Kuala Lumpur, Jalan Alor sungah Operasi lutin mi 440 kiman

Kuala Lumpur, Jalan Alor sungah Operasi lutin mi 440 kiman

Malaysia, Kuala Lumpur khuasung aom Jalan Alor leh Jalan Changkat kuamsung tengah zanni Tuesday (Nov 14) ni in Operasi nasiatak in lutkawikawi cih NST pan kiza hi. Gamdangmi Immigrants te’ vanzuak sumbawlna saite abanban in asit kawikawi uh ahihi.

Tuabang in abanban in asitna ah akigawm in gamdangmi 1000 dektak thusitna nei uh a, tualak ah mi 440 mansuak uhhi. Tua akimansuak tepen naseptheih nadingin Work Permit aneilo, Travel Document aneilo cih te hi a, Immigration Department te makaihna tawh aki mankhia ahihi.

Malaysia Immigration lamsang ah makaipi ahi Immigration Department director-general Datuk Seri Mustafar Ali in agenkhiatna ah hih Operasi kibawlna ah Officer mi 267 in Operasi akibawl cihi.

Tuate pen Immigration Department, Police General Operations Force, Companies Commission of Malaysia cihte kipawlkhawm in, Jalan Alor leh Jalan Changkat sungteng ah nasiatak in Operasi alut uh ahihi.

Gamdangmi nasem amuh peuhpeuh uh avek in bansitmang uh a, akigawm in gamdangmi Foreigner mi 915 thusitna aneihlak ah mi 440 te’n “Immigration Act 1963” thukhun palsat ahih manin, aki mansuak uh ahihi.

Akiman gamdangmi te lakah pasal 389 kihel uh a, numei 47 leh naupang 4 kihel hi. Akiman te lakpan in atamzaw pen Bangladesh gammi, Vietnam gammi leh Indonesia gammi cihte tampen cihi. (Jalan Alor kuamsung pen Myanmar gammi nasem tampi aomna vengkhat hi a, adiakdiak in Kachin te innsaap in tampi aomphadiakna vengkhatzong ahihi.)

Tuesday sunlam in nai 3 sungtak Operasi nasiatak in abawl uh hi a, phalna kiciantak neilo in vanzuak, saibawl Operators honkhat te’n asai uh nusia in taisan uhhi.

Immigration Director-general in agenna ah pawlkhat gammi te’n vanzuakna saidawl tepen gamdangmi te kawmsawnsak, ahih keileh gammi sainei te’n gamdangmi Work Permit neilote nasemding in cial uh cihbang hi a, tuabang namnih tepen thukhun palsattuak ahihi ci’n genkhia hi.

Tuahang mahinzong “Companies Commission of Malaysia” tetawh Joint-operation akibawlkhawm hi a, City Council nuai ah vanzuakna dawl Premises tepen thumanlo in gamtatna kimu hi. Tuabang gamtatna te aomloh nadingin Immigration leh adang Agencies tuamtuam te’n aki hanciam ahihi ci’n genbeh hi.

Hih Operasi alutna Jalan Alor leh Jalan Changkat pen “Popular Tourists Spots” ci’n gamdangmi khualzin te atam mahmah phadiakna munminthang ahihi. Tourists atam mahbangin ansai leh vanzuakna tuamtuam te ah gamdangmi nasem “illegal immigrants” zong tammahmah hi.

More: Kuala Lumpur, Pudu vengsung ah Operasi lut in mi 40 val kiman, Myanmar 12 kihel

Immigration Department leh Police Force bek hinawnlo in, “Companies Commission of Malaysia” akici “Suruhanjaya Syarikat Malaysia (SSM)” tezong kihelta ahih manin, phalna Permit kician neilopi in vanzuak, ansaibawl, summetbawl, Business khatpeuhsem cihte mailam ah lauhuai semsem khatheiding hi. Sawltak #zomidaily