Pu Zokhup hopih kiik leuleu-in kagenleh, “dik-ei, alemlo hilehzong alem thei ding-a geelding amansa hive-hang” ci-in amau nana ciahkiik-in, kei vaanleeng nai 7.55 ngaak-in ka-omhi. Vaanleeng honglem thei-in, Charlotte mah-ah transit-in, tua-ni zaankim nai 11.35 hun-in North Carolina State, New Bern Khua kava tunghi.

New Bern: North Carolina State

Zaankim mah-in Pu Hau Kim (ZAM President Masapen), Pa Maang Khup leh atangvaal muanhuaite-in New Bern vaanleengtual-ah hongmuak uh-a, gimlehtawl kiphawk khalo-in ka-ciak ngeingai uhhi. Pu Hau Kim te’ inn-ah kibusa pah-in ziingvaai dingteng aki-hawm khitteh Pu Hau Kim’ angkawi Pi Luun-in atapa khat’ inndei kei’ ading-in special-in hongbawl sak-a, tua-ah ka-tawlnga thei-hi. Pu Hau Kim’ tapa upen Pa Maangpu-in “Ziingteh thau va-kaap ni-in, na-kaapnop penpen teel-ou” ci-in thau namkim, naak-hoihthei khemahmah honkhat honglak-a, kenzong M16 tang akithun thaulawng saupi, sniper-tawh akithuahpen kateel khitteh ka-lumhi. Gimlua kahidiam ziingsang phawk vetlo-in, kongbiang pan-in Pu Hau Kim-in, “Zokhai” hongcihleh phawk seisai-in ka-thawhleh suun 11 nana kheng mawk-hi. Kisil saisai-in, Pu Hau Kim-tawh mawtaw sung-ah thauguui thautang guang phitphet-in ka paikhia uhhi.

Gaalpi laai-a North Carolina gaalkaapte’ kibukna leh apansanpipen mun kava-en uh-a, tua khitteh Pa Maangpu’ Sushi Sai-ah amah zawn ding-in kapai uh-a, tua hun-in Pa Maang Khup-in vok honggawh sabawl-in khangnote abuai ziahziah hunsung ahihi. Suun-an ka-neek khit-uh ciang-in tuipi tung-ah ngamat nading-a akikhung lei saupi va-en leuleu-in, tua pan-in thaukaap theihna phual kava-zuan uhhi. Thaukaapna phual-ah aneite’ inn dawlnih om-a, dawl tungnung dim-in thau-a theih kizuak zihziah-hi. Innteekpa’ kiang-ah, “Video kala theidiam?” kacihleh “kei hongzaih kenla, adangte zaih theilua” hongci ahihman-in thau hoih nonote video kala samsam pong-hi. Pa Maangpu-tawh innteekpa hong kiho uh-a, thaukaap ding mi-in mawza bulh kuul ci-in mawza khat hong leisak-hi. Khualum lela pipi-mah mawza bulh letlat-in ka-paiphei uh-a, muii akici target gelhna laidalpi Pa Maangpu-in hongtawi-hi. Tua laidal akikaap ciang-in muiituum kici-hi.

Kaih 50 muiituum masa-in, tua khitteh kaih 100 ka-tuum leuleu-hi. Pa Maangpu-in azia honggen kawm-in, “Pu Kaam Lian (ZCD) te ka-kaapsakleh ‘thaulawng akawipi hi’ hongci-uh hiven, nang kaapsin dihveleh” ci-in nuui hiit-hiat-hi. Pa Maangpu-pen midik, nunneem mahmah khat hi-a, kamtam saisai khollo-in, polhnuam mahmah khat hi-in, thau-zong uuk mahmah-a, lawng 10 vaal nei zihziah-hi. Keizong ka’ muiituum ngiim-in ka-kaap zangzang-a, kaih 100 muiituum nangawn muii sungnungpen lamgiin (line) ka-kha veve-hi. Pa Maangpu-in, “Thaulawng kawikei mate, hehehe” hongci-a, kaciamnuui liahliah uhhi. Ka-kaapnop penpen ka-kaap khitteh Pa Maangpu-in thautom (pistol)-zong “kaap hamtang ou” hongci-a, kaih 50 pawl-a sahawk hawng kawi lingleng ka-kaap zuahzuahleh akawi-kiil ka-kha-tan zawlaai-hi. Thaukaap sung-in ka’ ziatlam bil hukna gina sana-in hulo kahihman-in tuni ciangdong ging ciaiciai laai-hi.

Ni hongduai mahmahta, Pa Maang Khup te-in hong ngaaklah lua-ta ahihman-in Pa Kim’ phone hong nawhluut mahmah-a, “hong tungding hita-ung” acihbel thum veibang kaza-hi. Khuamial philhphelh hun-in Pa Maang Khup te’ inn: aleisa-uh innpi ka-tung uh-a, neekding amansa-in nana omkhin-hi. Pa Maang Khup-pen Malaysia Semanyih Camp-ah ka-om sung-in hong vehden, mehkankeu hong puakden ka-sanggamte’ lak-ah sanggam phadeuh pasal kician mahmah khat hi-a, kamtam khollo-in aseem giapgiap khat ahihi. Ankuang hehpih phatna leh thupha piakna ka-neih khitciang-in ankuang ka-uumkhawm uh-a, anneek khitciang-in innliim-ah ahitheiteng kikhawm-in amau’ HomeCell-tawh thuah-in hunnuam ka-zanghkhawm uhhi. Baáng tung-ah colorful laimal-tawh “Pu Zokhai, Welcome to Zomi New Bern” kici kiukiau-a, ka-zumnuih hiamhuam-hi. Minam vaai leh biakna vaai kizopzia hunzatna tomno ka-neih khitciang-in lawmte teng-tawh ciak ngeingai-in hun ka-hawmthawh mahmah uhhi. Keima’ ihmut cimlohding hong khualna uhtawh lawmte vaciah uh-a, tua nung-ah Pa Maang Khup-tawh holim tuam-in nai 2.30 sung ka-tawlnga thei-hi.

