Iraq ah Suicide Bomb puak, mi 100 kiim in sihna tuak

Iraq ah Suicide Bomb puak, mi 100 kiim in sihna tuak

Nov. 25, 2016: Iraq khuapi Baghdad panin km. 100 gamla a om Hilla khua-a petrol station ah sihpih truck bomb kipuaksak a, mi 100 kiim in sihna tuak uh hi. Sihna tuak a tamzawte pen Iran gammi biakna pia dinga khualzinmi (pilgrim) Shia Muslimte hi ci-in zan in police leh medical sources in pulak hi.

Shia Muslimlimte pen Islam biakna panin a lamkhial leh lampial (apostates) hi a ci IS ten hih sihpih bomb pen ko puahsak hi ci-in kipulak uh hi.

Iran gam panin Shia Muslim biakna pia dingte pen Karbala khuapi ah kum zalom 7 BC in a kithat Islam biakna phuankhiapa Prophet Mohammad’ tupa Imam Hussein’ sih ni phawkna Arbaeen pawi a kihel dinga pai ahi uh hi. Arbaeen pawi pen ni 40 sung kibawl ahi hi. Iran Shia sihna tuak lote a gam uh-ah kipuak kik pah hi.

Bomb puahna munah restaurant om a, tua mun pen khualzinmite tunna mun ahih manin hih mun ngim in kinei hi. A bomb puak hat lua ahih manin bomb puak them leng ten khualzinmite tuanna bus nga kangsak hi ci-in police ulian ten ci uh hi.

Iran Foreign Ministry in hih thupiang a mawhpaih thu pulak a, Iran Foreign Ministry spokesman Bahram Qasemi in hih thupiang hangin Iran in terrorism a dona khawlsan tuan lo ding hi ci hi ci-in Tasnim news agency in suaksak hi. Source: The Hindu/ Thang Khan Lian