Dallas/ Fort Worth, TX. USA pan hong nusia Tg. Anthony Lian Lam Mang (Manlun) tungtang thuzaksak kik na
Texas State Dallas/ Fort Worth khuapi sung a teng, pianna khualui Zogam Tonzang myone Salzang khua a (manlun beh) ahi phamsa (Pa Thang Gen Tung – Tungkaang) leh Nu Niang Dim Cing (Khawlawn beh) te i tapa anihna Tg. Anthony Lian Lam Mang in akhangdawn hun leh mailam ih minam ading alam-et huai, ait huai mahmah hun cih genthamlo melpiang leh thukhual in pil, ciim leh maitai tawntung in, kam siam tawh thuah khawm lai ahih manin, tu bang a Sian laitan ni hun hong tun hun ciang’ akua mapeuh i sinlung lai hong vut leh na kisa tek in laikuai Zo vontawi khat hong suak ahi hi.
Tg. Anthony Lian Lam Mang (Mangpi) in a beisa May 29, 2015 (Friday) ni zingsang lam nai 9:30 hun Fort Worth khuapi sung naupang zatopi (Cook Children Hospital ) pan asiam Pa kiang hong ciahsan hi a, amah tawh anunung pen khawlkhop hun bawl nading hun Jun 06, 2015 (Saturday) ni zingsang nai 9:00 am pan 10:30 am hun, St. Batholomew Catholic Church, 3601 Altamesa Fort Worth, Texas 76133, pan Roman Catholic ngeina bangin biakpiakna kibawl ding a, tua lai pan lei a tuh nading hanmual lam zuan’in anuai a mun ki-at (address) ah ki paipih lai ding zong ahi hi.
Ih it uh ahi Tg. Anthony Lian Lam Mang (Mangpi) hong nuasiatna hanga ada akap, lungleng khuangai a om anuasiat ait anu leh suahpih laiguizom sanggam u leh nau, meitheih tanau, khuapih tuipih, pawlpi mite khempeuh i dahna, kahna pan hong luang khitui khempeuh te huhpa khasiangtho in na hehnem ta hen la, luitai khamuanna thupha te mi khat ciat tungah tu leh atawntungin na tungsah den ta hen! Amen
Thang van tualnuam Sian anglai ah tawntung Zeisu tawh amang khawm dingin, lungheineihlo leh lungnuam tak in 
napai masa ta in ci-in mangpha kong khak uh hi.
Mangpi, Mangpha, Mangpha , Mangpha
Tg. Anthony Lian Lam Mang kum (18) pen avai tuamtuam hang’ tawh, asih khit ni9 ni June 06, 2015 (Saturday) ni ciang’ hanmual ah khakna kineih pan ding ahih manin, atung a amah tawh anunung pen hun bawl nading biakinn mun leh a kizang ding a han (Cemetery) te omna mun (Address) te mipi te’n ih theih tel ding uh kisam a hih man, hong khang kik zel ka hi hi.
Zo Innkuan Fort Worth, TX. USA
Han, Cemetery (address)
Skyvue Funeral Home and Memorial Gardens
7220, FM 1187
Mansfield, TX. 76063
Comment piaknop aomleh...