Naungek suakcil khat anu in kemnuamlo in tagah kepna ah vankhak bangin khaksawm
Naungek asuakcil khat anu in kemnuamlo ahih manin, tagah kepna Orphanage khatah Courier Service zangin puaksak ahih manin anuntakna beilawh dektak cih Chinese Media te’n genkhia uhhi.
China, Fujian sungah abeisa Wednesday ni in thupiang ahihi. Van apuak kawikawi Courier khatpa kiangah numei kum 24 aphakhin khatin vanpuakding ap hi. Tua Courier pa’n avan phelkhia in a etsawmleh vankhaknu in aphelkhiatding phallo hi.
Tua Courier pazong tagah kepna Orphanage ah vanpuakding in apailaitak naunekkap awging zakha ahih manin, lamdangsa in avansung aphelkhiat leh naungek suakcilkhat Package sungah akiguang nahimawk hi.
Tua vankhak Package pen Plastic thuaptampi in kituam a, ki hoihtun mahmah in, aphelkhiat ciangin asungah naungek suakcil khat na ommawk hi.
Naungek suakcil pen alaigui nangawn kitankhia nailo in, akizomsa in omlai hi ci’n Beijing News te’n genkhia hi.
Hih thupiang pen lamdang kisa bekthamlo, ki mulkimtek mahmah hi. Video Clip atomcik akizaihkha zong om a, Courier papen mi tampi in huh ngeingai uhhi. Video sungah nupi khatin naungek tawisak in, adang pasal khatin naungek akam ah pattawh tui themcikcik in zutsak hi.
Khuahun lummahmah lailai in, 37 Degree Celcius bang hi a, tua Package sungah tawmvei omsuaklai hileh tua naupang pen lumlua, nakzolo in sisuakding kici hi.
Courier pa’nzong amanlang in Police te zasakpah in, huhna ngenpah hi. Police Officers te’nzong tua naungek pen amanlang in Jinan District Hospital ah puak uh a, zato atun ciangin anuntakna bangmah patauhhuai omnawnlo kici hi.
Related: Naupangno kum 4 khat innsangdawn panin akiasuak madeuh in ki honkhia
Tua naungek ii anu zong ki kankhia theipah in, kumpi thunei te’n manpah uh a, thusitna nei uha, naupang pai “Child Abandonment” tawh thu kibawlding cih kiza hi. Sawltak #zomidaily
Comment piaknop aomleh...