I minam hihna, biakna leh Politics Party ki bangci lamdan

I minam hihna, biakna leh Politics Party ki bangci lamdan (Dissimilarities national Identity, religious, and Politics Party)

Thupatna: Mi pawlkhatte in panmun, thu neihna leh sum leh pai a tuamtuam a deih man un hih thumteng kibang hi, a tonkhawmden ding hi cithei uh hi. A tonkhawm, a pankhop loh phamawh hun omthei mah a, a pankhop theih loh a tonkhop theih loh hun zong omtheizel hi cih I telkul hi. Tua thute a tello minam, innkuan, khuasung leh gam mite khangto cih sangsik in kiamsuklam manawh leh kitawng kisel in nitum bek uh a, minam tawm mahmah, gamneu mahmahta leh kithu tuahtheilo uh hi.

Kawlgam galkapte ukcipna (Burmese military regime) in ei Zomi tampite tenna Kawlgam leh I Zogam ah zong Democracy huih in kum 10 kim bang hong nawk hiauhiauta ahih manin hih thute I tel kei leh I it pen I lawm I gual, I khua I tui, I beh, I biakna Pawlpi leh I mipihte nangawn tawh ki telkhialhna, ki khenna, kivuak ki satna hong piangsak thei a, tel peuhle hang lah I theih ngei loh mivom mikang nangawn tawh kikholh theihna hong hisakzaw kawikawi hi. Tua ahih manin hih thute a tomthei penin tawm ki theisak nuam hang.

1. I minam hihna (national identity): Hih pen a taizaipi hi-a, tampi I genkhinzo kei ding hi. I minam hih na hong ki theisak pen adiak in ei Zomite bang I naumin phuah dan, I Zo ngeina zuu hawm, sa hawmzia, mo kipi dan leh I Zo la te in minam kician khat I hih na hong langhsak hi. Koi mun koi gam ah omtaleng hici dan I ngeina hoihte limtak I zatnak leh minam kician hong ki ciding hi.

Ei Zomi sungah mipawl khat a mel hoih mahmah, a tha zong kicing mahmah ahih manin nang pen Mangkangte, Korea te, Japante, Sente hi niteh vacileng a lungdam lawmlawm khollo ding a, pawlkhat leuleu lah neulai, a thatomlai India a kala bihalite danin vomlua kisa dul zezenta leh Zomi hikeiteh Kalate, mivomte hi niteh vacikha mawkleng, zaklohdingteng kiza khading hi. I gennop ah minam hihna taktak kici pen I mel I puam leh I tenna gam na himasalo in I tawnzia, I hekzia, I tatzia na himasa zaw hi, hih pen numbat khat na cini ei.

Tua khitteh a nihna aban ah I omna gam ki ciaptehna identity card zong minam hihna namkhat mah ahi hi. Bang dan a thupi hiam cih leh India ah ka Sang kah lai in Lamka ka tunteh Tedim Chin Union ah makai khat ahi, Pu. Kai Mang leh Pu. Khen Pau in ID Card khat hong bawlsak uh ahih man un India gamsung Meileng, Bus, Vanleng ka tuang kawikawi theipah hi.

Bangalore ah ka omlai Lamka khuagei a Mualkawi khuate khamtheih hih khat Sia. Pumzathang in na etsak in hong ci-in ka etsak hi. Khamtheih hih ahih manin ompih Falamte tawh kisia, kilaizel a, thu ka hilh leh heh in Burma te ci-in Palik te kiangah hong hek hi. Kei zong Lamka a hong ki bawlsak ka Identity Card ka lakpah leh thu hong dotkhit uhteh lehciah hiau uh hi. Identity card omlo hi leh hong manin Kawlgam hong puakthei ahih kei leh mi tampi buaisak in sum tampi ki beilawh theiding na himawk hi.

Tua ahih manin hih zong amun leh ahun ah na thupi mahmah hi. A thumna ah Kawlgam Identity card na tawi leh gamdangte in nang pen Myanmar minam hiteh hong ciziau ding uha, Kawlgam sung state tuamtuam aom minam tuamtuamte tawh kikhawl lecin lah Chin State aom minam na hih leh na Identity card tungah Chin kici ahih manin Chin hong cizel ding uh hi. Tua pen vaheh pahke ding hituanlo hi. US, Europe, Australia leh gamdang pawlkhatte tawh kikhawl lecin lah Asian mite hong ci leuleuding uh hi.

