Mihaksa, migenhak te tawh kizopzia ding (Part 1)

Mihaksa, migenhak te tawh kizopzia ding (Part 1)

Nisim nuntakna ah i hopih ngampakloh, ki muhoih ding i ut luatloh, haksa i sak mi omthei hi. Tuate tungah bangcibangin kizopna ah zawhna ngah thei ding hiamcih tawm gen ding hihang.

1. A thugen te hoihtak ngaihsak in. Mi a tamzaw te in thu gen nuam mahmah uh hi. A thugen a ngai ding mi deih mahmah uh hi. A ma gennop teng kiciantak na ngaihsak kei leh na thugen a bilsungah lut ngeilo ding hi. A lungsim tawng ah bangthu omhiam cih na tel dongin ngai dide phot in. A kampau tuh kei in.

2. Na lungsim daisak in. Na lungtang kisaina ngai inla hithiat in. Linglawng gawp kei in. Bangthu khat peuhpeuh hong genzong na lungsim kemcing in.

3. Mawhsak ngei kei in. Thu khat peuhpeuh hong genciangin a hizongin, a sumbawlna, a innkuan sungthu, a lawm te tawh a kizopna khat peuhpeuh ah a ma mawhna genkik kei in. Khialteh ci kei in.

4. Zahtak bawl in. Koi bang koi bangin hong hopih zongin zahtakbawl in. A zahtak mahmah dan in om lecin na kamtawh thutampi na gensangin a lungsim na zo baih zaw ding hi.

5. A deihbang hiam cih thei in. Nang tungah hong gen thute hangin a lungsim sungah bang deihna omhiam cih telcihtak telsawmpah in. Na hihtheih ding leh ‘hong huhnuam mah sing e’ ci lel in.

6. A innkuanpih te zahtak bawl in. Kisap a neih na muhleh huhsawm in. A mahbek hilo in a innkuanpih, a zite, a tate, phatsak in. A melhoih hi ci in. A nasep uh thupi hi cihsak in.

7. A hehna leh a lungneuna hong gen mi tungah kawlphot in ci kei in. Na lungsim khiam in cipah kei in. Tua te in hehna leh lainatna te behlapzaw thei hi. A lungkim dong na gensak khitciangin a hehhuai taktak mah hi, laina huai taktak sa mah ingh cihsak lecin a mai na mu zaw pah ding hi.

8. ‘Thei mah ing, telta ingh’ ci pahpah kei in. Na theihtheihsa thu hong gen a hizongin a theinailo bangdan in om in. Ki hilhhilhsak phot lel in. A lungkim hun hong tunciangin na deihna gen lecin 90% a ngahkhin na hihi.

9. A thugen laitak mawk nuih kei in. A tawntungin nuih mai seisai sekei lel in. Tua in zahpihna leh uplohna tawh kibang kha thei hi.

10. Thu nial ding peuhmah ngaihsun kei in. A thu na nialsawm limlim leh a inn ah hawhsawm kei in. Ki lemna a bawl dingin pai kei in. Na deihna a ngen dingin kipan kei in. A tawntung a hikei zongin tawmvei sungbekbek thukimpih sawm photphot in.

Nang a’ding phattuamna khat peuhpeuh hong piak leh Zomi Siamsin Library Post ki lungdam mahmah hi. Nang a’dingin a kibawl hi aa na phattuampih ding deihna bulpi tawh a hithei zahzah thuhoih te hong kisuaksak zel hi. Lungdam mahmah! Siamsin Library