India ah naungek suakcil asikhin kisa in zato te’n Plastic Bag tawh vuiding in piakhia

India ah naungek suakcil asikhin kisa in zato te’n Plastic Bag tawh vuiding in piakhia

India gamsung aom zato khatah naungek suakin asilopi pen Doctor te’n asisa in asuak hi cimawk uh a, Plastic Bag tawh piakhia uh cih TOI pan kiza hi. Max Hospital ah Thursday ni in thupiang hi a, hih thupiang hangin tua Max Hospital te kimawhsak mahmah hi.

Athupiangzia ahihleh nupi khatin Max Hospital ah khacinglo “Premature” in nausuakkhia a, naungek pen apeeng “Twin” hisawnsawn hi. Naungek apeeng te lakah khatzaw pen asisa “Stillborn” in suak ahih manin, akhatpenzong Doctor te asisa in asuak ci’n ciamtehziau uhhi.

Tua asuakcil naungek nihte ii aluanghawm pen Polythene Bag sungah zato nasem te’n akoihkhit uhciangin nausuaknu ii ameltheih te kiangah piakhia uhhi. Tuakhit ciangin ameltheih te’n tua naungek apeeng te ii aluanghawm pen hanmual ah avuiding, Cremation abawlding in paipih uhhi.

Tuabang in hanmual ah vuiding in akithawi laitak un tua Plastic Bag te aling, atang mukha uh a, tuaciang in naupang suakcil te khatpen asinailo ahihlam kitheikhia hi. Tuaciang in amanlang in Nursing Home khatah kipaipih a, ahi zongin lametna omnawnlo cihi.

Max Hospital te’nzong hihvai tawh kisai in athu hoihtak akician in kanteelna “Detailed Inquiry” kibawlpahhi ci’n thunei te’n genkhia uh a, naupang asuaksak Doctor zong anasep panin dinkhawlsak “Forced Leave” piaphot uhhi.

Tua naungek ii apu ahi Praveen Mallik kicipa in agenkhiatna ah tua naungek suakcil te ii aluanghawm pen atawi kahihi. Tualaitak in aling themkhat kaphawkkha hi. Tuaciang in amanlang in akituunna Plastic Bag kahongpah saisai a, naungek khatpen anaklai kamu hi. Tuaciang in amanlang in ageinai aom Nursing Home khatah kapaipih uhhi ci’n genkhia hi.

Hih naungek apeeng tepen numei khatleh pasal khat ahihi. Asisa in asuak pen numei hi a, asinailo pen pasalno ahihi. Tua anaklai pasalno pen West Delhi aom Nursing Home ah kikem a, ahi zongin Critical Condition ahih manin, anuntakding lametna tamhetlo hi ci’n apu in genkhia hi.

Delhi Police te’nzong hihvai tawh kisai in Delhi Government in Inquiry bawlding in thu piakhin cihi. Union health minister J P Nadda in agenna ah hihvai pen kamsiat huai mahmah hi. Delhi Government in hihvai hoihtak akancianding leh akisam bangbang in Action alakding in thu kapiakhin hi ci’n genkhia hi.

Delhi chief minister Arvind Kejriwal inzong Twitter tungah agelhkhiatna ah Enquiry bawlding thu kipiakhin, mawhna akimuhleh akhauhpenpen “Strongest Action” kilading hi ci’n gelhkhia hi. Hihbang thupiang thulamdang hangin lamdangsa in ka linglawng mahmah uhhi ci’n gelhbeh hi.

Hih naungek te ii anupen Max Hospital ah kikemlai, zato lumlai ci a, amah pen bangmah patauh nading omlo, Stable Condition kici hi.

Video: Parents Given ‘Dead’ Twins In Plastic Bags By Delhi Hospital, 1 Was Alive

Naungek ii Uncle khat ahi Deepak Bidawat kici in agenkhiatna ah hihvaitawh kisai in thuman “Justice” aom mateng in lungphona kaneiding uhhi. Hih Max Hospital ii Licence pen ki Cancel sak henla, ka tupa si hi ci’n agenkhia Doctor pen thong kikhia hen ci’n genkhia hi.

Delhi police spokesperson Dependra Pathak inzong agenna ah hihvai pen FIR Filing kibawlkhin, Investigation pen akipankhin ahihi. Thukante muhkhiatna Probe tungtawn in akisam bangbang in Action kilading hi ci’n genkhia hi.

More: Naungek suakcil khat vankhak bangin tuamcip in tagah kepna puaksak

Hih cibangdan buaina Incident pen tukumsung City Hospital panin anihvei apianna ahihi. Abeisa June khasung inzong Safdarjung Hospital ah nausuakcil khat Doctors te sihi ci’n agen khiatkhit ciangin anu apa te’n anungtalai ahihlam mukhia uhhi.

Tua naungek pen nai 24 sung Oxygen Support tawh kikem in, ahi zongin akhuanung ah siveve hi. Sawltak #zomidaily