Ka muhpak US Gamthu pawlkhat – 45

Ka muhpak US Gamthu pawlkhat – 45

Gam Hoih Gam Pha Ih Tun Ciangin
Gam hoih gampha ka cih ciangin, tu hun a ih zat mun mahmah gam thumna ih tun ciangin cihnopna hi a, ei pianna ih gam ih lei tawh anneek tuidawn, puansilh niikten, teenna giahna leh vak suk vak tohna ah van leh lei in kikhai hi. USA bang diakdiak ah mikim in mawtaw a nei hi a, ei zong nasepna ah ih kuan ih ciahna dingin mawtaw neih loh in phamawh hi.

Mawtaw tawh ih vaksuk ih vaktoh taktak ciangin, Zangkong a mihau mahmah leh milian mahmah ih cihte tawh ih nuntakzia hong kibang hi. Inn leh lo ah mei lah sia ngei se lo in, deih zahzah a vot a sa ei deih bang a guan theih ziauziau hi ta lawmlawm hi. Tuivot tuisa, tuikhal piansakna leh mehteh mehgah voksa aksa a tuamtuam a muat pak lo ding a, koihna avot kuangpi bizu khawng ih nei hi. Pakan siikkeu kuang a tuamtuam silna na leng om a, ih khut tawh zong sil kul lo lai liang hi.

Tua teng tawh ih kidiah pikpeek zawh a sawtteh ih Kawlgam om dan tawh ngaihsun kak in a eimau mahmah zong a pil a siam a hau a lian bang khat in ei leh ei ih kivawh tawm thei lai mawk hi. Mikang innah mikang an ne in mikang mawtaw ih tuan zenzen hangin ih husan dan ih nak dan ih ngaihsun dante amau a’ tawh kibang hi peuhmah deksuai lo hi. Ih muhna leh ih nuntak zia a khangto hi bek a, ih tunna gammite tawh ih kituat ciangin, Kawlgam bangmah in ih piandan pen a nuainung pente mah kihi veve hi. Ih tunna gam na hau ngiat na khangto ngiat ahih manin amau hauhnate a eimau na leng in a lawhtak kha bek ahauhpih kha bek ih hihi. Ih lungsim ciimna leh lai theihna kikhuasak ziate a khangto tuan hi peuhmah lo hi.

Tua bek thamloh in a kuamah peuh a zawng pen leh a hau pente zong a nuntak dan uh hong kibang tek ta lel a, ei leh ei anneek tuidawn a bang khempeuh ih kisik zawh tek ciangin, kim leh paam awlmawhlohna tampi hong piang leuleu hi. Hun ih neih loh tek kawmkal ah kikawmna ding hun awng om lo in, eimau leh eimau in ih oma ciat ah ‘the nillnell’ in ih om ciat ta mawk hi. Kei tha lawhsa keima neek hi ci in kuamah peuhmah thu kinh lo in awlmawh lohna lungsim hong piang thuah leuleu hi. (the nillnell – kuamah thusim lo, awlmawh lo, thu don lo)

Tua hi a, tu a ih din mun tawh lungkim ding hi deklo in mai lam ah ih hahkat semsem ding ahihi. Ih gam ih lei a ih omlai ih khantoh nang hong zekaiisak hong dal ngaihsutnate leh kampau mukpau gamtat luheknate taamken suak nawn lo in, a khangto gam ih tunteh picing ngaihsutna Zomi bup kipawl theihna ding mah hamtang ngaihsut a, a kuamah peuh ih kipuah ih kizuun kik tek ding ka lunggulh mahmah hi.

(azom omlai hi…)

Agelh: Awn Za Pau