Covid-19 dalna (Kiallap) zatui

Covid-19 dalna (Kiallap) zatui

Vaccine khat a pian theihna ding ahuampi in atawmpen kum 8-10 bang hunla hi. US bangah tulaitak ih kisut Covid dalna-zatui te pen FDA in Emergency Use (kiallap) zatdinga approved bek ahihi. Muanhuai nailo cihna hilo zaw in; Vaccine cih min tawh approve na dingun ahun tomlualai bek ahihi.

Pfizer/Moderna company te ii mRNA vaccine acih te bang 95% အောင်မြင်/ success himawkin alamdang mahmah leitung pilna ahihi. Thulela tuamtuam hangin akisun nuamlo/ngamlo mitampi tak omthei mah dinghi. Aizongin Coronavirus Variants acih uh (akhang hanhan bek hilo in anamtuamtuama akikhel themthum den) virus nam te pan mailam ah ih kidal theih nadingin, hi mRNA based technology tawh tulai mipil te lungmuang mahmah uh hi bilbel hi.

US bangah tulaitak Phase (3) na vaccine akisun laitak ih hi a, kum 12 pan atungsiah teng kisun thei ta hi. Mipibup 100% ih kisut kei phial zongin, atamzaw tham kisun khin peuh leng, Herb Immunity acih Gambup virus pan bitna ki ngah ding hi a, tuading in US kumpi in lampi tuamtuam tawh hong hanciampih ahihi.

Notes:

Tuciangciang kum 12 pan atungsiah mikim kisun thei (Khangham te leh natna dang tuamtuam anei te kisut huai phadiak)

Hi zatui pan akingah thei Allergy bel samsawpna,satpiang le cosmetic vanzat te ah akihel den Polyethylene glycol hi pen, ci

Covid19 natna aneilai tak ten bel adam khit uh ciang, kidalna zatui kisun pan leh, ci

Zatui (a dose kim) kisutsiang zawh kal (2) khit ciang Mask thuah kul nawnlo/lungmuan huai zaw ta, ci

Hi zatui ih kisut te pen kum 1 kimang ding maw, khantawn kimang ding cih ki gen thei nailo. Booster dose acih ki sut beh ding khat bel geel leh kilawm; adiakin khangham pawl te ading hikha thei, ci

Side effect: kisut khitciang ni 1-3 sung;

ban ngolh (ih pumpibup adingin lungno dona ih ban muscle in athohkhia aihman in, ih kisutna ban pen golh/bawk/ana ding mah hi)

Cisik/cisa (lungno dona te ih pumpi ah kizel ta a, nidanga a omngeilo nate hong omta aihman, ahi ding mah hi)

Tylenol/Paracetamol te anat sung teng nai 6 hal ta in ne leng noptuam pah sam hi.

Thuumna:

Covid19 natna leh hi vaccine te pen ahun kum 1 val bek hi pan a, mipilmisiam te inzong akankan abawl hoih tohtoh hi in, athu kicingsiang zo nailo suak hi.

Hi ka gen te athei khin zong tampi ki om dinga atheinai lo khat le nih ading ngaihsutpiakna bek ahihi.

Cisil, Khutsil, Sanitizer zat cih te bel ih khantawn a ih zatsuak ding hi lel hi; bacteria tuamtuam, virus tuamtuam te tawh ih ki pelh zawk nang hi a, pumpi sunglam/pualam cidam nang zong hipah hi. Lungdam ei leh, Peter Langpi