Malaysia, Johor Baru ah naungek bawngnawivui atuh honkhat kiman
Malaysia, Johor Baru City sungteng ah abeisa Thursday (Dec 7) ni in kumpi thunei te’n vanzuakna sai pawlkhat thakhatthu in thusitna “Raid” neikawikawi uh a, naungek bawngnawivui “infant formula” atuh akibawl Box 210 tak mankhia uh cih Bernama pan kiza hi.
Kumpi thunei ahi “Ministry of Domestic Trade, Cooperatives and Consumerism (KPDNKK)” kici te’n Johor Baru City sung mun 5 takah Raid abawl kawikawi uh ahihi.
Hihvai tawh kisai in Johor KPDNKK director Khairul Anwar Bachok in agenkhiatna ah Premises mun 5 ah Raid kibawl kawikawi cihi. Zatui zuakna Drug Stores leh Convenience Stores tuamtuam ah thusitna neikawikawi uh a, tuapan in amuhkhiat uh ahihi.
Abeisa August kha akipan naungek bawngnawivui abawlkhia Producer Company te’n kumpi thunei te tungah Complaints bawl uh a, atuh hongki bawlsak pawlkhat om cih aki zaksakna tungtawn in aki kankhia ahihi.
Tuabang in bawngnawivui atuh akibawlte adawnkha naungek tepen luatcihtak in lualua uh cimawk hi. Tuabang in naungek alua atam ciangin infant formula abawlkhia Company te’n lunghimawh in akankhiat uhciangin atuh akibawl om a, tua infant formula atuh adawnkha naungek tepen alua cih kitheikhia hi.
Kumpi thuneite’n Premises mun 3 ah amatkhiat bekbekzong naungek bawngnawivui akigawm in RM42,000 bang manneiding cihi. Tua infant formula atuh tepen asit taktakte tawh ki koihkhawm in akizuak cimawk hi. Amanzah zong asitte mahtawh kibangsak in kizuakkhawm cihi.
Tua azuakte lakah kum 50 aphakhin Business Operator khat akidot ciangin hih infant formula tepen atuh ahihlam bangmah katheihkha keihi cisawnsawn hi.
Tua bawngnawivui aleikhiatna Invoice te akisit ciangin, tua Invoice tungah akigelh Company minleh Address tepen aomlopi hisawnsawn a, kumpi thunei te’n akankhiat dingpen hamsasak semsem hi.
Tua ahih manin hih bawngnawivui te koipan hongki pankhiahiam cih theihciantheih nadingin Johor Baru bekthamlo, adang State tuamtuamte ahzong kumpi thunei tetawh kikanhuan ngeingaiding hi ci’n director Khairul Anwar Bachok in genkhia hi.
Tua atuh akibawl Infant Formula leh Original taktakte pen Chemistry Department te kiangah kipuakkhawm in, bang kilamdanna ompipen hiam cih kancianding in thukipia cihi.
Raid panin akimankhia bawngnawivui tepen “Section 8 (2) (b) of the Trade Descriptions Act 2011” thukhun tawh kimanphot hi.
Hihbangin abawlkhiate akitheihkhiat leh amawhcilna First Offender ahihleh liausum RM10,000 leh thong kum 3 ciangbang ki kiasakthei cihi. Anihveina Second Offender ahihleh liausum RM20,000 leh thong kum 5 ciangbang ki kiasakthei cih kiza hi.
Migilo sumduhhop huaiham lungsimpoi ngialte’n naungekte nangawn hehpihna neizo nawnlo in, naungekte dawnngiat dingin akibawl Infant Formula te nangawn atuh bawlngam tamawk uhhi.
More: Zatep meikhu gimnam pen anu gilsung aom naungek te’n thuaklah mahmah
Atung a Photo pen Johor Ministry of Domestic Trade, Cooperatives and Consumerism (KPDNKK) director Khairul Anwar Bachok (centre) leh alawmte’n tuni Sunday (Dec 10) ni in Kulai ah atuh akimankhia Enfalac A+ Infant Formula te alahkhiat laitak uh ahihi. Malaysia gamsung aom naungeknei nulepa te’n hih Enfalac A+ kici naungek leh naupang bawngnawivui te zatloh photding hoihzaw khading hi. (Kozong nungdiak in hih Enfalac A+ bawngnawivui hangin azanzan in zato kitunlawh dikdekkhin hi 🙁 Sawltak #zomidaily
Comment piaknop aomleh...