Huihkhi le Singtehno ~ Peter Suumpi

Huihkhi le Singtehno ~ Peter Suumpi

Huihkhi in Singtehno hong zawn hi. Hong zui in kei tawh ahoih nono kimlepaam va en ni ci hi. Nang kong zuih theih nading Sikung kiang hong va gensak in ci in Singtehno in Huihkhi kiang ah kun hi.

“Na paikhiat kei nak leh ken bel hong paikhia sak kei ning” ci in Singkung in gen hi.

Hi bang teng tawh nikhat ni ciang in Huihkhi ii cih teltalna hangin Singtehno alungtang hong kinawh sai hi. Huihkhi ii nung zuih dingin hong khensat hi. Apaikhiat ding lian laitak in Singtehno in Singkung kiang ah hong dong hi.

“Singkung aw bang hang in pai kei in ci in hong kham lo na hia?”

“Leitung ah Singteh cileng nang, tehkhat bek a om lah hilo aa.” Ci in kiniamkhiat nopohna tawh gen hi.

“Bang hang in kei hong zawn sese na hia Huihkhi” ci in Singtehno in Huihkhi hong dong hi.

“Leitung ah akibang lian singteh nih om ngeilo hiven, tua hang hi” ci in Huihkhi in gen hi.

Singkung le Huihkhi te ii akibang lo dawnna te hangin Singtehno in acih nading theilo in hong dai dide hi.

Singkung in itna cih atel lo hizaw maw, ahih kei leh Huihkhi ii lungtang khauh luat man hizaw ding maw …?

“Banghangin nang kei hong khen nuam se na hia?” ci in Singkung in Singtehno hong dong hi.

“Apua lam va en koikoi nuam hi veng” ci in Singtehno in lawptak in dawng kik hi.

“Banghangin kei hong zui na hiam?” ci in Huihkhi in Singtehno kiang hong dong hi.

“Nang kei sunmang hong guan in tua sunmang te in kei hong lungkim sak zo hi” ci in Singtehno in lungdam kipak takin Huihkhi kiang gen kik hi.

Huihkhi tawh huihlak ah lam diangdiang in leitung ii hoihna te lamdang satak in Singtehno in a etet laitak in huih hong dai vat hi. Singtehno pen lei ah hong kiasuk hi. Amai pan hong pai mawtaw khat in hong gawi phei hi.

Singkung hong kisik kik hi. Singtehno ka kham loh se aw, apai khiat ding lai in kiptak aa ka let tinten loh aw ci in hong kisik kik hi.

Huihkhi in hong nun san hi. Bang mah acilo dan in mundang ah hong nung hi. Ken nang hong lungkim sak khin ing. Tua aading nang zong khat peuhpeuh na piakkhiat kul ding ai ve ci in Huihkhi in hong nunsan hi.

Singtehno in Singkung ii manphatna atheilo hizaw maw, ahikei leh Huihkhi pen aki-awi lua hizaw ding maw …

Khat veivei ciang in ei te zong hibang dan tawh ih kibang hi. Mainawt ding haksa in nungkik ding lah ahaksat hun ciang in ih nuntakna sung pan ih paihkhiatsa, ih nunsiatsa na te ih ngahkik nawnloh ding lam, ih muhkik nawnloh ding lam kiphawk kha pan thei hi.

Azenzen in alungtang hong kinawh sai hi kei leh Huihkhi in zong acih nading thei tuan lo ding hi. Lungsim adaih ciang bek in ih lungsim ii aw te ih za zo pan ding hi. Ih lungsim adaih ciang bek in adik le akhial ih khentel thei bek ding hi.

Pammaih sa aa ih letkip thu te, na te khempeuh zong amanpha penpen te na hituan lo thei aa, gimletawp pipi aa ih zon, ih thalawh na te zong ih nuntakna aading akisam pen te na hikhin lo thei hi.

Mihing te ii nuntak kalsuan zia pen, ngaklah luatna le lawp luatna te tawh kidim thei hi. Gimna, tawlna te, duhhop luatna te tawmvei nawlkhin phot in kimlepaam ii hoihna te khuadak in lungngaih zel ding kisam hi. Pak te ii hoihna tawmvei tutsa in en ding, luitui te ii hoihna te tawmvei daitak in lungngai ding, vasa ham te ngai ding, na lungtang kisai tawmvei ngai sin ding cih bang in lungsim tawldam sak ding kisam hi.

Bang zahta in na tuahsia zong in itna khahsuah ngei kei in cih… Peter Suumpi