Syria ah tunglam panin Turkey galkap 3 kikaplum, Turkey in Syria ngawh

Syria ah tunglam panin Turkey galkap 3 kikaplum, Turkey in Syria ngawh

Nov. 25, 2016: Turkey galkap ten zan zingsang 00:30 GMT in tung lam panin galkap thum hong kikaplupsak banah sawm in liamna tuak a, Syria galkapte hi ci-in ngawh a, a kikapna bel gen lo uh hi. Turkish news media Syria leilu lam-a om Al Bab khuapi hi ci-in gen hi. “Hih pen Syria galkap ten Turkey galkapte a thah masakna uh ahih manin buaina nakpi takin kibehlap ding hi,” ci-in Jazeera reporter Osama Bin Javaid in Syria-Turkey gamgi Gaziantep panin gen hi.

Al Bab khuapi pen mun poimawh mahmahna kiim “strategic area” hi a, Syria leilu lam Turkey tawh kigamgitna mun-a om hi a, ISte khuapi Raqqa leh rebelste hatna Idlib zuatna lampi ahi hi. “Tu zingsang tungin bel Syria kumpi gum pro-government websites kici ten ISte suamna hi ci-in gen uh hi,” ci-in zan in Osama Bin Javaid in gen hi.

Turkish prime minister’ zum in zan a governor administrative building ah car bomb kipuaksak leh Syria galkapte kikaplupna thu khahkhiat (broadcast) lohna dingin news tawl khat sung a kikhakcipna dingin thupia hi ci-in Supreme Board of Radio and Television (RTUK) in pulak hi.

September kha-in zong Syria leilu lamah ISte leh Turkey galkapte kikaptuahna Turkey galkapte thum a sih banah khatin liamna na ngei ngei hi. August kha in zong Jarablus ah Turkey galkapte tank kisuamsak a, galkap khatin sihna na tuak a, Turkey in Kurdish YPG galkapte hi ci-in ngawh hi. Syria ah Turkey galkap sagih a sihna suak hi.

August 24 in Syria kumpi phalna om lo pi-in Turkey in Syria ah galkap sawl a, “Operation Shield Euphrates” galdona ci-in ISte leh Kurdish YPGte dona ding hi ci-in pulak a, US galkapte leh Syrian rebels Free Syrian Army (FSA) kicite tawh kipawl in, Aug. 24 in Jarablus khua ISte khut sung panin laksak pah uh hi. Ahih hangin Turkey ngimna lian pen ISte do ding hilo a, Turkey gam-a Kurdish rebels PKK kicite leh YPGte kipawl hi cih ngawhna tawh Euphrates nisuahna lamah YPGte a lut ding a dal nop man hi zaw hi.

Tu dong Turkey leh Syria galkapte bel kikaptuah nai lo uh a, Syria leilu lam-a rebelste hatna munte Turkey galkapte a hun khop om uh hi ci-in Al Jazeera reporter Javaid in gen a, ISte khut panin Jarablus a lak khit ciangun ISte ukna Al-Bab nawk in la uh a, tu-in Syria gam-a rebels tuamtuamte kipawlna leh Kurdish rebelste tam mahmah SDF kicite ukna Manbij lak ding a ngim laitak uh ahi hi. Source: Al Jazeera News And News Agencies/ Thang Khan Lian