Vondeih Kep Ding – 4
Itluat Tawngno,
Napa’n ah thu kong gen ciangin mite’ tuah khak thu, mite’ theih thute hong gen in, lai in hong khak thei zel ing.Tutung in katuah khak thu leh ka mangngilh theih loh thu kong gen ding a, na ngaihsut ding thu khat a sung ah phum kahih manin limtak in simin la, na tel kei leh zong na tel ma dong sim kik kik in maw, Tawng!
Nanu tawh ka kitheih ma, College kum ( 1 ) na ka kah lai-in Kigin ni leh Nipi in inn paukhankapah ciah zel ing. Inn ciah ci-in lai peuhmah tam et lo-in nitak zawlhel dan in lawmte tawh kavak thei zel hi. A ki tangval sak baih mahmah dan kai ve! Kigin ni leh Nipi ni bel khua taw pan khua khung ciang nungak om na teng pen a khin dekdek phial hi ve ung, na Pa te bel hi mahmah sam kong maw…hehehe!
Tua leh Kigin nitak khat lawm te khat in “ka nungak hel na-ah hong zui-in” ci-in hong zawn dihdih hi. Keizong kava zuih dep leh ih khua sung hilo in, ih khua pan in tai ( 3 ) na khawng aom Chanthagyi khua ah hong pai pih vilvel mawk hi. Ka nungak helna uh bel gamla mawk ei mataw! Nungak te inn katung uh ciangin amau na thu nuam peuh mah in khuapih khat mah bangin hong hopih in hong tutpih uhi.
Zolia nu tawh holim in nuam sa-in ka ciak ziahziah laitak un, anhuan buk lam ah a Nu uh va tum in hong pai kik ciangin pakan khat tawh ‘tango pheel’ hong tawi hi. “Piak ding dang lah om kei in… hiah tango…hong ciap sak vo!Tuni ka buhman uh a namtui tam ci-in, tango in su-a, kahuan uhi ven, hong nek sak vo alim kei zongin” ci-in a nu’n ka tutna mai sabuai tung ah hong koih phei hi. Napa zong nek na ding ah ka khut malang sim pian hi diam, pheel khat laphei in kakam ka tun phei pah hi. Inn panin an ne khin lah hi si, a tango pheel zong a golsim pian tawh pheel khat pen gaih hak mahmah mawk hi. Tu-a zii a akizuak te bel pheel khat kam khat zong a pha lo hi mawk ven maw! Ko hun laitawh bel kikhai mawk ei!
Tua leh a Nu’n, “Paukap… ne lai vo,haai kei si uh cia… limsa lo nai vua leh…” ci-in pheel khat hong pia phei kik hi. Keizong ki kamsiam sak nuam lua-in, “ Limsa mah ing…eee, gil bang vah lua kisa, luak bang suak zaw zen ei!” kava cih leh innteek nu’n nuam hong sak lo-in tha khat in amai hong khing pah hi. Tua khit ciangin ka kampau dan uh, ka kiho dan uh hong nuam nawn lo-in, mangpha kapiak ciangin zong ka lungsim sungah saguh bangin hong do do khat om lai mawk hi.
Napa, tu dongin khat veivei tua ci buatbuat thei lai mawk ingh! Na’ng tua bang na hih loh nading napa’n hong lunggulh mahmah ingh! Sim kikkik in kong cih ciang zong zawh thawh thu tawh hong ci hi lo-in, na tel ding ka deihluat man hi zaw hi.
Hong it dawntung,
Napa
January 24, 2013
Comment piaknop aomleh...