Lengtong te La
Cimphong lah hihet keiin ka ngaihsut cianga zan hong ihmu sak thei lo laa hoih kasak te hong pulak kheh seisai ding ning e. Ka theih khelh ahih lelah hong maisak unla, Lengtong Golian laphuahna sungah “Kuama deih loh tangh ka zaila aw luankhi nul ken..” cih khat om leh kilawm sa ingh. Hih laphuakpa pen a kiniam khiat mahmah khat hiin ka ummawh hi. Ka moi laiin Golian lakhui ka pa in a khualzinna pan hong lei a zan thapai ka innkuan un ngai thei zel hi ungh.
Golian la ten khiatna thukpi nei ka sa a, ngaihsun kawmin ngai lehang a zaknop semsem tepawl hi. Golian zawllate lakah hoih ka sak phat diak khat om a, tua pen “Sanlui ngaiin sawl bang ka vul lo, nunlui sial sawl bangin ka vul ” ci sese hi. Hih la pen ka zak tungin a thupai dan kheltat sa ka hih manin a khiatna thei lopi in ka vakna peuhah ka sa pahpah hi. Kumte hong beibei ciangin hih la a khiatna ka tel zo pan a, ahih luat lam zong kitel semsem hi.
Sanlui icihte pen aman sa hi uh a, ngai in kuaikuai mah ta lehang apiang thei nawn lo ding thu ahihi. Tuapen mikim in theihsa in koih ahi tam nupi papiten aman khin a zawlluite uh amuh uh ciangin hunlui a phawkna uh gen ngaungau thei zel uh hi. A tamzaw in bel Zawlluite lian sangin zawlluite tawh kingaih lai hunnuamte lakkik theih hileh a ki lakik nuam hizaw cise uh hi. Ahi tak mah ahi diam ken bel tam tel nai keng.
Lengtongte la limlim pen zawlthu hi taleh gam ngaihna te hitaleh khauhpai thei mahmah ka sa hi. Lengtong Pauno zawlla khat pen tudong zawlla kiphuak ka zak ngei khempeuh lakah a khauhpai pen leh a gawpai pen dinga ka upmawh khat om hi. Tua la pen a thu in sim leng kitel pah zaw in um ingh ” ..tong kup pih theih loh Siksem..” acih khit ciangin tua a tawiden Siksem pen “… ngaih nang hizaw lecin hong tawicim ngei kei ning..” cisuk giap leuleu hi. Hih la pen zawlla gaw taktak a hihi. Siksem ih cihpen anip hi peuhmah lo hi.
“Van a tung solkhapi” cih Pauno in hong phuah lian zong tuaksa mahmah ingh. Tudong mah mikhat in hong pan masa peuh leh Zomi a kici khempeuh phialin ki sakpih thei kim liang hi. Atul thei ngei lo ding zawlla ngumngek hong suak mawk hi. Hihla thupi ka sak phat diakna pen kikhenna thu leh ki elna kikona thusia cihbang malkhat zong kihel lo a, Itna thu taktak a hihi. Hih la pen Ngaih aw cihna munah Topa ih ci kei phial zongin biakinn sungah sak theih ding pawla ka ngaihsut khat a hihi. Phalbi khuavawt thuak a zan khatang silsial nuaiah ling kelkel kawmin sa leng zong nuam kisa ahihman in kikhol thei tuan lo hi. Ih ngaihte tawh a om khawm hipeuh leng a noplohna mun om lo a, Topa tawh hi peuh lehang lamna dianna leh beng am lianga music a gin ngeingai lohna munte zong nuam zawsop thei hi.
Lengtong Kamkhen laa tebel tam thei keng, ahizong in a tanu in asak ” Heh hong nem aw” cih khat bel hoih ka sakna bei thei kei. Nang phuah ahiam cia ka dot lelah “A lungleng khat peuh ii phuah hilel incia” hong cihsan ziau in, ama phuah ahih kei lezong a phuakte bel kei Mark piak ding hileh 80 tunglam ngahsak in ki um ingh.
(Tuazah cipak zual ni…)
..Zomi Quavadis…..
Francis Lamthang
Comment piaknop aomleh...