Yangon, Hlaingtharya ninpaihna ah meikatzawh ni 5 phakhin in kiphelhzo nailo, mi 15 zato tunlawh

Yangon, Hlaingtharya ninpaihna ah meikatzawh ni 5 phakhin in kiphelhzo nailo, mi 15 zato tunlawh

Myanmar, Yangon aom ninpaihna ah meikatna hangin mi 15 bang zato tunlawhkhin cih Xinhua News pan kiza hi. Ninpaihna “Dump Fire” meikatna hangin meikhu tamlua mahmah in, huihsiangtho kingahlo a, khuahunzong lumsak mahmah hi.

Global New Light of Myanmar te’nzong Wednesday ni in agenkhiatna ah hih ninpaihna meikatna hangin zato atunlawh pen mi 15 phakhin in, tualo adang Healthcare tuamtuam ah akipuakzong mi 60 valbang phakhin hi ci’n pulakkhia uhhi.

Tua meikatna pen Hlaingtharya Township sung aom Hteinpin Cemetery kici misi kivuina han geinai khatah ahihi. Abeisa Saturday ni pekin meikang akipan hi a, ninpaihna pen zailua mahmah ahih manin, meikuang pen kiphelhsiang zonai mahmahlo hi.

Ninpaihna “Dump Site” pen azaina 121 Hectare bang pha a, meikhu in akiim apaam teng nawngkaisak mahmah hi. Ninthem kipaihna akang ahih manin, meikhu namsia mahmah a, Western Yangon sung aom Townships te’n thuaklah phadiak uh a, acinatlawh, Health Problem angahlawhzong mi tampi omkhinta hi.

Tuesday sunlam ciangin Downtown Areas pan inzong meikhugim namsia kizata, ki limzelh mahmahta hi.

Cidamna lamsang thunei ahi Health Authorities te’nzong hih ninpaihna meikatna hangin agimnamsia leh meikhu te’n cidamna sukhathei, gu akihel Carbon Monoxide huihlak ah kihelthei ahih manin, mipi te hoihtak kidop siamding zaksakna nei uhhi. Carbon Monoxide adikkha tepen bukkhuh veithei, gawlsung ziasakthei, huih dikzolo, naklah cihbang in omsakthei hi.

Abeisa kalsung Saturday ni pekpanin meikuang akipan hi a, tuaciangciang ni 5 sungbang akizom in meikuang akizom suaksuak ahihi. Tua ninpaihna aphual ah meiphelh ahi Firefighters te’n meikuang pen kiphelhphelh himahleh aki phelhsiangzawh nadingin tawlkhat hun beilaiding cimawk hi. Nibangzah sawtlaiding cihpen ki gencianthei lomawk hi.

More: Yangon Region sungah nikhatsung in mei 7 veitak kang

Tua ninpaihna “Dump Site” pen Yangon khuasung khempeuh aom ninthemteng aki paihna mun hi a, abeisa kum 20 val akipan “Yangon City Development Committee” te’n asep, amakaih uh ahihi. Local Authrities tezong lunghimawh in, Yangon Region sungah huih anitna “Air Pollution” bangciciang hitahiam cih tehna neiding uh cih kiza hi. Sawltak #zomidaily