India ah pasalno khat akivui dingin hanlam azuat laitak khua phawkkik

India ah pasalno khat akivui dingin hanlam azuat laitak khua phawkkik

India, Karnataka State sungah pasalno hanah aki vuidingin aki paipih laitak, silo in khuaphawkkik ahih manin zato ah ki nawhtaipih mahmah cih Times of India pan kiza hi. Managundi Village ah thupiang hi a, hih pasalno pen kum 17 aphakhin khat ahihi.

Amin pen Kumar Marewad kici a, abeisa khakhat hunlai in ui in pet cihi. Nungkal in aci sagawp ahih manin, Dharwad Hospital ah zato lumding in kipuak hi. Zato ah noptuamlo in suksemsem ahih man nakzolo a, anaktheih nadingin Ventilator settawh ki naksak hi.

Apet ui pen ui vakvai “Stray Dog” akici te khat hisawnsawn hi. Siavuan te’nzong bawlzawh ngapnawnlo in, hih anatna Ventilator setpen lakhialeng anuntakna beitading hi ci’n genkhia hi. Ui petna panin agu teng apumpi bupah kizelmangta ahih manin, zato ah hihbangin koihnuamlai maw, ciahpih maiding cih Doctors te’n dongtamawk uhhi.

A innkuanpih te’nzong Doctors te’n aki ngapnawnlo himawk ahihciang ci’n anunung ah innlam ciahpihding khentat uhhi.

Inn ah akikep laitak in tua pasalno pen apumpi tangnawnlo, zong naknawnlo ahih manin a innkuanpih te’n asita hipetmah ci’n ameltheih tanau tengin aluang vuiding vaihawm uhhi.

Khuapihteng inzong hih pasalno vuiding vaihawmpih uh a, ama adingin anunungpen thungetna neihsakding in kithawi uhhi. Hanlam zuanin apaikhiat zawhuh innpan Kilometer 2 khawng atunkhitdeuh uhciangin tua avui bawlsawm uh pasalno pen amit hak cimawk hi.

Tuapan in akhut leh akhe tezong hongtangkik in, hong nakkik cihi. Tuaciang in Gokul Road aom Hospital khatah amanlangin taipihuh cihi.

Dr. Mahesh Neelakhantannavar kicipa ii genna ah tua pasalnopa pen uipetna hangin Meningoencephalitis akici Infection ngahkha hiding hi ci’n genkhia hi.

Pasalno ii anuleh apa tepen nisim in ak bangin muhtawm nektawm in aneite uh hi a, annek tuidawn hamsatna hangmahtawh atapa uhzong Class IX panin khawlin innkuan adingin na asemkhat cihi. Construction nasep semin innkuansung avakkhat ahihi.

Ama tunga asanggampa zong apumpi cidamlo, “Physically Challenged” khat hisawnsawn ahih manin, hih atapa uh zatui kibawlnading kakisam mahmah uhhi ci’n anu apa te’n genkhia uhhi. Huhzawhna aomloh hangin lung nop hetkei mawk ei. ZD Sawltak #zomidaily