Malaysia ah Immigration Officer akineih pasalkhat kiman

Malaysia ah Immigration Officer akineih pasalkhat kiman

Malaysia gamsung ah Immigration Officer akineih pasalkhat zanni Thursday (March 29) ni in kiman cih theSun pan kiza hi. Tuapa pen kum 45 aphakhin khat hi a, Immigration Department ah Senior Official asem akineih kici hi.

Hihvai tawh kisai in Immigration Director-general, Datuk Seri Mustafar Ali in agenkhiatna ah tuapa pen amin James Tay kici a, Bandar Sunway kuamsung panin zanni 12:15pm hunpawl in akimankhia cihi.

Tua Immigration Officer akineihpa pen Bandar Sunway sungah mikhemding, mimanding in aomlaitak in Immigration Department panin Officers taktakte leh Special Operations and Analysis Division te’n amatkhiat uh ahihi.

Tuapa pen aki mankhiat laitak in apumpi tungah Immigration Department te ii Uniform khat silhlenlan in, apanmun aza pen Senior deputy assistant director of Immigration (TPPK) ci’n kisuang lenlan hi.

Tuapa ii vanzat ahi thungkuah “Bag” khatzong ki mukhia a, tua thungkuahsung ah Immigration Department Authority Card tuamtuam, Immigration Department Staff Card 5, Special Pass 9 cihtezong kimukhia a, tuatezong avekin atuh vive hiding in ki ummawh hi.

Tuapa pen Immigration Officer akineihzawh kum 6 bang phakhin khading hi ci’n Immigration Director-general in zanni in Reporters te tungah genkhia hi.

Tuapa ii aomna Puchong Jaya ahzong kipaipih a, a innsung ah Immigration Department Uniform 9, Indonesian Passport 1, Passport Travel Certificate (SPLP) 1 cihtezong ki muhkhiatbeh hi.

Gamdangmi Work Permit aneilo tezong kong bawlsaktheiding ci’n mikhat ciangin RM3,000 panin RM4,000 ciangbang sumngen in atuh bawlsak hi. Tuabangin abawlsak gamdangmi nasemte pen Immigration Department te’n amatkhak, thusitna aneihkhak uhciangin atuh ahihlam kitheikhiapan hi.

More: Gamdang mite alutsimsak KLIA ah nasem Immigration Officer honkhat kiman

Immigration Department te’n hihpa Officer akineihsung in mi bangzah khemmanhiam cih akancian laitak hi a, tuaban ah Immigration Department tawh sepding aom khatpeuh puaisa (Agent) zanglo in, Direct in Immigration Department tawh sepdingzong Director-general in mipi tungah vaikhak hi. Sawltak #zomidaily