Hillary in FBI Director pa’ hangin kiguallel hi ci

Hillary in FBI Director pa’ hangin kiguallel hi ci

Nov. 14, 2016: Hillary Clinton in Federal Bureau of Investigations (FBI) director James Comey in Congress memberte kiangah laikhak nih (two letters) presidential election a om ma diakin a khak manin nung kal kiteelna ah kiguallel hi ci-in zanhal in conference call a neihna ah statement a bawlna ah gen hi. Hih conference call ah huhna sum pia (donors) ten $1,00,000+ tawh siatbat uh hi. Clinton campaign’ analysis ten zong James Comey’ laikhakte gel hangin vote khia tawm tuam mahmah a, Trump gumte tua laikhakte gel hangin nuam in, thangah mahmah uh hi ci uh hi.

Ahih hangin analyst pawl khatin bel tua FBIte’ laikhakte hang leh Trump in ni dang hun lai-in tape ah kihona (taped conversations) kikhum sungah numeite ka zol bawl masak kul se loin mi minthang (celebrity) ka hih manin manawh in ka ut bangin ka khoih thei ziau hi (hih thu hangin numei tampi in Trump lang bawl uh hi kici hi) a cihna hangin vote khiate lungsim bangmah laih tuam beek lo hi ci uh hi.

Clinton a guallelh manin amah a gumte, a sung leh a pua panin leh party sung mahmah ah kilaihna tuampi leh nasia tak (radical changes) Democrats party sungah a om ding a deih tam mahmah ta hi. Nung kiginni in zong New York khuapi-a Trump Tower ah lungphona neite lakah Film-maker Michael Moore zong kihel a, Democratic National Committee sungah kilaihna siang vilvel a om ding a deihna thu leh mi’ it theih makai kisam a, ngaihsutna lui a nei makaite laih hun ta hi ci-in gen hi.

Pennsylvania Governor lui Ed Rendell leh Maryland Governor Martin lui O’Malley in zong Democrats ten party in a ngim masak pente a etphat kul hi ci uh hi. DNC Chair ah nominating process pen laih hun ta a, ni tha khansakna ding, middle class kicite hatsak semna leh gam bup zung kipatna bulpi ah ciah kik a, grass-roots party pian’sak hun ta hi ci-in O’Malley in nung kal in gen hi. Bernie Sanders in a nasep ding dan ngaihsut tham cing a, aman President tuh zaw hi leh Trump tawh kidem thei mahmah ding uh a, nasemmi a lungkim lote, a hehte leh a thanemte adingin na lianpi sem thei zaw ding hi ci-in nung kal in radio interview ah gen hi. -The Hindu/ Thang Khan Lian