Zomite, Mual ah i suakkhawm liailiai di’ai ve… ~ Pau Khat Suan

Zomite kithutuak lo kici. Ahi mah hiam?
Zomite kithutuak lo cih pen dikkhin taktak in ka ngaihsun kei hi. A beisa Minam vai vaihawmnate i etkik ciang, ki thutuah loh luat lawmlawmna omlo in ka ngaihsun hi.

Minam vai vaihawmna leh sepna tampite lak ah mipi tawh kisai a a kisem deuh pawlkhat enkik pak lehang…
1)cimawh dongtuak huhnate leh panpihnate – hihtheih bang ciat in kipang hi.
2) GZA – a langpan tam samlo hi.
3) ZTK – mipi kihel zuahzuah theihloh hang langpan galbawl, dembawl cihte om samlo hi.

4) 914 – Zomi – nakpitak mah in hihtheih zah in kipang ciat hi. A pualam helhhawtna leh angsung ultunna tawm in ong su nawngkai kha bek a, tua zong a tawm zaw thamtham hilel sam hi.

5) 2015 – Kitelpi ah Minam minsel Party mah tha kipia ciat sam hi. Party siksan a tutna kituh ahihman in kidempih nei hi a, mi khempeuh a pangkhawm theilo ding mah hi. Tua pen i sansiam ding hilel hi.

Kithutuak khang, kipawlkhawm thei khang, ki-pumkhat thei khang cihcih pen dik khinlo in ka ngaihsun hi.

“Ki-thutuak khang, ki-pumkhat khang” …. acici pawlkhat bel kipawlna khat bek, party khat bek, makaihna khat bek nuai ah ( esp. ama’ khut nuai ah ) mi khempeuh puk diamdiam ding, cihcih mang ding, ut bangbang a pei melmel ding cih dictating lungsim tawh a gengen hizaw kasa hi.

Minam ki-thutuak, ki-pumkhat cih pen “minam vai” ah goal khat, target khat, Kungmuipi khat nei a, tua Minam Kungmuipi zuan a i paina ah eima’ kal ciat tawh pai i hih hang i zuat, i ngim, i tup, i ngatna kibang a paikhawm i hih nak leh a ki-thutuak leh a kisap bang a ki-hualkhawm ziau thei ding ihi hi.

Tuabang dan a ei’ tha ciat, ei zia ciat tawh masawn a i pai laitak ong thanem sak thei ding kinial kiselna, angsung huaihamna leh mi tawmkhatte bek hamphatna ding lunggulh luatna, mipi makai a kinei in mipi maikhak a suaksak thei thu le la, zia le tong khempeuh i pelh ding, a hithei zah a i nilkhiat, i pampaih ding kisam mahmah ding hi.

A masa pen in, Kawlgam a a kihua mahmah “Cronyism, Nepotism” cihte Zomite’ politics bek hilo, kipawlna neuneute leh Biakna pawlpi sung nangawn ah zungthuk kha lua ahihman in tua zia le tong i nilkhiat, i pampaih ding kisam mahmah ding hi.

A nihna ah Zomite mimal khatciat mahmah ei le ei kitel lo pi in i kim i pam musit siam lua pahpah i hihman in, ei le ei ki musit a, kitel sawm masa kawm a i kim i pam i khaudak siam ding kisam ding hi.

Tua khit ciang i muhna siang ding a, i vaihawmna in sanggam unau khat, behkhat phungkhat bek hi nawnlo in zaipi huam a i minambup a huai zo vaihawmna, sep le bawlna, manawtna ah ong picing sak semsem ding ahi hi.

Tuabang ciang in i minambup a i Kungmuipi alangtang in ki neikhawm thei ding a i tha neihzah ciat, i hatzah, i pil i siam zah ciat tawh tua Kungmuipi zuankhawm in mual ah suakkhawm liailiai thei ding ihi hi.

Tuaci bang in Zomite Mual ah i suakkhawm liailiai di’ai ve.

Pau Khat Suan