Ziingsang ciang-in Pa Maang Khup leh Nu Niing Luun amau nupa-tawh vaanleengtual ka-manawh leuleu uh-a, holungkup cim manlo mah-in cidamtak ka-kikhen uhhi. New Bern pan-in Charlotte, Charlotte pan-in Buffalo zuan-in ka-leeng phei-a, Buffalo ka’ tun ciang-in tawlnga thei tuanlo-in ka-vaak samsam uhhi. Ka’ zinpite’ inn-ah luut-in, tua pan-in ka’ zinpinu Sm Luun’ (Cing Luun Dim)’ nau tumpen Pa Kang (Kang Cin Lian) te’ inn-ah a-upipa Sia Paupi (Pau Khan Cin Nang) Kawlgam pan-in hongtung cih za kahihman-in khut kava leen-hi. Sia Paupi-tawh lamdang kisa tuak-in ka-ciamnuui uh-a, hunnuam tomno bekmah zangh thei-in, vaaiciah nading kithawi ding-in ka’ tupa Pa Leenpi te’ inn ka-zuan leuleu-hi. Pasian’ maaipha-tawh 23 Aug 2015 nitaak nai 7.25 hun-in Buffalo vaanleengtual pan-in ka-leeng khia-hi.

New York: New York State

Nitaak nai 8.45 (NY Time)-in New York ka-tungphei pah-a, tua laai-ah ziingsang nai 10 ciangdong ngaakding hi veelvaal-hi. New York-a ateeng Lawm Khup (Dr Do Khan Khup) leh sanggampa khat-in vaanleengtual-ah hongla vingveng uh-a, Lawm Khup’ hong deihsakna leh hong neekngaihna mun thupiteng azaan azaan-in honglak zemzem-hi. New York Zomi Innkuan lutangpipa te innkuan mundang apeemding khaakna pawi abawl-uh nangawn nusia liang-in hong vaakpih uh-a, UNO Building hitaleh, acimh khinsa gualgen vaangthang Manhattan-a World Trade Centre’ taáng-a akilam kiik building hitaleh, Times Square NYC hitaleh hong paipih-in lim ka-kila kawikawi uhhi.

Times Square NYC-pen nasialua mai-a, “Suun sang-in taangzaw mai veh-e,” kacihleh lawmpa-in, “Suun sang aphazaw gamnuam om-a,” hongci-a, ciamnuui-in, “eih, tua cikei-oh, Pasian heh kha-in teh,” ci-in ka-nuui luahluah uhhi. Mun hoihteng ka-khit khit-uh ciang-in vaanleengtual-ah hongkha kiik uh-a, amau azii ata’ kiang zuan-in, kei kahihleh ziingsang nai 10 ngaak-in ka-om tiuteu-hi. Nai hongcing-in hunhong bei-a, New York pan-in Los Angeles vaanleengtual ka-tung phei-hi. Tua pan-in, 797 Dreamliner vaanleengpi-tawh nai 14.50 sung leeng tiaitiai-in Melbourne vaanleengtual-a hongmuak ZAA President Thak liklek Pa Pau Kaang leh Zodamtui Upapi Pa Mungpi te-nih tawh kimu-in Melbourne-a ka’ innsaapna mun-ah ziingtuúng-in cidamtak ka-tung kiik-hi. 797 Dreamliner-pen pailam-a Boeing 767’ sang-in lianzaw-a, Pasian’ thupha-tawh khuahun hoihlua ahihman-in honglok ngeilo-in nai 1.30 kikhia-in manlaang zaw-in nuamzawtham-hi.

USA mun tuamtuam pan-in hong kisamlo hilo-hi. Adiak-in Pa Daniel Maangpu (Kai Suan Maang: Camp sung-ah akum phial-a kithuahpih), Pa Taipi (Tai Mung: Sunway pan-a kithei-a unau bang-a ki-itpih), Pa Sawm Lian leh Pa Thawng Zaam cihte-in hongmuak mahmah-uh himahleh ka’ hunneih tomlua-in kicinglo ahihman bek-a akipha zolo suak-hi. Amau’ tung-ahzong naakpi-in ka’ lungdam-a, “apai nuamlo” hongsak hetloh nading-uhzong ka’ lungdeih ahihi. Atung-a ka’ suutna khempeuh-zong kicing hetlo-a, amimal-a hongho, hongmuak, citpiak tuamtuam-tawh hong meelcik sanggamte khempeuh aneng atawng-in ahong gelh zolo kahihi.

Tua thamlo-in, gamlapi mah pan-in phone hongset tautau, citpiak kinoptuamna hongkhaak valval sanggamte khempeuh-zong keima’ aituam thuciaptehna sung-ah kiciantak-in kana guang-hi. FB leh Groups sungpan-in ka’ zatpak phone malsim la-a hongsam tampi ka’ dawn manloh/ka’ dawn khaaklo om-a, akiphasak hilo, amimal hongthei hilo, huntomlua mahmah, phone koihna nangawn thei meelmeello, etkiikteh miscall nana dimzeel, sapkiik masakding theilo liang-a ka-omlamzong hong theisak-in telsiamna ahongngen kahihi. Pasian-in akuamapeuh’ tung-ah athupha hong buaksuk tahen! (*Hunlem zil-in USA leh AUS kibatna leh kidanna suutkiik zeel ni). Hihciang hong tonpih Pasian-in ka’ khantawn-in hong tonpih denlaaiding upna leh muanna-tawh, Zokhai