Zogam ah “SIAL” kici ganhing namkhat ki ngahna thu

Zogam ah “SIAL” kici ganhing namkhat ki ngahna thu

Zogam ah SIAL kingah na thu – Leitungah Zogam in Pasian thupha piaksa Leitangh, mun leh gam ahihi. Pasian piaksa Zogam ah tualsuak ganhing Lian pen in Sial ahihi. Hih Sial kici ganhing in Zogam sim loh Leitung mun tuamtuam ah atam hetlo ganhing nam khat ahihi. Zomi Pu le Pa ten lamkam in nei uh a, siamsial, atehpih lakam in Sialbang lian cih thu ciin nei uh hi.

UmBawww..

Nidang Tangtawng in Khumhnuai khua kisat cil in Inn (10) aphak laitak in Khua ngei Muan keen hawm liangpi khat a om hi. Tua keenhawm lam ah “UmBawww..ci in aw ging lianpipi tawh ahunhun in awng zuazua mualkuam hawl in khat kiza tawn tung hi.

Nikhat Pasal tha hat khat in muan keen hawm lam zuan in ava en sim khiankhian hi. Tua leh muan keen hawm vang pan in apualam ah alu dawk khia sak in Umbaww ci in aham gingbaba ganhing nih aom mu tel ahihi.

LiLiLi Li

Khum hnuai cih Vangteh khua huam gamsung tangkhua lui khat ahihi. Pasal tha hat pa in lungngai dide in tua ganhing zol khiat asawn hi. Akhua dak leh laauluang phung khat mu a, ateh lo in, Tua gan hing nih te om na lam azuan hi. Ganhing min ding in asap na ding theilo a, Li,Li,Li Li ci in asap kawm in lauluangteh tawh azol leh lauluangteh na duh citciat ahih man in Muan keenhawm sungpan in ganhing zol khia zo ahihi.

“Sial”ci-in min phuak

Laauluangteh tampi pua kawmkawm in tawm tawm in nesak in inn ah aciah pih ding azol hi.Inn atun ciang in Khumhuai khuazang in banghi peuhmah hiam ciin ih lungsialsial honglausaksak ganhing va uh hi cihi. Gan hing min ding lungsialsialna teng tamsak in ” SIAL” ihcih ding in kipsak hi. Ganhing pen Muan keen hawm pan azol khiatna lauluangzong “SIALLUANG” ki ci hi. Sial ki ci ganhing nupate piankhiatna thu hibang in la tawh na ciam teh uh hi.

• (a) Sial hong laam Sial hong laam tah e’ Thuam ii sial khawi hong laam ee,
• (b) Apian na khumtui hi ee, atat na tuithang hi ee..

Khumvum kici mun ah tui kicingg pen sabeng uk mahmah Pu Thuam kici pa in mu masa in Tua tui cing pen Thuam tuicing kici a, tua mun kim ah sial gamtaa in om a, sial tampi pung mahmah hi. Tu in Thuam tuicing tuu hun guah tui tam hun bek in kicing in khuakhal hun teh tui om lo in akang hi.

Tua hih man in Muan Keen hawm pan kingah khia Khumhuai khuazang alau thawng sak mahmah Ummbawww pen LiLiLiLi, in kizol aa, Khuamnuai khua zang in LiLiLi Li ci a, kizol gan hing pen “Sial” cin min phuak a, Zogam Sial ganhing nam khat anei Zomi ihhihi. Hau Thang