Malaysia, Johor State sungah Datuk atuh kizuak cih Police te’n pulakkhia

Malaysia, Johor State sungah Datuk atuh kizuak cih Police te’n pulakkhia

Datuk cihpen ki pahtawina “traditional Malay honorific title” hi a, Malaysia, Indonesia, Brunei cih gamte ah kizang phadiak hi. Datuk pahtawina “Datukships” pen sumtawh leitheih hilo a, State khatciat ii kumpi uliante leh Yang di Pertuan Agong te bekin apiaktheih ki pahtawina ahihi.

Malaysia, Johor Baru sung aom Police te’n hih Datukships pen summetbawl kipawlna “Syndicate” khatin sumtampi tawh atuh “Fake” azuakkhiatlam theikhia uh cih Malaysia News tuamtuam pan tuni ki pulakkhia a, Datuk cih pahtawina pen tuabang sumtawh akilei om cihpen lamdang kisa mahmah hi.

Hih Fake Datuk pen summetbawlna in azang, Ringgit Million tampitawh azuak mi 2 tepen October 30 ni in Johor Police te’n mankhia uh cih tuni in ki pulakkhia hi.

Tua Datukship azuak akiman mi 2 te lakah khatpa pen Johor Businessman minthangkhat ahihi. Johor police chief Datuk Mohd Khalil Kader Mohd in agenkhiatna ah hih Syndicate kipawlna te’n “Datuk” leh “Datuk Seri” cihbang in adeihdandan in Title leisakthei uh a, Title khatciang in RM180,000 panin RM280,000 bangtawh leisak uh cihi.

Tuabangin khem athuakte pen Datukship aleitheih nadingin amasa in Exclusive VVIP Club khatah sumpia in Member lutsak masaphot uh cihi.

Datuk zuakin summetbawl akiman mi 2 tepen kum 40 leh kum 57 aphakhin hi a, anih un Batu Pahat aom NGO (Non-governmental Organisation) ah aki limhel mahmah uh cihi. Ahi zongin hih Datukship azuaknavai leh NGO nasepna pen Direct in kisainabel omsamlo cihi.

Hih Datukship azuakban uhah adang pahtawina atuh akibawltawm Fake Award Medals, Royal Appointment Letters, Ceremonial Uniforms cihtezong Police te’n honkhat mankhia uhhi. (Atung a Photo pen Police te’n amatkhiat vanteng alahna ahihi.)

More: Malaysia, Johor ah Operasi lutin gamdangmi 111 kiman, Myanmar 22 kihel

Palik thunei te genkhiatna ah hih kikhem gamtatna vai ah mi 40 bang kihelding in ki ummawh cihi. Datukship aleikha pawlkhat te’n ataktak ahihlohlam atheih ciangin Police te tungah Report akigawm in 13 bang bawlkhin uh a, sumzong akigawm in RM1.34 Million bang supna kikhemna omkhin cihi.

Malaysia gamsung ah Datuk atuh honkhat aom gige nahihtuak mawk hi. Zomi sungahzong Pastor atuh, Evangelist atuh khawng aomkhakding lauhuai hi. Sawltak #zomidaily