2021 – 2025 kikal zongh Hluttaw pan Galkap 25% thukimloh in Thukhunpi kilaih zoloding

2021 – 2025 kikal zongh Hluttaw pan Galkap 25% thukimloh in Thukhunpi kilaih zoloding

1948 kum gambup in suahtakna angah zawh kipan tuni ciang gamsung kilemna omnailo hi. Ahang tuamtuam tampi lakah abulpi nam (3) hang hi, cih kingawh thei hi.

Gamsung om minamte’ gamvai hamphatna kikkim loh hang aa piang tualsung buaina ( Ethno Political Conflict), tuciangciang gambup thukhunpi neih sunsunte’ thanemna (Constitutional Crisis) 1947 thukhunpi bang mimal tampen Kawl minamte aituam gualtung tuan nading kigelh (For one group show), 1974 thukhunpi leuleu ciangin Burma Socialist Programme Party aituam hamphat nang kigelh (For one party show), tulaitak 2008 thukhunpi bang peuhmah mimal khat aituam aangsung ading kigelh (For one man show) cih theih ban ah gambup kibelpawlna diktak ki-ukna tawh kisai telkhialhna leh lauthawng luatna ( Discord On Federalism) cih thubulpite’ hang hiphadiak hi.

Tulaitakin leitungah kizangh gam tuamtuamte’ gambup thukhunpi (200) val bang om hi. Tuate khempeuh akicingkim cih bang hizenzenlo-in thanemna om ciat hi.

Tua hang ziakin leitung ah asuakta gamkhat ii thukhunpi pepeuh akigelh tak teh puahphat kik zia ding, behlapkik nading leh paihkhiat theih nading zia-le-tong ngeinate thukhunpi sung mahmah ah zongh kikoih pah hi.

Thukhunpi pawlkhatte puahphat nading alampi haksa mahmah ( Rigid) akibawl om-in, thukhunpi pawlkhat leuleute alaihnop ding ( Flexible) kigelh om hi.

More: Bumh Lehkikna ~ Bob Tuangpi

Tulaitak 2008 Kawlgam thukhunpi bang bel akilaih/puahphat nang leitungah ahaksa penpen pawlin kihel hi. 2008 thukhunpi apuah/laih ding hileh Article (436 -A, 436 -B) cihte zui-in kalsuankul ahih man’n haksa mahmah ding hi. – Bob Tuangpi (002712021)