Jesu itna mah thupi ~ Tg. Samuel Nas

Jesu itna mah thupi ~ Tg. Samuel Nas

Karl Barth. A min a za kha khin i om ding a, a za kha nailo zong i om ding hi. Kum zalom 20 adingin Pasian thuthuk sinna (theology) lamah a din sang pen pawl hi ding hi. Theology huang sungah a khutmate limtak sut ding hi leng mun tampi awh ding a, hun tampi la ding hi. Rom Laikhak hilhcianna bu (commentary) a bawl bang pen tuni tanin hoih kisa-in kigengen lai hi.

A nuntakna nitum kuan lamah khatvei thuthang kaikhawmte khatin thu khat na na dong hi. “Sia aw, kum sawmli val bang Pasian thuthuk na sinna, na suutna, leh na sinsakna tungtawnin bang na mukhia a, bang thupi sa pen na hiam?” ci hi.

Karl Barth in theology kammal golpipi leh telpak theihloh ding Pasian thuthuk bangzah hiam tawh a dawn ding kilamen hi. Ahizongin ama’n a dawnna pen, “Jesu’n hong it ka thei hi, Lai Siangtho in hong gen hi” (Jesus loves me this i know, for the Bible tells me so) cih la tawh na dawng hi.

Hih la pen i neulai in nipi sangah i saksak la, i thupi sim melloh, naupangte la hi i cih lel khat hi a, tua la tawh lawmpa in na na dawng ziau hi. A thak thakin thu hong ngaihsunsak mahmah hi. Thu dang la dangte thupi lo cihna hi lo zaw in, Jesu hong itna leh tua hong itna i theihna kan a manpha leh thupi zaw omlo cihna hi.

Tua hi a, I gengen uh leh I saksak uh Jesu hong itna pen I thei ta hiam? I sang ta hiam? I ciam kha ta hiam? Hih Jesu itna in I nuntakna hong makaih hiam? cih pen ei-leh-ei kidot zel dingin hoih hi. Hih a lian mahmah Jesu hong itna pen theician inah hi leng, I kha dam ding a, a hawm pahpah i lungsim zong itna tawh kidimlet ding hi. “Thawmhau (lonely) na kisak pahpah leh Pasian tawh kigamla hi kha ding hi teh” ci-in Pasian mizat khatin ana gen theih zel pen ahi mah hi. Tua tungtawnin Kumpi David in, “Kei adingin bel Pasian naih mah hoihpen” (Ps 73:28) ana cih ziau zong pen thugil mahmah ahihna zong nungphawk sansan ing.

Hih Jesu itna – hong kipumpiak itna, hong deidan lo itna, hong honkhia itna, leh hong puah hong zuun itna mah pen suutsuut taak cing hi. Hih Jesu itna mahin I nuntakna hong makaih leh ahi ding bang takin mite adingin zong thupha naak kisuak thei pan ding hi. I neih loh pen midangte kihawmsawn theilo hi. Ahizongin Jesu itna nei leng, I neih bangbang kihawmsawn thei ding hi.

American psycologist minthang William James in a gen theih zel thu khat pen, “Micih lungsim sungah lunggulhna a om den khat pen – hong kithupi sim ding leh hong kipahtak ding lunggulhna hi” na ci hi. I sep I bawl na tampitak pen ngaihsun taktak leng, hih lunggulhna hang mah nana hi. Gendan tuam deuhin gen ni ci leng, mikim in lungkimna kizong tek hi. I zonna leh i zondan a kibang lo cih thu hi bek hi.

Jesu sungah lungkimna a zong kha leh a mu khate leitung ah mi hampha pente hi. B’am cih leh hih leitung bekah hilo, sih khit lamah zong a hamphatna uh kibehlap semsem ding hi. Tua banah, amaute in a lungkimna uh Jesu ah mu ta uh ahihmanin a sep khat peuhpeuh uh zong Jesu itna hanga lungdam lahkhiatna hi zaw ta a, mi maipha zonna cihte hi nawnlo hi. Tua manin a gim ni un zong tawldam uh a, a tawl ni un zong lungdam uh hi. Hih hamphatna I tankhak tek ding pen I kideihsakna lianpen hi.

Sawltak Paul kammal kawm ni ci leng, “A kithei khin zolo ding hih Jesu hong itna a zai zia, a sau zia, leh a thuk zia na tel semsem ding uh…” (cf. Efe 3:18-19) i kideihsakna lianpen hi. Hih thu tel leng I nuntakna kilamdang ding a, I khualzinna lampi zong nuam semsem ding hi. Tg. Samuel Nas