Hih thute I ngaihsutteh minam hihna pen a dawldawl aom leh mi hong theih muhdan leh ei leh ei I kimuh dan zong na om ahih lam zong hong phawksak hi. Khuamin, Beh min, ci leh sa mel leh puam leh a tuamtuam tawh a ki ciamteh zong om hi. Hihte khempeuh pen I mimal hih na, I minam hihna, khua leh tui beh leh phung kician nei I hihna khangluite pau leh “singhawm suanghawm a piang” I hih lohna hong phawksak hi.

2. Biakna (Religious): Minam pen biakna sangin piang masazaw a, mihing a I piankhitteh ei zuih nop penpen uh leh eikiang aom I khanpih biakna pen a tamzaw in a kizui ahi hi. Ei Zomite bang Christianity hong tun ma in dawibia, sing leh suangbia in hong kiciamteh hi. Korea te I minthansak mahmah hang, biakna neilo honpi khat om mawk uh hi. Ahi zongin Korea minam mah ahi uh hi. I gentehna in Zogam, Chin State sung aom te a tamzaw Christian biakna sungah Tuiphum(Baptist) Pawlpi hikha ding hi.

Laipian biakna zuite bang pen no Zomi hi kei uhteh vacih theih hituanlo hi. A tunga I gen minam hih na I ki batpih khat pen biakna a neikei phialzong in nang Zomi hi keiteh cihtheih himawklo hi. Biakna thu laigil pen in atom in genleng, I sih khitciang thu, I kha nuntakziading ahi hi. Biakna pawlkhatte bangin ganhing, mihing a ki suak kik dingin lam-en uh hi. A hi zongin mi pawlkhatte a biakna uh cihtaklo zulhzaugawp in taikawikawi, khel themthum thei uh hi.

Ei Christian sung nangawn ah Zeisu hong pai kikdingzia nangawn I updan I sandan kibang khinlo hi. Baptist sung nangawn ah I Pastor lakdan, Ordination kipiak dan, biakpiak dan sanzia kibang khinlolai zen hi. Tua hita leh nang Zomi, Chin mi, Kawlgam mi hi keiteh va cih theih hilo hi. Khua khat vengsung khat nangawn ah Christian pawlpi tampi omthei a, Innkuan sung khat nangawn ah Pawlpi nih leh thum om thei hi.

I gennopna bulpi ah biakna leh minam ki bangkhinlo a, nangma suahtak banga biathei, zuithei, telthei, taisanthei hitase leh minam pen ki teltheilo, ki taisantheilo hi. Mi pawlkhatte Kawllak vailak ah bual in a pau, a lai, a ngeina, a minam daipih ngamlo, zangh ngamlo hita leh amau Kawlte hiteh Vaite hiteh naci tuanlo uh hi. Tun Politic Party thu tawm gen leuleu ni.

3. Politics Party: Hih pen minam piankhit, biakna piankhit a hong piang pan ahi hi. Zong beithei, a min zong kikhel thei hi. I gentehna in Kawlgam ah 2010 kimin Democracy huih in hong nawk a, galkapte in Kawlgambup kitelna Election hong neihpih in USDP Party gualzo in U Tein Sein in President hong sem hi. Tuatung in leitungah aom ngei nailo Chin Party CPP Party leh CNP Party min hong piang a, tua te’n Chin State ah panmun hong ngah uh hi.

Tua tungin Zomi Party in Election ah kuangluilo uha ahi zongin Zomi zong mangthang tuanlo, beituanlo hi. Ahi zongin Kawlgam kitel Election 2015 kum in Chin Party kici khempeuh Chin State ah guallel dikdek uh a, tun a Party min uh CPP, CNP cihte zong beita hi. Ahi zongin Chin mi beilo, mangthanglo hi. Chin State zong mangthang tuanlo hi. Tukum Kawlgam kitel kik ah gualzo nuam ahih man un amin laih in minthak phuak uh a, mipi lunglut theihna dingin CNLD Party tawh hong ding kik leuleu uh hi.

