Hong huzo taktakding i Pa Pasian bek hi
Naupangno leh a pa lo hong kuan uh a, lo a tun’ uh ciang, a pa in na ka vasem ding hi, koi mah ah na pai se kei in la, buk sungah na om hithiat in, ci-in vaikhak hi. A Pa’ nasep kal in naupangpa lo nawl(gamlak)ah a pai leh, lamet lohpi-in, gam ui pawlkhat in amai panin na dawntuah ngeingai mawk uh hi. Naupangpa lau lua ahih manin, awng kawmkawm in, ciangkan neu khat tawh gam ui te ngimngim hi. Gam ui te in, naupanpa laulo bektham loin, naih semsem uh a, pet nuam lua kisa-in a kam uh kaa beba in a om ciangun naupangpa lau semsem in, a ngaih zaw in hong kiko leh a kikona awging a pa’n za lian hi. A Pa zong thakhat thu-in a namsau man pah a, a tapa kahna mun lamzuan in hong tai pah hi.
A tapa’ omna mun a tun ciangin, gam ui honkhat in a tapa pet nuam in, na ngim gega uh hi. Tua ciangin aman zong a temsau dokkhia in gam ui te mai-ah a vik ziahziah leh, gam ui teng lau in thakhat thu-in, taimang pah uh hi. A tapa in a pa kiangah “Na thu kong man loh manin hi bang a tuak kha ka hi hi. Na thu kong man loh lam thei napi-in lau in kong kiko ciang, thumang lo pa hi, hon khia kei ning, ci tuan loin, lunghimawhna tawh nong delh pah a, ka launa khempeuh nong vengsak hi,” ci-in a Pa’ tungah lungdam hong koh kawmin a khialhna hong pu lak hi.
I nuntakna sungah zong lauhuaina leh patauhna tuamtuam hong om zelzel hi. Eite hih theihna leh i thahatnate in lauhuaina panin hong hu zolo dinmun ah i om lai takin, hong honkhia zo ding, i Pa i sap ding ahi hi. I kikona aw hong zak pak kei leh zong a ngaih zaw, a ngaih zaw semin i sap ding ahi hi(Thu i nget ciang, i ngah pah kei leh lungkia loin i ngah dong upna tawh ngen teitei ding cihna hi). I Pa pen ziakai lua lo, manlang lua lo, hun lap den ahih manin, upna leh muan’na tawh ama zia ngak siam ni. Ama zia a ngak siam mite’ adingin amah(Pasian)ziakai ngeilo hi.
A beisa hunah ama thu i man’ loh khakna a om leh zong hong maisak in, ci-in thum in, ama tungah i lungsim, i kha leh i pumpi, a vekpi-in kipum ap ni. Tua sungah lungmuan’na leh suahtakna hong om ding hi. Ama adingin hoihna nei zolo pipi mah, i thuman’ loh lam hong thei pipi mahin, i thum, i tauna(i kikona)te hong za-in hong huh nuam den pen, na khempeuh ahih thei eite’ biak Pasian khatbek om hi. I nuntakna buppi hong hu zo taktak ding pen, tua i Pa Pasian bekmah ahi hi. Amah bek muang ni. Amah a muang mite a tha dimkik ding hi. Amah bek bel hi. Amah a bel mite lim takin kem hi. Amen!
Ngaihsutna kiu khat pan;
Khris sungah, ✍️ David Tuang
Comment piaknop aomleh...