Ka muhpak US Gamthu pawlkhat (32) ~ Awn Za Pau

Ka muhpak US Gamthu pawlkhat (32) ~ Awn Za Pau

Garage Sale! Yard Sale! Estate Sale!
A diakdiak in khua hun a hoih nak leh Friday ni leh Saturday ni ta in van lui teng kizuak thei hamtang hi. Pawl khatten nipi ni zong zuak uhhi. Garage Sale ci in mawtaw buk a avan luite a zuak pawlkhat om hi. Pawl khatte leuleu ciangin Yard Sale ci in a innpua huangsung teng ah zuak uh aa, tua pen garage sale sangin vantam zaw van kicing zaw hi. Moving Sale, Huge Sale ahih kei leh Mega Sale cihpeuh zong nei a, mundang State dangah kikhin sawm ahih keh a inn uh zuak cih bangin a van lui zuak zong om hi. Tua munte ah zong van kizuak nam tuamtuam tam hi.

Tua zawh teh van tampitak akizuakna khat pen ‘Estate Sale’ kici hi. Khat veivei tamdeuh a zuak leh a lei nuamte lungulh semsemna dingin behlap toto uh a, ‘Estate Sale plus’ ci in a min guan thuahthuah uhhi. A innbup a, aneihsa teng uh a innsung ngiat ah zuak uh banah amau omna veeng teng kipawl a, a zuak cih khawng zong om hi. Ban ah tua van kizuakte tanh masa in a hunhun a, comapany nasep dan mah aa, a zuakzuak kik pawl zong om lai hi. Hi lamah ei Kawlgam ah sofa settee ih cih pongmawkte hi lai ah ‘couch’ ci uh a, tuate khawng leh sabuai, lupna, anneek sabuai, sofa tutphahte ahoih lai pipi mah man tawm khakha in kilei thei hi.

Kei bang atung a ka gen vanzuakna saite Friday leh Saturday in ka pha den hi. Mikang piteek puteekte tam pai phadiak uh hi. Ta-angh van (antiques) hoih a sak uh amau neih ngei loh khat hi leh lei tangtang uhhi. Spanish/Mexicante zong naak pai thei peuhmah uh aa, puansilh lui aa kipan innsung nazat lupna tutphah, ankuang ankeute lim lei phadiak uhhi. US tung thak inntuan thakte bang inh tua aluisa kizuakte lei leng a man tawm theithei in kizuak aa, sum bei nemtuam pha mahmah hi.

Laibu tawh kisai National Geographic Magazine leh Readers Digest kisai Condensed Books/Select Editions cih khawng dozen khat $3 cih bang bek man hi. Tua mah bangin laibu hoih mahmah nungsun kizuak euau aa, khangno lai hi leh ka leinop ka kepnop a tam mahmah mai hi. (azom omlai hi…) Agelh: Awn Za Pau