Inndawn panin akia dektak naupangno khat ahunlap in kihonkhia

Inndawn panin akia dektak naupangno khat ahunlap in kihonkhia

Abeisa Saturday ni in France, Paris khuapi sungah naupangkhat inntung panin kiasuk dektak in kikhai lenglang hi. Tua naupangno pen kum 4 bekbek aphapan hi a, inntungdawn inndawl 4 Floor ii apualam Balcony panin akiasuk dektak ahihi.

Tualaitak pasal khatin amuh ciangin ama nuntakna khualman nawnlo in, amanlang takin Building tungah kahto saisai in, tua naupangno honkhiathei hi.

Hih thupiang pen Northern Paris ah abeisa Saturday nitaklam 8pm hunpawl in thupiang ahihi. Tua naupang ahonkhiapa pen amin Mamoudou Gassama kici a, kum 22 aphakhin khat ahihi.

Tuabangin naupangno ahotkhiat laitak Video kizaihkha in, Social Media tungah aki khahkhiat ciangin leitungbup ah ki thehzakpah zihziah hi.

Firefighter tezong tua naupang ahonkhiading in kisam himahleh, Firefighter te atunma in tua acimawh naupang pen Mamoudou Gassama kici pasalkhat in nahonkhia khinta hi.

Fire Service Spokesman khatin AFP te tungah agenkhiatna ah kamphatna tawh acidam, athahat, ahangsan khatin ahunlap in naupangno pen nahonkhia khinta hi ci’n genkhia hi.

Tua ahonkhiapa pen West Africa gamsung aom Mali gammi ahihi. France gamsung ah gambel in atunzawh sawtnailo a, Refugee gambel in aomlaitak ahihi.

Piancit gamsung ah gammakaipipa ahi French President Emmanuel Macron inzong hihthu azak ciangin lamdangsa in, thupizong samahmah ahih manin tuapa pen tuni Monday ni in Elysee Palace ah kimuhpih dingin samsak kici hi. Tuaban ah France gamsung ah akhantawn aomtheih nadingin ki vaihawmsakding cihzong kiza hi.

Naupang ahunlap in ahonkhiapa Mamoudou Gassama in agenkhiatna ah mihon a awngziahziah kaza a, mawtaw Horn tezong kitum ziahziah hi. Inndawn panin naupangkhat aki khailenglang kamuh ciangin amanlangin kakahto mengmeng a, ahunlap in naupangno honkhiathei kahih manin Pasian tungah kalungdam hi ci’n genkhia hi.

Tuapa pen naupang ahonkhiading in akahtoh saisai laitak in launa lungsimzong neimanlo himahleh ahotkhiat khitciangin khuanung lausan in, hoihtakzong dingtang theilo in aci kisatgawp cihi.

More: Naupang 3 bualtui sungah tuikia in asihna CCTV ki khahkhia

Paris Police te genkhiatna ah tua naupangpen amahguak inn ah aom hi a, anu apa te innsung ah kuamah omlo uh cihi. Tua ahih manin, apa pen kiman in thusitna thuakding hi. Naupang khatguak anutsiatna hangtawh thukhenzum ah thu kibawlding cihi. Naupang ii anu ahihleh Paris khuapisung ah omlo in, mundang ah azinkhiat laitak kici hi. Video sungah Spiderman pen akineihtawm himahleh hihpa gamtatna pen Spiderman taktak “Real life Spiderman hi ci’n kipahtawi ngeingai hi. Sawltak #zomidaily