Gullu vai le CNRWG leh kei kihelna

Gullu vai le CNRWG leh kei kihelna

Kumpi nasem hihna tawh 2006 kum in kawlpi ka tung hi. Kumpi na kasep kawmin minam vai, tangpi vai le lailam nasepnate ah siam kician ka neih loh hangin lawp takin in ka hanciam mahmah hi.

2009 kum pawl pan kipan lawm le gualte tawh Myanma gam kikhelna thu le leitung thu omziate kikupna leh thugenna ka nei thei zel hi.

Mipite thanemna launa meidawite siksan in kumpi thuneite a kipan mi pawlkhatte in mipi ong nopneh theihloh nadingin mipi mahmah in ei kemcing ding upadi tuamtuamte, gammite pianken hamphatna le UNDRIP a kipan Right tuamtuam thei leng hoih ding hi cih ngaihsutna tawh hih theih zahzah in tua thute hopsawnna ka na zel uh hi.

Mipi tawh kikhawl in mapanna tampi a om hangin, hih lai ah gullu mual vai le kipawlna thu tomno cik khat ki tangko nuam hang.

2% sang a tamzaw deihna

I theihtek sa mah bangin ahunhun in gullu mual project pen kigenden thu khat hi a, 2012 kum ciangin zong Union thuneite phalna tawh China company khat in to ding cih thu ong om leuleu hi. Hih vai gullu mualkim a om khuamite tawh kikum in State gov ah thu dotna kinei hi. State thuneite in“ Union thuneite vaihawmna hi. Ei pau theih bangmah om lo ding hi. A thu minsa hi.Nasepna pan amet 2% pen Chin state in kingah ding hi. Hoih mahmah hi.” cih thu tawh kiciah kik hi.

Hih bangin State thuneite tawh kiho theihna dingin Gullu mualkim a khuamite tawh 2012 kum beikuan leh 2013 kipat lam, kha nih le lang sungin mipi tawh kimuh khopna 52 vei le khua makai lamte tawh kimuh khopna 29 vei kinei hi. Tua khawmpi le kimuh khop tungtawnin Hakha khua ah a kipai to pan ahi hi.

Hih hun sunga mapangpi pen Lawm Andrew Thatuang, Lawm Zam Thuam le Siamsinte tawh hi a, gampua a om u le nau akua maciat in sum le pai thu le la tawh kipangkhawm hi. Hih hun ciangciang pen kipawlna min cih bang kinei nailo hi. News tuamtuam te nasepna thute kihel den a, ahi zongin kipawlna min pen amau ut dandan in at lel uhi.

Kipawlna kipatna

Atunga I gen sa mah bangin hih thu pen Union vai le China gam tawh kisai thu ahih manin kawlpi sunga om mipi le kipawlna tuamtuam banah Chin state sunga mipite le gambup in mapan khop ding kisam ding hi cih ngaihsutna tawh Kawlpi Youth center ah kipawlna namkim, minam kim le khangno upa a kim theithei sam in meeting pi khat kinei hi. Tua meeting ah thu om khempeuh ka gen uhi. Ko ngiahsutna ah tua bangin gen leng mipi sung pan hih vai ah a mapang ding apil a siam mi ong om lel ding hi ci in a lamen ka hi uhi.

Ahi zongin meeting ong kihel mipite in hih nasepna mapante hoih takin a kizop theihna in kipawlna khat om hen la, a sem a bawl ding pen no teng mah in ong hanciam toto mai un ci in tavuan ong leh piakkik zawsop hi. Kipawlna min dingin CNRWG cih min ong phuah sak uhi.

Gambup a lok movement

Cih nading dang om tua lo ahih manin tua hun a kipan Gullu vai ah mipite ong kinopneh luatloh nadingin CNRWG min tawh thaneih zah in mapang in kihanciam hi. Lunggulhna a lawhcin theihna dingin kipawlna, biakna minam le party tuamtuamte tawh ma kipang khawm hi. Ut le utloh thu hi lo hi.

I theihsa tek mah bangin 2013 -2014 kim laitakin mipi movement tawh Myanma gam a kilok ziahziah sak pen thu thum om hi. Kachin gam a Mitsone tuibem thu, Monwa gei a sumngo khuk thu le Gullu nickel project vai cih ahi hi.

Hih hun sung kumpi thuneite tawh gal le sa bangin kinawkna kitalsikna, China company le ama naseppih te twh zawhngeu le zusa bangin kizandelhna gen zawh loh in tam hi.

Mat le hen tuahna ding thu om zel a, lawm le gual tungtawnin Pasian in kepna hangin kolbulh khaukhitna om loin maban a kisemsem thei ahi hi.

