Leitung ah Hotel asangpenpen Dubai City sungah kihongthak

Leitung ah Hotel asangpenpen Dubai City sungah kihongthak

UAE (United Arab Emirates) gamsung aom khuaminthang mahmah khat ahi Dubai City sungah Hotel thakkhat ki hongthak in, tua Hotel pen leitungah asangpenpen in kiciamteh cih AFP pan kiza hi.

Tua Hotel pen Gevora Hotel kici a, asangna Meter 356 (Pi 1168) ahihi. Hih Hotel pen zanni Sunday ni in aki hongthak hi a, leitungah Hotel asangpenpen “world’s new tallest hotel” ci’n ki ciamteh hi.

Hih Gevora Hotel pen leitung ah asangpenpen ci’n aki ciapteh hangin inndawlpen tamlua khollo a, akigawm in inndawl 75 Storey ahihi.

Abeisa in leitung ah Hotel asangpenpen in aki ciamteh pen “JW Marriott Marquis Dubai” hi a, tuazong Dubai City sungmah ah aom ahihi.

Hih JW Marriott Marquis Dubai kici Hotel sangin zanni in aki hongthak Gevora Hotel pen Meter 1 bekbek in sangzaw citciat ahih manin, Gevora Hotel pen leitungah Hotel asangpenpen in akiciamteh hita hi.

Emirati Daily The National te genna ah Gevora Hotel pen Sunday ni in akihongthak hi a, amasa penpen in tuni Monday ni in zin tungthei tading ci uhhi.

Dubai City pen leitung ah inn asangpenpen aomna khuapi zong ahihi. Burj Khalifa akici innpi pen leitungah asangpenpen “world’s tallest building” in aki ciamteh hi a, asanna 828 Meter (Pi 2716) ahihi. Mile (tai) tawh akiteh hileh asanna pen tailang (hald a mile) tak vandawn ah asangto himawk hi.

Dubai City pen UAE (United Arab Emirates) gamsung ah khuaminthang mahmahkhat ahih mahbangin khualzin gamvak leh akhuapi amunuam ngiatin azin Tourist zong tammahmah hi. 2020 kumciangin Dubai City sungah “Global Trade Fair Expo” kibawlding a, tuakum akipan kumsim in Dubai City ah khualzinmi 20 Million phadending kici hi.

Dubai City pen hunkhatlai in sehneelgam, gamkeu mahmahkhat himahleh namgimtui haumahmah uh ahih manin, khangto hanhan uhhi. Shopping Mall tampitak omin, zintun nading Luxury Resort tampi aneihban ah innsung ah Ski kimawl theihna “Indoor Ski Resort” nangawn neikhin uhhi.

More: China Hotel sungah nasemte kihhuai takin agamtatna Video kizaihsim

Dubai Airport zong leitungah vanleng anawk atampenpen “world’s busiest for international passengers in 2017” in kiciam tehkik leuleu hi. Hihbangin world’s busiest airport in aki ciaptehzawh pen akumlina hitota a, 2017 kumkhatsung bekbek in Dubai Airport ah khualzinmi 88.2 Million in nawkkha ciliang hi. Nidang in London khuapisung aom Heathrow Airport pen minthang mahmah, vanleng tawh khualzin te’n limnawk mahmah a, ahi zongin tulam ciangin Dubai Airport pen minthang zawta hi. Sawltak #zomidaily