Japan ah vanlengneu khat akiatzawh nai 14 sungin ki honkhia zolo ahih manin mi 4 in sihlawh

Japan gamsung Toyama Prefecture aom Northern Japan Alps ah vanlengneu khat kia in, ahunlap in kihontheilo ahih manin, vanleng sungah atuang mi 4 te asisa in kimu cih AFP pan kiza hi.

Saturday ni vanleng akiatkhit phetin vanleng sungah atuang Passenger khatin huhngentna “Distress Call” sampah cihi. Japan Police te genkhiatna ah Passenger khatpa in vanleng akiatlam hong zasak cihi.

Vanleng sungah akigawm in mi 4 atuang ci a, ahawlpa Pilot leh adangkhat pen khua phawklo in, amau Passenger 2 tepen khuaphawk ahih manin, Emergency Phone Call asamthei uh ahihi.

Ahi zongin khuahun hoihlo in mei sahlua mahmah ahih manin, Police te’n tua vanleng akiatna munpen mukhiazolo uhhi. Vanleng kiatna pan Distress Call akisapzawh nai 14 khitciang in tuahsiatna aphual kimukhia zopan a, ahi zongin vanleng sungah atuang mi 4 te avekun sikhinta cimawk hi.

Tua vanleng kiatna pen Mount Shisidake mualpanglam hi a, Altitude 2300 Meter bang phading kici hi. Khuahun pen votlua mahmah in Temperature pen Zero dong atungsuk ziauziau theihna munkhat ah kiakha citciat hi.

Vanleng tungah atuang mi 4 tepen pilot Takao Kinoshita (kum 57), Eiji Oguchi (kum 48), Kazuki Higuchi (kum 22), Katsuki Kasai (kum 21) cihteng ahi uhhi.

Japan Transport Safety Board te’nzong Sunday ni in hih vanleng kiatna “Crash Site” ah Officials mi 2 paisak uh a, Accident apianzia hoihtak kanciansak uhhi.

Vanleng kiat hunpen Saturday nitaklam 3pm hunpawl hi a, vanleng pen Single-engine Cessna 172P (propeller plane) namte ahihi. Toyama Airport panin Matsumoto Airport zuanin alengkhia cihi.

Ministry of Land, Infrastructure, Transport and Tourism te genkhiatna ah tua vanleng pen Toyama Airport panin 2:23pm hunin alengkhia hi a, Matsumoto Airport ah naikhat khitzawh ciangin atungding in aki lamen cihi.

Related: Japan vukkhalmual kicipna hangin sangnaupang 8 si, 6 liam, 3 mangcip ~ ZD

Vanleng akiatcil laitak in Passenger khatpa ii zaksakna ah asi kuamah omnailo himahleh akiatna aphual kimukhiazo paklo ahih manin, tuazawh nai 14 khitciang in avek un asi himawk hi. ZD Sawltak #zomidaily