Politics Party makai peuhmah mipi leh gam khantohding a vei ngiat zong khat leh nih omtei sam napi in ahi zongin a tamzawtham pen panmun a ngahnop, gambup sum a zeknop man un mipi lunglut theihtheihna dingin amin a khelkhel uh hi lel hi. India Manipur State ah kum 1974 kimin Zomi National Congress(ZNC) Party hong piang hi. Zomite omna vive ah kuanglui uh himah leh khatvei zong gualzo ngeilo mawk uha, tulaitak a Party min zong abei himai hi. Lamka aom ZOMI te’n ZOMI itlo uh hi tam?

Biaknalam ah Pu Thang Tuan Mung makaihna tawh Lamka khuapi ah ZOMI BAPTIST CHURCHRES OF INDIA cih khat kipan ngei hi. Ahi zongin kua mah in panpihlo, thapialo hiam tun beita in amah zong India ah om nawnlo hi. Lamka aom ZOMI te’n ZOMI itlo uh ahi diam? cih na ngaihsun in. Ahi zongin Manipur ah Zomi beilo a, Zomi movement pen ZOMI COUNCIL leh ZRO in semin leitungbup Zomite omna ah ZOMI movement ahat pen pawl hiding hi.

Mizoram Sialkaltangdung thuzong tawm gendih ni. ZOMI a it mahmah khat leitung pilna zong MA a zokhin khat in kuanglui ngei a, Sialkaltangsung aom mite zong ZOMI vive mah hi uh ahih manun tuatunga Election kuanglui penin ngahding in lam-ethuai mahmah hi. Bang hang hiam cih leh Zogam galkapte in zong panpih in I mipih pa mah Mee(vote) napiak dinguh ci-in limtak genin thautang nangawn tawh I mipih pa mah ka piading uh hi ci-a, makai pawlkhat a kiciamsak uh zong om kici hi.

Hita leh ei mipa in lel mawk a tu nitan MLA/MP suaknailo hi. Mizoram Sialkaltangdung aom ZOMI te ZOMI itlo a kici thei diam? Kici theilo hi, bang hang hiam cih leh minam kipawlna ah Siahpia den uh hi. Tua ban ah Politics Party I cih pen Mee a piateng mivom hita leh mikang hita leh amau Party mi, amau Party member ahi hi. Tua ahih manin Politics Party makai khat minam makaipi kici theilo hi. Bang hang hiam cih leh minam khat sungah Party nam tuamtuam, makai tuamtuam om hi. I genop ah na nu/pa na sanggamte in Election Party min in Chin min Zomi min leh min a tuamtuam a zangh zongun Mee(vote) napiak loh hang minam itlo kici theihpahlo in tua Party te abei, a mangthang zongin MINAM mangthanglolua hi, aci nuam I hi hi.

Thukhupna: Nalau manin na deih loh Party Mee pia peuhmah kei in. Amau zong hihna, kumpi sum zeknuam, makai ut a, kuanglui himasa tek uh hi a, tomvei ading bek ngaihsun ke’n hong cih leh nang zong MP/MLA nasep ding kum 5 bek hi-a, tom vei mahmah hi, na ngah loh na mel kithei nailo sum leh hun tampi na beisang in khawlzaw in naci in.

MP/MLA ngah leh hih hun tomno sungin a damsung Kawlgam kumpi nasem pawlkhat sangin a sum ngah uh tamzaw ding ahih manin kamkhum nono, paulap hoih nono, semzoloding hita leh mipi deih thu pawlkhat zangh in Mee hong zong ding uh hi-in ei mipite khat leh khat kisiat lawh hetkei ni. Nang zong na phattuam nading in nangma thu neihna na rights ahi na Mee(vote) pen na zatsiamnading deihsakna tawh a tomthei pen a kong gelh ahi hi. Ki telteh kua Party Mee piading cih thu a sawtlo in zomtolai ni. Khaibawi (Ex-President Zomi Innkuan Delhi 2013-2014, Ex-President Zomi Innkuan Australia 2017-2018)