Hihbang nupa aomthei takpi dinghiam?

Lawm kingai mahmah kopkhat ong kiteng uh a, a nupa un inn le lo kicing takin nei uh a, anasep tek uh tawh manlah mahmah uh hi.

A sawtlo in a inn sung vuah buaina lianpi khat ong om hi. A hang pen, alawmnu in akiten vua kipan in, apasal tawh khat vei beek lupkhop ding ut ngeilo cihthu ahihi. Azi pen asiam dan, zingsang tho baih, apasal thawhma in niangtui le moh abaihsa in koih in, innsung innpua siangsak sinsen hi.

A pasal zumkah ongtun ciangin, innmai panin dawnin, avan teng sangin, na gim hiam natawl hiam ci in, kamkhum tawh hopih den hi. A kisilna ding tui asa avot avek in abaihsa sinsen in koih in, anlim tuilim zong huan sak hi. Lengla zong amalam leh amanawh lam khenna, deidanna omlo in, limtak in zindo hi.

Akua mapeuh in, paakta tek uh a, hih bang mo angah khate hampha ei, hih bang zi anei kha pa pen ahampha hi cih pahtawina leh pahtakna kammal aneu alian kam sungpan in pusuak khia hi. Tua thamloh in, laitan pilna zong nei in, khuasung ah mizahtak khat zong ahihi. Mite in numei pil a cih te uh ahihi.

A pasal kiangah, nitaksim in, “u aw ong ngai mahmah ka hi aw, ahi zongin kinam lo ding kilawng selo ding maw. Kei lupna tuam ah, nang akhan tuam ah maw! Good night!” ci-in, lupsan den hi. Tuni dong in apasal in angak pen, “Abangci mawk a, ongngai mahmah ingh ci a, kiten kipina bawl khin a, tuni dong nupate pumkhat suahna tatak om theilo hiam?” ci-in, kuama kiangah lah gen ngamlo in thuak cihtak thuak mawk hi. “Ngak lai ning bang thu hipeuhmah hiam? Damlohna khat peuh nei a, theihpihlo kahiam?” Cita leh nisim tua bangin hun ong ben den teh, “Lawm aw, ong ngai tatak leteh hibang hilo ding hiteh. Bangbang hileh beh le phung tawh thu khat i vaihawm kul inteh” ci-in abuaina uh mite theihpih ong suakta hi.