Hamsiat zawding maw; a hoihzaw bawl zawding ~ Dong Mung

Hamsiat zawding maw; a hoihzaw bawl zawding ~ Dong Mung

Leitung pen lungkim dingin ngaihsun loin han’ nading, phun nading, hamsiat dingin la ngel hileng, han’ nading, phun nading, hamsiat nading tawh kidimna mun ahi hi.

Ahi zongin hibang bukimlohna tawh kidim leitungah mi thupite in leitung luan’zia tungah lungkim lo leh phun in a hun uh beisak lo uh-a, a hamsiat huai leitungah mite ading na lianpi hong semkhia zaw uh hi.

Tua bang mi tampite sungpan tawmnote khate enleng…

1). Mark Zukerberg – Lawmta khat thu kizakna hamsa in kihona a haksatna hangin manlang taka thu kizak nading le i sepna, i bawlna pepeuh i lawm le gual, it le ngaihte kiangah olno takin i theihsak theih nadingin Mark in Facebook hong bawlkhia ziau lel a, ama ading le mi tampite adingin thupha lianpi suaksak lel hi.

2). Jeff Bezos (Jeff Preston Jorgensen) – Leitungah i deih a diakin laibu ahi-a, video khat pepeuh ngah ziauh nading, lei ziauh nading hamsa mahmah kawmkal panin olno takin laibu le video tuamtuamte a kilei theih nadingin Jeff in Amazon.com hong bawlkhia ziau lel a, olno takin van adiakin laibu hoih nonote olno takin kilei thei hi.

3). Jack Ma – Van khat peuhpeuh i zuak nading ahi zongin, i lei nading ahi zongin hamsa mahmah kawmkal panin van zuak nuamte le van lei nuamte nuamtak le olno takin a kizop theih nadingin Jack Ma in Alibaba Company khat hong pankhia ziau lel a, mite’ olno takin kizom thei lel hi.

4). Thomas Edison – Inn sung, veng sung, khua sung, gam sung khuamial in a tawmcip kawmkal panin mite in olno takin khua mu henla, sun le zan in nasem in khangto thei ta hen, ci-in Thomas Edision in Meii (Electronic Bulb) hong bawlkhia ziau lel hi.

5). Alexander Graham Bell – Leitungah kithuzakna hamsa in khua khat le khua khat ahi zongin, gam khat le gam khat ahi zongin, khual gamla a om innkuanpihte tawh thu kiza pahpah zolo kawmkal ah, Alexander Graham Bell in phone hong bawlkhia ziau a, mihingte kizopna le kithuzakna hong ol mahmah in hong manlang mahmah lel hi.

Gengen ni cileng hibang in mi thupi tampitak om lai hi… I thalak ding deihna tawh a tung mi tawmno khatte’ na lianpi sepkhiatte hong gelhkhia ka hi hi.

Tua hi-a, sanggam u le naute aw, leitung paiziate tungah lunggim ding le heh dingin ngaihsun hileng cikmah ciangin lungkim cih i nei ngei kei ding hi.

A tunga i suahsak mite’ pen ei mah bangin a heh thei, a phun thei, a lungkia thei, a hang gawp thei, leitung le khuahunte a hamsiat gawp thei mihing mah ahi uh hi… Ahi zongin amaute in leitung khuahun paiziate hamsiat le phunsan lo zaw uh-a, ahoihzaw kalsuanna tawh hong mainawt uh ciangin amau ading le midangte adingin na manpha lianpipite hong semkhia uh hi.

Tua ahih manin i minam sung, i pawlpi sung, i kipawlna sung, i khua le tui sung, i u le nau sung le vai bangkimte ah thanemnate hangin a phunphun hilo zaw a, kicinlohnate hamsiat hilo zaw in, ei mahmah in thuhoih thupha i bawlkhiat ding kisam hi.

Tu-in nang le kei zong, hih leitung khuahunte hangin phunphun nawnlo zaw a, leitung ading na lianpi i sepkhiat hun hita hi.

I hamsiat sangin ahoihzaw bawl sawm ni. HAMSIAT ZAW DING MAW; AHOIHZAW BAWL ZAW DING? Deihsakna lianpi tawh, Dong Mung