iCloud Theician Dih Ni ~ Hau Za Cin

iCloud Theician Dih Ni ~ Hau Za Cin

iPhone, iPad, iPod, Mac book, etc cihte na neih khit leh mai September 2011 kha pan kipan tuhun digital world ah mi hampha pente lakah khat na hipah ding hi. Banghang hiam cih leh iCloud kizangta ding ahih manin. Tua ahih leh iCloud bang hiam? Theihcian sawm dih ni.

iCloud pen a tom in online storage kici ziau hi. Tua sungah pictures, music, softwares, etc kikoih thei a, Apple computer te bawl iPhones, iPads, leh Macs khempeuh tawh kizom khin ding hi. iCloud sungah koih khin peuh leng a tunga teng utut tawh ki enthei ziau dinga, Computer pan iPhones ah, computer pan iPad ah cih bangin copy kik kul nawnlo ding hi. A tunga teng na neih kop nak leh!

‘Cloud’ cih ciang ‘meipi’ cihna hi. Vantungah guahzu ding hileh meipi kaiin nisa liah pah a, a nuai khempeuh liap pah hi. Tua gentehna a zangin Apple Computer te in ‘digital hub’ pen munkhat ah vantungah meipi bangin koih ding ci uh hi. Tua ‘digital hub’ pan na deih bangbang – la, maan (photos), music, documents, data, etc cihte na ut bangbangin na omna peuhpeuh pan lakhia, en, ngai, sim, etc theita ding hi. ‘Digital hub’ cih ciangin computer sungah i koih theih na khempeuh genna hi. Na computer sung hiam laptop sung hiamah na koih khempeuh ‘digital’ van kici a, tua bang koihna mun pen ‘hub’ kici hi.

Apple Computers chief executive Steve Jobs, kum 56 in, “Digital hub pen meipi sungah kikhum ta ding hi (We are going to move the digital hub to the cloud)” ciin 6 June 2011 ni a Apple’s annual Worldwide Developers Conference (WWDC), San Francisco Moscone Center, USA ah mipi zat theih dinga iCloud khahkhiat na ah gen hi. Hih hun ah mipi 5,000 val kikhawm uh a, Apple computers ah nasem software developers te ahi uh hi.

“Tu ciangciangah computer pen digital hub ahi hi. Na deih khempeuh na khum thei hi – la, milim, video, music, documents, etc. Ahi zongin tua computer pan na iPhone ah hiam iPad hiam ah na lakkhiat nop leh a gui tawh na zop kul hi. Tuni in iCloud i zat ciang tua a gui tawh na zop kullo in iCloud phualpi pan gui kizomlo (wireless) in internet sung pan na music, la, documents, milim, games, video, etc cihte na ut bangbangin na lakkhia theita ding hi. Ka maban omlai nih hi; khatna ah Lion software leh iOS 5 te hi. Lion pen Macintosh computer ading hi a, iOS 5 pen mobile ah kizang iPhone, iPad leh iPod Touch ading hi,” ci hi.

iCloud cih pen vantungah om hituanlo hi. Internet mah bangin computer golpi khat sungah munkhat ah kikoih in, tua pan eima account tawh i deih bangbangin kizang thei ding cihna hi. Gentehna in inn ah ka computer sung pan ka etnop mahmah ka ngaihno maan pen khuasung ka vakna pan en nuam hileng ka iPhone pan a gui omlo in kizomsak in en ziau thei ding cihna hi. Tuni ciangciang ah tua bangin en nuam hileng ka computer pan ka iPhone ah ka lakkhiat, ka koih phot kisam hi. iCloud zang leng tua khempeuh kul nawnlo, direct in internet pan na kizom khin ding cihna hi. Ka vakna mun khempeuh panin inn a ka computer sunga om khempeuh en theita ding cihna hi.

iPhone, iPad, iPod, iTunes, leh Computer sung mun khat peuhpeuh ah koih khin peuh lecin copy kawikawi kullo in a vekpi in na kizomsuak pah ding hi. La khat hoih na sak mahmah khat na Bus ngak kawmin Bus stop ah download lecin inn na tun ciang na computer sungah zong na om khin ding hi. Laibu sim nuam in iPad ah na koih e-book sung ah na koih khempeuh zong na sun annek kawm iPhone pan na sim thei ding hi. Wow…

Tuma kum 10 hunlai in Computer pen digital hub ahi hi. Na deih peuhpeuh – La, music, video, games, document, pictures, etc na guang hi. Tu in iCloud pen na digital hub hong hita ding hi. Na deih peuhpeuh na guang theita ding hi. Mailam ah computer inn sungah i zatte kitam zat lua nawnlo ding hi.

Mobile phone ah zat ding iOS 5 a kizat hun ciang program updates khat peuhpeuh i hih nop leh computer tawh zop kul nawnlo ding hi. Wireless panin tua updates te iPhone, iPad, iPod, etc te sungah na lutsuak pah lel ding hi. iOS 5 in 5GB free cloud storage pia dinga tua sungah email, document, back up, etc kim sitset ding hi.

Music, applications, e-books, photos cihte bel ut zahzah kiguang theilo ding hi. (Tam deih leh sum tawh lei thuah kul hikha ding hi.)

Lion software pen mai July 2011 ciang USD 29.99 tawh ki download thei ta ding hi. Tua pen tuma lama software upgrades te sangin nakpi in tawm manzaw hi (tuma lamin updates softwares te USD 129 kiim hiden hi).

A theite genna ah Apple te in amau van a minthansak nopna hi ci uh hi. Microsoft leh Google te sangin Apple computere pen kum tampi kideih pen dingin zong kilamen hi. Tu ciangciang ah zong Apple vante khempeuh ‘branded’ vive hi a, ‘assembled’ omlo hi kici liang hi. Tua manin bit mahmah a, virus problem, software problem, etc cihte microsoft tawh teh in tawmzaw thamtham hi, kici hi. Tua pen mailamah Apple mite in a deih semsemna ding hang khat hi, kici hi.

iCloud a minthanna ding khat a kigen pen iTunes hi kici hi. iTunes zang peuhmahin user ID nei uh a, password zangin ama vante en thei hi. iTunes sungah van na neih khempeuh apple te bawl na van dang khempeuh sungah (van 10 sang tamzaw lo) na ihmut sung nangawn in na ki update sak ding hi. Photo Stream kici software tawh iPhone leh iPad pan maan na laak khempeuh na iCloud sungah na kikoihsak khin pahpah ding hi.

Apple te in iCloud a pat khiat hang bekbek in amau a a zang mi tampi hong kibehlap ding, ci uh hi. Amau van a zangte a khualna, deihsakna leh a free in iCloud a zatsakna hangin a zangsa te lungdam dinga, a zang nailo tampi in zong zang nuamta ding hi, ci uh hi.

Technical siamte in apple te khantohna leh adang computer bawlte hanciamna te hong gelh thei le uh zaknop mahmah lai ding hi.

Bangbang hileh apple zangte khempeuh in iCloud zang masa ding uh ahih manin hampha uh hi. Kei zong microsoft pan apple lam nga phei leng e, a ut simsim hita ing…he he… Ahih hang MacBook zawh ciang iPhone lei kul ding, tua ciang iPad zong… van tam neunau lel e, mate… tuhun ciang digital hub lo tawh lah ki veilong lua si! Na ci na? Hau Za Cin