Hun nunung a Zeisu’ kam vaikhak ~ Pau Khat Suan
Luke 22:46 Jesuh in, “Bang hangin ihmu na hi uh hiam? Tho unla ze-etna-ah na pukkhak loh nadingun thu ngen un,” a ci hi. Zeisu in a galte in a matma, a nungzuite tawh a hun zatkhop nunung a a kam vaikhak pen.. “Ze-etna ah na pukkhak loh nading un…” ahi hi. Hun nunung a om eite ading in zong hih kammal thupi ding in ka um hi.
Hun khat pan hunkhat ah kikhel ding a kithawi hun pen hun masa ading in hun nunung ahi hi. Zeisu leh a nungzuite kikhawl in nisim a nuamtak hunnuam zat hithiat hun a tawpna, a hun nunung pan in kikhel in Calvary lampi tawn a Bethany pan vantung lam paina ah hun kikhel hun in Zeisu in a nungzuite a kam vaikhak “Ze-etna ah na pukkhak lohna ding un…”cih ahi hi.
Leitung hun nunung, leitung ki-ukna pan vantung ki-ukna, Khazih ukna hun ah a kikhel ding hun a thupiang ding genkholhna tampite a tangtun ziahziah hun, tu-hun a a nungta eite’ ading in zong a thupi mahmah thu in “Ze-etna ah i pukkhak lohna ding…” mah hiding hi.
Kawlgam gamthu ah zong galkap thuneihna tawh zawhthawh ukcipna pan suahtakna democracy ah kikhel hun, ukcipna ii hun nunung tuhun mah hi a, zolna leh khemna, thu tuamtuam phuangtawm a i suahtakna ong lakkhiatsak ding, from one hell to another … ong paipih lel ding khemna ci tuamtuam ong om ding hun hi a, “Ze-etna/khemna ah i pukkhak loh ding… “cih mah a thupi pen hizel ding hi.
Leitung thu ahi a Vantung thu ahi zong in hun khat pan hunthak khat ah kikhel hun, tuhun a a om eite’ ading in “Ze-etna ah i pukkhak lohna ding… ” pilvang tak a i nuntak ding thupi mahmah hi.
Ih mumu nawn kei ni. Ze-etna leh khemna ah i pukkhak lohna ding in hak gige leh pilvang tak khuadak siam ding, khatpeuh thugen ah i pukkhak lohna ding in kan leh theih a kisam thu le late kan, thei leh teltak in nuntak sawm ding thupi ding hi. Pasian’ ong piak ngaihsut theihna khuak zat ding a ongpiak hi a, zat ding i tawan/i vaipuak ahi hi. Tua khuak zanglo a, khatpeuh kawikaihna ah i pai melmel lel leh ganhing tawh i ki-lamdanna bangmah omlo ding hi.
Thei gige inla, thu kigen khat peuh nang theihsa thu tawh limtak enkak in, nang’ khuak mah tawh khensat in. Hun nunung tuhun in Ze-etna leh Khemna ah i pukkhak leh tua in i hunkik, khangkik ah hun kikhelkik mateng a i tot ding lampi ong suak ding hi. Pilvang ni. Pau Khat Suan
Comment piaknop aomleh...