Ka muhpak US Gamthu pawlkhat – 39

Ka muhpak US Gamthu pawlkhat – 39

Nu-ngak Tangval Kizop Dan
A tung a ih gensa mah bangin, a kuamah peuh in ih gal theihna ah America pen khangto lua kisa in Pasian upna zong a nei tawm mahmah a, nungak tangvalte zong ‘living together’ ci in kiteng nailopi mahin mun khat peuhah nupa bang a, omkhawm nungak tangval tampi a om lam, ih galzak zawh a sawtpi ahihi. Tua ih galzak mah bangin a taktak a om takpi mah hi a, amau kiangah girl friend, boy friend kicite in kimuh khopna (dating) a neih khit nak uh leh, tangval siangtho nungak siangtho a omlo mah hi tek zaw mai hi.

Arabte a kipan ei Asiante diakdiakte in zi neih ma pasal neih ma aa siantho (virgin) mahmah ding pen a thupi sak mahmahte ih hihi. Kiteng naii lopi aa nungak leh tangval nupa bang aa om khawm cih pen eite muhna pan mihing ih hihna ih va-angh hong kiam sak mahmah hi.

Ahi zongin USA pen a gam a lei thu bek hi lo in a innkuan sung ki-uk zia ah kum 18-21 a cin khit nak leh a nu a pa ukna sungah om nawn lo in a mah leh a mah a vaii ding (stand) hi ta aa, mundangah a mah leh amah guak suakta takin om zaw uh hi. Ganhingte a mah leh amah a pi cin zawh ciangin a nu a pa tawh a kikhen lian leh vasate zong mulcing khacing (full wings) ahih zawh ciangin a omna a bu nusia a, a mah leh amah in a neek ding an a zon linlian ngeiingeii tawh kibang takpi mah ahihi. Tua ahih manin kiteng naii lopi nupa bang aa omkhop pen a za-angkhai takpi mah uh ahihi. Pawl khatte bang ta bang nei khin ta leh kitenna a bawl naii lo om lai uhhi.

Itna Ngaihna Tul Thei Lo
Nupa ki-it ngialte’ teek semsem leh ki-it semsem kingai semsem uhhi. Tua pen mah ih lungtuppi pen ahihi. Ahi ding mah zong ahihi. Tua bang a ki-it kingaite leitungah a hampha taktak penpente ahihi. Pasian thupha sang ahihi. Ahi zongin a khangto gamte ah tua kimlai mahin meigong in om leh a sisa a zi ahih keh a pasal a itna a ngaihna tawh a ma va-angh tang in pasal ahih keh zi neih kik ding sawm nawn peuhmah kei ning.. aci kawmkawm a omta zongin, a tamzaw tua bang a va-angh kitang cih bang om meello in zi mah pasal mah deih pah ziau leuleu uhhi. Atate a sanggamte in zong lah thukimpih pah lianlian lel uhhi.

Kazi, Kamnu nasepna Montereau kici mihau mahmahte puteek piteek kepna ah puteek kum 80 val tham khin khat in kum 61 sung vilvel a tenpih azi in a sihsan ciangin a kum zong kaai man lo in tua Montereau sung mah a, om pasal nih neisa kum 60 val ding khat mah tawh March 6, 2010 ni in kiteenna bawl uh a, tua Montereau sung mahah omkhawm pah uhhi. Amau gel pen a pan masa hi lo in a lina khawng hi ta sawnsawn hi.

(azom omlai hi…)

Agelh: Awn Za Pau