Australia, Melbourne khuasung buaina pen “Terrorism incident” hi ci’n Police te’n pulakkhia

Australia, Melbourne khuasung ah zanni in thautawi migilo khat Police te’n kaplum uhhi. Tua buaina vaipen IS te’n ko ii gamtat na hi ci uh a, Australian Police te’nzong Terrorist Incident hi ci’n tuni in genkhia uh cih AFP pan kiza hi.

Zanni in Melbourne khuasung ah thautawi khatin mikhat akapkhit ciangin numei khat kidal nading in “Hostage” in mancip hi. Tuapa pen Somali gampan kici a, palik tetawh akizolzol laitak in tuapa’n thau lawnmasa ahih manin, Australian Police te’nzong kaplum uhhi.

Tua Somali thautawipa minpen Yacqub Khayre kici a, kum 29 aphakhin khat ahihi. Tuapa’n Complex sungah nasem khat ahi Chinese-born Australian gammi pasal khat kaplum masa cihi. Tuakhit ciangin numeikhat Hostage in amat ahihi.

Victoria Police chief commissioner Graham Ashton in agenkhiatna ah hih Melbourne sung thaukikap buaina pen Terrorism Incident in ki ciamteh hi. Ahi zongin hihpa gamtatna pen geelkholhna tawh agamta hiam, thusuakvat in a ngongtatvat hiam cihpen hoihtak ki kancian laiding hi ci’n genkhia hi.

Tuciangciang Somali papen hihbang in a ngongtat nadingin gampualam panin thu akipiakna “Oversea message” kimunailo hi. Ahi zongin hoihtak in ki kancian laiding hi ci’n genbeh hi.

Video: Possible terror link in bloody Melbourne siege

IS migilo tetawh akizom “Amaq news agency” akici te genkhiatna ah hih Melbourne khuasung buaina pen IS te gamtatna hi ci’n genkhia uhhi. Melbourne khuasung kithahna pen IS galkap khat ii gamtatna hi a, Australian gammi te mitsuan “Target” in agamta ahihi ci’n genkhia uhhi.

Ahi zongin Victoria Police chief commissioner Graham Ashton in agenna ah hih IS tepen buainakhat, thu nawngkaikhat aom ciangin ko gamtatna hi ci’n hongki tulmawhden pongmawk uhhi. Ataktak ahihleh ahihloh genkhiatding pen tulaitak hamsalai hi ci’n genkhia hi.

Related: Australia, Melbourne khuasung ah palik te’n migilo khat kaplum

Australian Officials te’n gamsung ah buaina apianloh nadingin hanciam mahmah uh a, kidalkholhna tampi zong neikhin uhhi.

2014 September kha akipan Threat Level aki khantohzawh akipan Australia gamsung ah buaina Attack akibawlsawm pen 12 veibang ki dalkhin cihi. Tuaban ah a ngongtatsawm zong mi 60 val kimankhin cihi. ZD Sawltak #zomidaily