Vondeih Kep Ding – 131
Tawngno, Tawngno aw, ka na seppih ngei mikangte papi khat pen na sepna ah nisim phial in overtime om zahzah sem den in, weekend ah zong a om zahzah mah sem hi. Robot lah hi lo cin a, gim lo na hiam’ ci-in khatvei ka dot leh, “Inn om sangin nuam sa zaw ing. Inn ah hi leh ka zi ka tate in hong thusim lo-in, hong ngai lo uh a, thu zong hong kuppih ngei lo uh hi. Anbuk ah om leng innsung ah om gai uh a, innsung om leng anbuk ah kituah gai uh hi. Tua ahih cianga kei adingin, inn ah ka om sang na sepna ah ahih om leng ka lungnuam zaw hi,” hong ci hi.
US ateng Zomite sungah zong hidan om simsim ta leh kilawm hi. Khat bang pen a pa uh in kawlgam panin a zi a ta sam in, a zi a ta te US hong tun ciangin tawmvei omkhawm gai na pi uh tawlkhat khit ciangin a pa uh hawl khia in amau nutateng in inn khat sam uh hi. A pa uh bel mundang ah midangte beel in om, ciliang hi.
A pa un sam kei leh US leitang a tung thei ding hi lo na pi uh in, US leitang a tun khit ciangin lai thei lo a pa, midangte pasal zah in a pil lo, midangte pa zah in a ciim lo a pa uh nawn khin in, taisan ta ngial zen uh! Mulkim huai lawmlawm sa ing. A pa bangzah in a khasia zen tam, ngaihsun zong ngaihsun ngam keng!
Lai thei lo a pa, pau thei lo a nu hangin zum in a lawmte lak ah, a sangkahna ah a nu leh a pa a sam ngam lo zomi khangno tampi om khin ta hi.
Leitung ah siatna lak ah sia penpen in teh, ci zawk sawn ding zong om sa nawn kei mai ing. Nu leh pa that, tate thak, nu tawh kiteng, pa tawh lumkhawm, unau laizom kiteng, numei leh numei, pasal leh pasal kiteng cihte zong nidang in lamdang ka sak hiven, tuhun adingin a lamdang pi hong suak nawn lo mawk hi.
Zandeuh mah in zong ko omna city ah Sen te nupa khat in a tanu kum 4 a pha pan khat that lum in a ansai sung uh ah a nupa un selcip lawmlawm liang hi. Mivomte numei khat mah in a nu teekta in ama kiang ah sum leiba a, pia zolo ahih manin a nu takpi zum ah khia lawmlawm liang hi. Tuate gamtat aw ei, sia zaw deuh, cih ding mahmah om nawn lo zahdong dingin leitung bel a sia hita!
Kisai lo khat in ka phawk thukhat hong gen leng, na lawmte khat peuh in na khat peuhpeuh hong piak ciangin a siat dong mah hoih tak zatsak in, kep sak in la, lua ta, kisia kuan ta ci-in midang peuh pia sawn kei in maw! College kah lai-in ka lawmte khat ka it mahmah van khat ka piak leh amah’n deih khol lo hi ding hiam, ama lawmte khat na pia sawn hi. ka lungsim ah, ka it mahmah a, kong piak himah hiven maw, midang a na pia sawn ding hong sa leng, tua pen hong pia lo mah ding hiveng,” ka ci hi.
Hong phawk,
Na Pa
Columbus, Oh
February 2, 2018
Comment piaknop aomleh...