Idol gencianna ~ Pu Thangboi

Idol gencianna ~ Pu Thangboi

Rev. Dr. Do Suan Mung’ gelh “Zomi Idol” pen Idol vai kigelh khempeuh lak ah balance sapen ing kacih leh Rev. minsuang khat in hong ko ngingei mawk hi. Lamdang kasa vat peuhmah a ka kankan leh ama’n zong tua vai lai khat na gelh hih tuak hi. Ama’ gelh bel simkha keng.

Sia Mung’ gelh kacih pen amasapen agen kahi hi. Tuni a hong suahsak beh “Azom” acih pen bel kei’ muhdan tawh kituak khin samlo hi. Ken bel tulai a lasiam Idol kicite leh LST sung a Idol bel kisai sa keng. Idol phuan masate Pasian’ thu-umlo ci ih hih leh khuado phuan masate zong Pasian’ thu-um hi zenzen lo hi. Ahi zong tuazah a buaina liang ding ahih leh mindang khat phuak mai leng aci hi’ng. Azadah ih tam luat leh kitotlawh zawhzen sang in kammal dang khat zang maileng aci hi’ng.

Zomi Idol Tangthu
Zomi Idol neihna ding idea hong pia masapen Singapore pan Pu Thawn Kel hi. 2006 kum Pu En Khan Nang, Pu SB Langhno, JK Kam cihte pawl tawh ZOMUS makai kasepkhop laipek un Zomi Idol neih ding sunmang akipan khin ahi hi. Tua pen 2015 kum teh hong tangtung takpi ahih man in kalung dam mahmah hi.

Idol masa pen
Zomi sung ah Idol masapen 2007 kum in Sia Zam Khai in US pan hong ciah in nikhat thu in Zangkong ah bawl in pia ziau hi.

Idol nihna
2008 kum in Sia Tua Mung/Rev. Tuan Khan Mung makai in Kawlpi ah nasia tak in bawl hi. Akumkum in tawlkhat bawlto zo hi. Ka theih khialh kei leh Sia Tua Mung’ bawl tua Idol kidemnate pan in Thangta, Nu Toih, Niangpi cihte pawl hong minthang mahmah hi.

Zomi Idol Taktak
ZOMUS in kum tampi alunggulh Zomi Idol taktak pen bel 2015 kum in USA ah Global Zomi Idol (GZI) min tawh kibawl zo hi. India gam Lamka khuapi bang ah tua GZI audition bawlna ah minam vai khanlawhna nasiatak in piang ahih man in sanggam Luseite bang patau man mahmah uh hi.

Zatsiam Ding
Sak leh khang, sim leh mal leh tuipi galkhat dong a kitheh thang Zomite hong gawmzo taktak pen Music, Lai, leh Ngeina Kampau ahih man in tua teng hoihtak phungvuh huai mahmah hi. Tua lunggulhna mah tawh 2006 kum in ZOMUS motto ding in “Preserving, Promoting, Unifying” cih kana phuak ngiat uh ahi hi.

“Idol” hang in lai tampi hong kigelh in thu tampi theihlawh ih hih man in ahoihlam ah hong tunpih ding in ka lam-en mahmah hi. Ih kitottot ih kiselselna thu pawlkhatte akitot tak akiseltak mah hiam cih zong bel ngaihsut huai thei zel hi.

Zomi sung ah ki-it kilemna hongkhang semsem ta hen. Lungdam, Mung Laan Thang (Tonzang, Zogam)