Jesu i neih ding a thupipen hi

Pasian Tapa takpi, ama suah nadingin a kilawm khuapi leh kumpi innte om hi mah ta leh, kuama phawkkhak loh, kuama thusim loh bangmah ahi het lo Bethlehem khuaneu ah Jesu hong suak ahih manin, tua Bethlehem khuaneu pen, leitung mi khempeuh in thei-in mu nuam mahmah uh a, leitung bei dongin amin amang ngei lo ding khua khat hong suak ziau hi. Tua mah bangin, na nuntakna sungah pilna, siamna, neih leh lamh sum leh paaite neilo na hih manin, kuamah in hong phawk loin, hong thusim lo dinga, bangmah in hong kimu hetlo kha ding hi. Ahi zongin na nuntakna sungah Jesu mun pia-in, na lungtang sungah amah suaksak a, ama suah nadingin na kiphal nak leh ahun tun ciangin mite’ zahtak, mite’ thudot, mite’ mai-et khat na hi dinga, na min lianin thupi dinga, aki phawk ngei lo, a ki thusim lo na min pen hong lian semsemin hong minthang ziahziah ta ding hi.

Bawng an nekna lo buang kiman nading a om lo, bawngkuang sungah Jesu hong kisial(lupsak)tak ciangin kiman nading anei het lo, tua bawngkuang pen, ama sunga lum Jesu a bia mipilte leh tuu cingte in amah zong abia khawm kha uh hipah a, Jesu suahna thu akigen nak leh tua a lupna bawng an nekna kuang zong aki gen loh hong phamawh ta hi. Hih bawng an nekna kuang lel tak pen, Jesu kisialna kuang hong hi ta mawk ahih manin, leitung bei dongin amin a mang ngei nawn lo ding khat hong suak hi. Tua mah bangin na nuntakna sungah kiman’ nading khat zong nei loin, na hih theih khat zong om kei phial mah ta leh na nuntakna sungah Jesu mun pia-in, amah na neih nak leh kiman’na aneilo na nuntakna pen a manpha mahmah nuntakna hong suak ding hi.

Hih thute i lungngaih tak ciangin, Bethlehem khua a thupi hi lo hi. Bawng an nekna kuang zong a thupi hi lo hi. Jesu tawh kisukha in, Jesu tawh hong kimu kha uh a, Jesu tawh hong kisai kha ta uh ahih manin a minthang leh a thupi hong suak thei uh ahi hi. Jesu anei nuntakna pen a manpha mahmah nuntakna ahi hi. Tua mah bangin Jesu aneilo nuntakna pen a lauhuaipen leh a man neilopen nuntakna ahi hi. Minthan’na leh manphatna taktak pen, pilna siamna leh sum leh paiite’ tungah kinga masa lo zaw a, Jesu i neihna tungah kinga zaw hi. Tua ahih manin, i nuntakna sungah Jesu mun pia masa phot limlim in, amah i neih ding pen a thupipen leh akisam masa pen ahi hi.

Lai hong simsak mimal kim tungah, Jesu suah lungdamna thupha hong tung ta hen.Amen.

Khazih sungah,

David Tuang