Gamsung gampua mapan khopna

Gamsung gampua ma kipangkhawm banah kipawlna namkim le minamkim tawh kithukhat in I diankhop ciangin Union government in a thu om zia damdam in ong khel toto hi.2014 Agust kha a kibawl Union parliament ah “ Gullu vai ah mipi tawh hoih tak kiho limna kician om masa loin bangmah kisem lo ding hi” ci in tangkona ong nei demdam hi. Hih ciang atun nadingin gamsung bek hi loin gamtuamtuam a om Zomi u le naute in sum le pai ban ah China kumpi kizopna zumte ah lungphona nakpi takin a kineih man zong ahi hi.

Mipi movement nam thum lakah nuntakna bei lawhlo, sisan naisan luangloin mipi deihna ciang a tungzo pen Gullu vai bek om a, Monwa sumngo khuk vai le Kachin mitsone vaite ah mipi a si a liam tampi om banah tu ni dongciang buaina kizomzom lai hi.

Hih vaite khempeuh ah minam tampi kipawlna tampi tawh kisem khawm a, ei Zomi sungah kikholhpihdiak tampi lakah Siapi Tuanno, Cosmo Zakhai, Sai Thangpi, U Mungno ( Thangsuanmung ), U Micheal Suantak,Khual Suante, U Cinpu( Will computer ), Sia Thang Van Lian, U Khai ( Chin gate ), u Nangno,,Pa Loh Lam Mung, Dr Siambawi, Ampi, Palian ( pawngku), Biamung, Pautawi, Kamkhancin, Haunu, Mimoo, Khaipau, Sutpi, Lawm Andrew Thatuang, Zam Thuamte banah Siamsin makai peuhpeuh leh ZYA in kisapna munmun ah ahunhun in ong dinpih lianlian hi. ( ka phawk vatloh adang tampi om lai hi)

Kidin khawl theilo

Gullu vai ah mipi thu thupi bawlna a om hangin tua hun sung mah in Chin state ah leitang vai, leisung sumpiang vai tuamtuam tampi ong om kawikawi leuleu hi. Tua vaite ah zong mapang dingin amun amual a om mipite in CNRWG mah ong bulphuh leuleu uhi. Ei vai manta hi ci in ong kinusia ziau theilo dinmun ahih manin mapanna pawlkhat kinei toto hi.

2015 kum kipatlam ciangin Leitang vai leisung sumpiang vaite ah thukhun gina khat nei leng hih bang buaina nengnengte tampi ong kiam pah ding hi cih ngaihsutna tawh Chin state ading mipi le CSOs te deih Policy Draft khat neih zawh ding kihanciam sawm leuleu hi.

NGO tawh maban kizom

Chin state ading leitang vai leisungsum piang vaite ah policy draft neih zawh ding lunggulhna a om hangin sum le pai ding hamsatna lianpi ong om hi. Tua bang hun laitakin Sia Lianpu ( Ar Yone Oo ) tawh kizom kha in ama deihsakna tawh NGO kum 3 project khat kingah in tua project bel in Chin state ading policy draft zong kibawl kawmkawm pah hi.

Policy draft pen 2017 sungin kizo a State speaker le kumpi thunei ban ah MP te kiang leh mipi tungah tangko na zong kinei khin hi.

Hoih tak kimahial thei

Gullu vai, Policy draft vaite kizo ta a, NGO Project zong tu kum in a bei hi ta hi. Ahi zongin mipa ading kisapna om bangin abeisa hunte mah bangin hanciamin na kisemsem lai hi.

Project tawh nasep sep kawmin Zogam ading thasan pawlkhat

1-State ading leitang le leisung sumpiang vai policy draft kibawl zo

2-Tedim, Tonzang, Cikha huam ah mi 1200 tawh thusinna hoihtak kinei

3-2015-2018 sung hausa upa pan kipan Chief minister dongah ulian 190 val tungah mipi tangin thugenna kinei

4-Gamgi vai le development lam tawh kisai mipi le kumpi thuneite zattheih ding laibu nam 3 kibawl

5-2015 kum dongtuakte ading panpihna sum teng 5400 val kizong zo
6-State level vai tuamtuamte CSOs min tawh ma kipang kawikawi

7- Thu hamsa pawlkhat ah mipi palai hi zel kumpi palai hi zel in thu lemtuahin ma kipang hi.

Cih te banah mipi adingin vai lian vai thupi mun tampi ah Pasian hehpihna tawh thuk takin makipang thei zel hi.

Thukhupna

2012 pan kipan in Gullu mual vai ah mipite lung kihual takin ma kipang khawm in lawhcinna tampi zong kingah hi. Gullu mual vai le Zogam leitang vaite ah thaneih zah in kihanciam ahih manin minam vai nasepna dangdangte ah lungsim om bangin ma kipang zolo mai hi. Tu in gullu vai le leitang vaite pawlkhat ki mahial thei ta ahih manin mai lam ah mipi tawh khut kilenin sep theih bangbang sem khawm toto nuam hang cih ki tangko nuam hang. Lian Tuang