Ka gensawn ding theikeng

Ka gensawn ding theikeng

1. “Na tate in sum hong khak zelzel hia” hong kicih ciangin, “Hong khak zelzel mah ee” cileng, “Hong khak ngei lo zel”… “Hong khak ngei kei ee” cileng lah thuhoih hilo zel, ka gen sawn ding thei keng.

2. Ka khualzinna gamah inn lam panin phone tawh hong kihopih ciangin, “Nong lawhcing hia” hong kicih teh, “Lawhcing sam hang ei” cih ding pen thuhoih hi napi-in, ka ciah ciangin sum tampi a pua dingin hong lamen khaleh ci zel, “Tawmtawm ee” cih ding lah Topa’ mite’ kamzat dingin hawmthawh huai zel, ka gen sawn ding thei keng.

3. Kiniamkhiatin a thumangte, na khatpeuh ki sawlsawlin kiphun’phun’ thei lai a, thumang lote bangmah kisawl lo-in tawldam hithiat lel hi. Thu manglo ding cileng lah mi ngeina hilo zel, ka gen sawn ding thei keng.

4. Thumang lote satsatin vuavua ding cileng lah hong sahang kihtak ding lau zel, zual bawl ding cileng lah thu a theihtheih loh ding lau zel, ka gen sawn ding thei keng.

5. Ka nu ka pate it mahmah napi-in, ka khan tawh kizui lo-in hong naupang hilh gawp zel, ka nialnial ding lah thumang lo bang zel ding, ka gen sawn ding thei keng.

6. “Hau zo, dam zo, thupha ngah mi ka hi hi” cileng lah hong lamente in, “Hoih thei ngei ei” hong ci ding a, i zawnna teng, i zawngkhal’na teng gengen leng lah migina lopi khat ki suak zel ding, ka gen sawn ding thei keng.

7. “Tua khuapi nuam ka tun hun ding ngaklah veng” cih la sa leng lah, i ci a nat ciangin kidam kik nuam zel a, cina-te kidon kei leng lah a ngeina hilo zel, ka gen sawn ding thei keng.

8. Thei ta keileh a hangsan mikhat kizui luailuai in, a theite lah madawk ngamlo zel, ka gen sawn ding thei keng.

9. A cinate’ lakah a dam ka banga, a damte’lakah a na ka bang hi. Cina banga om ding lah ka ut kei a, a dam banga om ding lah ka ngap kei hi. Ka gen sawn ding thei keng.

10.Leitung nuntak a nuam theithei-in zang ning ka ci a, a nuam lo theithei hong tung zel hi. Ki lungnop bawl’ gawp ning ka ci a, a kineih nuntakna hizel hi. Ka gen sawn ding thei keng. Tdkhen