Indonesia ah pasal khat aki gui awk (Suicide) laitak Facebook Live in khahkhia

Indonesia ah pasal khat aki gui awk (Suicide) laitak Facebook Live in khahkhia

Indonesia gammi khat amahleh amah aki gui awkna, khautawh aki khailup laitak, Suicide laitakpen Facebook Video tungtawn in Live Broadcast in khahkhiamawk ahih manin, Indonesia gammi te linglawngsak mahmah cih Jakarta Post pan kiza hi. Tuabang aki gui awkna Facebook Live in akikhahpen Indonesian Government in atheih ciangin Social Media Platform neite ahi Facebook te tungah amanlang in alakkhiatsak nading un kumpi in ngetna neihsak cihi.

Indonesia Communications and Information Ministry panin Director Samuel Abrijani Pangerapan in agenkhiatna ah gammi te tungpanin Report ka ngahkhit phet un Facebook thunei te tungah ngekna kibawlpah in, Suicide Live Video akikhahpen aphetsak nading un ki zasakpah cihi.

Amahleh amah aki gui awk, aki khailumpa pen kum 35 aphakhin khat ahihi. Friday ni zingsang 9am hunin Facebook Video tungtawn in Live Broadcast in aki Suicide laitak khahkhia cimawk hi.

Facebook te tungah Indonesia kumpi in ngetna bawlsak ahih manin, tua Live Suicide aki khahkhia Video pen tuani nitaklam 8:30pm hunpawl in ki lakhiapan cihi. Zingsang 9am panin nitaklam 8:30pm kikalsung in Facebook leh adangdang Social Media tungtawn in mi tampitak in aki khailupna Video mukha uh cihi.

Facebook Live akhahma in aki khailumpa in amah ii Facebook tungtawnmah in laigelh in nusia hi. “Amah pen ngaihcihtak in ka ngaih himahleh keileh ka tate hong nusia in hong taisanzen hi. Koilam hong taisan cih kathei kei hi. Bangpianghiam cihzong genthei keng. Bang kacihdiam cihzong geeltheikeng. Ngaihsut hamsa salau ing” ci’n Facebook tungah gelhkhia cihi.

Tuabang in agelh khitciangin agawl panin kikhailum a, aki khailupna Live Video pen nai 1 leh Minute 45 bang kizaihkha cihi. Tua Video pen Facebook tungah nai 12 sungkhawngbek ki enthei himahleh 100,000 veibang ki enman cihi.

Indonesia Communications and Information Ministry in tua Video pen Social Media tungah akhahsawn, ahawmsawn aom peuhmahleh “Electronic Information and Transactions Law” aom bangin thukhenna tuakding uhhi ci’n mipi te’n Online ah akhahkhiatloh nadingin thupia uhhi.

Ukdan zong atuamtuam hi. Zomi sungahzong pawlkhat Facebook natna (Facebook Disease) anei omleh kilawmmai hi. Athupi hethetlo, amau ii Personal vai, innkuansung vai, avakkhiatna, mawtaw tuanna leh annekna cihbangpeuh Facebook Live in akhahkhiakhia ompongmawk hi.

Midang te’n muhpihleh amu te’n bang phattuamna a ngahdiam? Ahih keileh akhahkhia te adingin akhahkhiatna hangin bang phattuamna aomdiam? A ngimna taktak uh bang cih honggenloh uhhangin, atamzaw (atamzaw) pen aki sialnuam uh hihtuak lelmai uhhi. Indonesia gammi pa sangin ahehpihhuai zaw ihhih khakding lauhuai 🙁 ZD Sawltak #zomidaily