Interview ih cih den zong!! ~ Zomi Quavadis

Interview ih cih den zong!! ~ Zomi Quavadis

Tusung teng ei Zomi sungah thu kidotna, holimna (Interview) cihte kilimzat pha mahmah hi. Milian khat ahih keileh mi vaangnei khat tawh kimuhna om leh Video-camera nei khempeuh phial in thu dotna leh holimna neih pih pahpah nuam uh hi. Hih pen kei mimal ngaihsutna ah nidanga ih lungsim sungah ih ngaihsut khak ngei loh, gamdang ih tun cianga ih ngah khantohna khat hi dingin ka ummawh a, sia ka sa het kei hi. Ahizongin tua bang Hoilmna/ Interview cihte Facebook sung leh utube ah ih et ciangin lawphuai mahmah hinapi en khin le’ng hunbei teng pammaih ih sak kik hun om thei zel zel hi.

Bang hang hiam cileh thudongte a tamzaw in a thudot pa/nu uh kua mi hiam, banglam ah pilna nei a, bang teng sem hiam cihte leh a Background kan masa het lo uh cih kitel thei hi. Dot theih tah cia ut bangbang a dong phial gawp mang zong om kiukiu leh kilawm ka sa hi. Kamphatna tawh Pu Lengtong Kamkhen in tua banga thu kidong te dawndawng thei bilbel hikei leh ei mi sunga ih thudot mipil tampi tak pen mihai leh thu thei lo a suaksak ek thei dingte ih hihi.

Mi pawlkhat in Pasian thugen mi minthangte tawh Interview abawl uh ciangin gamvai leh minam vai, leitung thu peuh puak liangin dong giap thei uh hi. Cingtaak takin dawng thei kei uleh a dongte leh thungaite’n neubawl in hawmthawh thei uh hi. Siang gen lehang Pasian thugente, Pasian nasemte leh Pasian thu tawh a kinahvawh zaw deuhte pen amau theih ahi Pasian thu bek mah dong thei lehang hong dawng khial lo ding uh a, a gen khempeuh uh mal tu mahmah ding hi.

Tua lopi in amau tel kholloh, amau Major subject ahilopi khat ih dot khak ciangin kikhial thei hi. Mi pawlkhat in amau hoihsak leh amau theihdan peuh tawh maan ta kei leh dawng thei giap ek lai uh hi. Tua in minam sung ah kitelkhialhna piang sak thei hi. Tua ahihman in a dawng dingte’n zong a theih loh, a telloh thu uh a kidot khak ciangin hangsan takin “tua tawh kisai ken gen thei keng” cithei uleh mipite’n paakta zaw ding uh hi. Tua mah bangin leitung thu tawh min anei, mi minthang khat thu dotna ih bawl ciangin Pasian thu leh Pawlpi vai peuh dong mawkmawk kei lehang hoih mahmah ding hi.

A dawng dingte’n zong amau subject hilopi khat a kidot ciangin dawn theih tah ciin ut bangbang gen suk mengmeng kei leh hoih in um ingh. Pu Lengtong Kam Khen zah a khuaktai leh ciamnuih siam, a kidong khempeuh a dawng thei ziauziau ding mi kikhaat hi. Amah pen amah himawk ahihman in ama gen bangbang ama munah ahi hipah lel hi. Ei pen amah hi lo hihang cih kiphawk ciat ni.

Interview abawl ding peuhmah in ih thudot ding pa, ih holimpih ding pa tangthu/ Background, a sep a bawl leh a nuntaakzia ih kan masak ding kisam sa ingh. Lawmta kiho hisam lo hihang. Tua ahihman in thu ih dotpa pen zahtaakna tak tawh hoih tak thu dong in vaang pia thei le’ng aza a en mipite aa dingin hong etlawm mahmah ding hi. Thu ih dotpa pen mipil, mi minthang khat ahih sam hangin mihing mah hi veve ahihman in thu khempeuh la khempeuh thei khin tel khin sam lo ding hi cih pen ei a dong dingte lam pan ih theih masak ding zong kisam hi.

Mipil khat ahihna tawh ih theihnop thu khempeuh, ih telloh thu khempeuh dot gaih khit ding zong hi sa keng. Interview bawl dan siam lehang ih makai mipilte’n zong mipite hong makaih khial lo dingin ka lamen a, ei munsan tekah thu kidot dan leh holim khop dan siam lehang khantohna om dingin zong lametna lianpi ka nei hi. Facebook leh Utube sunga Interview ih et theih zelte zong hong muhnop in pilna siamna tampi neih lawh zaw ding hihang cih zong kei lametna hi.

Itna tak tawh “Zo Sunni” pan,
Francis Lamthang (Zomi Quavadis)